അഹമ്മദാബാദ്: എയർ ഇന്ത്യയുടെ ബോയിംഗ് 787-8 ഡ്രീംലൈനർ വിമാനം അഹമ്മദാബാദിൽ പറന്നുയർന്ന് നിമിഷങ്ങൾക്കുള്ളിൽ തകർന്നുവീണ സംഭവത്തിൽ, വിമാനത്തിന്റെ ബ്ലാക്ക് ബോക്സ് കണ്ടെത്തി. ഡോക്ടർമാരുടെ ഹോസ്റ്റലിന്റെ മേൽക്കൂരയിൽ നിന്നാണ് സുപ്രധാന വിവരങ്ങൾ രേഖപ്പെടുത്തുന്ന ഓറഞ്ച് നിറത്തിലുള്ള ഉപകരണം എയർക്രാഫ്റ്റ് ആക്‌സിഡന്റ് ഇൻവെസ്റ്റിഗേഷൻ ബ്യൂറോ (എഎഐബി) കണ്ടെടുത്തത്.

വ്യാഴാഴ്ച ഉച്ചയ്ക്ക് 1.39ന് അഹമ്മദാബാദ്-ലണ്ടൻ റൂട്ടിൽ സർവീസ് നടത്തുന്ന എയർ ഇന്ത്യയുടെ AI171 വിമാനം, പറന്നുയർന്ന് 30 സെക്കൻഡിനുള്ളിൽ റൺവേയ്ക്ക് സമീപത്തെ ബിജെ മെഡിക്കൽ കോളേജ് ഹോസ്റ്റലിലേക്ക് ഇടിച്ചിറങ്ങുകയും. 241 യാത്രക്കാരും 24 മെ‍ഡിക്കൽ വിദ്യാർഥികൾ ഉൾപ്പെടെ 265 പേർ മരിച്ച ഈ ദുരന്തം ഇന്ത്യയുടെ വ്യോമയാന ചരിത്രത്തിലെ ഏറ്റവും മാരകമായ അപകടങ്ങളിലൊന്നാണ്. ഇന്ത്യൻ വംശജനായ ബ്രിട്ടീഷ് പൗരനായ വിശ്വഷ്കുമാർ രമേശ് മാത്രമാണ് പരുക്കുകളോടെ രക്ഷപ്പെട്ടത്.

ഗുജറാത്ത് സർക്കാരിന്റെ 40 ഉദ്യോഗസ്ഥരുടെ സഹായത്തോടെയാണ് എഎഐബി സംഘം വിമാനത്തിന്റെ ഡിജിറ്റൽ ഫ്ലൈറ്റ് ഡാറ്റ റെക്കോർഡർ (ഡിഎഫ്‌ഡിആർ) അടങ്ങുന്ന ബ്ലാക്ക് ബോക്സ് കണ്ടെത്തിയത്. വിമാന വേഗത, ഉയരം, എഞ്ചിൻ പ്രവർത്തനം, പൈലറ്റുമാരും എയർ ട്രാഫിക് കൺട്രോളും തമ്മിലുള്ള ആശയവിനിമയം എന്നിവ രേഖപ്പെടുത്തുന്ന ഈ ഉപകരണം, അപകടകാരണം കണ്ടെത്തുന്നതിൽ നിർണായക പങ്ക് വഹിക്കും. സ്റ്റീൽ, ടൈറ്റാനിയം എന്നിവകൊണ്ട് നിർമ്മിച്ച ബ്ലാക്ക് ബോക്സിന് രണ്ട് ഘടകങ്ങളുണ്ട്: ഡിഎഫ്‌ഡിആർ സാങ്കേതിക വിവരങ്ങളും, കോക്പിറ്റ് വോയ്‌സ് റെക്കോർഡർ (സിവിആർ) പൈലറ്റ് സംഭാഷണങ്ങളും രേഖപ്പെടുത്തുന്നു.

"28 മണിക്കൂറിനുള്ളിൽ ബ്ലാക്ക് ബോക്സ് കണ്ടെടുത്തത് അന്വേഷണത്തിലെ സുപ്രധാന ചുവടുവയ്പ്പാണ്," കേന്ദ്ര സിവിൽ ഏവിയേഷൻ മന്ത്രി രാം മോഹൻ നായിഡു പറഞ്ഞു. "ഈ ഉപകരണം അപകടത്തിന്റെ കൃത്യമായ കാരണം വെളിപ്പെടുത്താൻ സഹായിക്കും." കോക്പിറ്റ്, ക്യാബിൻ ക്യാമറകളിൽ നിന്നുള്ള ദൃശ്യങ്ങൾ രേഖപ്പെടുത്തുന്ന ഡിജിറ്റൽ വീഡിയോ റെക്കോർഡറുകളും (ഡിവിആർ) അന്വേഷണത്തിന് സഹായകമാകും.

വിമാനത്താവളത്തിലെ സിസിടിവി ദൃശ്യങ്ങളിൽ, വിമാനം റൺവേയിൽ വേഗത കൈവരിക്കുന്നതും പറന്നുയരുന്നതും വ്യക്തമാണ്. എന്നാൽ, പ്രതീക്ഷിച്ച ഉയരം നേടുന്നതിൽ പരാജയപ്പെട്ട വിമാനം, നിമിഷങ്ങൾക്കുള്ളിൽ താഴ്ന്ന് ഹോസ്റ്റലിലേക്ക് ഇടിച്ചിറങ്ങി. "പതിവ് യാത്ര എന്തുകൊണ്ട് ദുരന്തമായി മാറി എന്ന് മനസ്സിലാക്കാൻ അന്വേഷകർ സഹായിക്കും," ടാറ്റ സൺസ് ചെയർമാൻ എൻ ചന്ദ്രശേഖർ പറഞ്ഞു.

ഇന്ന് പ്രധാനമന്ത്രി നരേന്ദ്ര മോദി അപകടസ്ഥലവും അഹമ്മദാബാദ് സിവിൽ ആശുപത്രിയും സന്ദർശിച്ചു. ടാറ്റ ഗ്രൂപ്പ് മരിച്ചവരുടെ കുടുംബങ്ങൾക്ക് ഒരു കോടി രൂപ നഷ്ടപരിഹാരം പ്രഖ്യാപിച്ചു. അപകടകാരണം കണ്ടെത്താനും ഭാവിയിൽ വ്യോമയാന സുരക്ഷ ശക്തിപ്പെടുത്താനും സർക്കാർ ഒരു അന്വേഷണ പാനൽ രൂപീകരിച്ചിട്ടുണ്ട്.