പത്തനംതിട്ട: ബസിന്റെ ഓട്ടോമാറ്റിക് ഡോർ കയറുന്നതിന് മുൻപ് അടഞ്ഞ് താഴെ വീണ വിദ്യാർഥിക്ക് പരുക്ക്. തിരുവല്ലയിലെ പൊടിയാടിയിൽ ആണ് ബസ് ജീവനക്കാരുടെ അനാസ്ഥമൂലം വിദ്യാർഥിക്ക് പരുക്കേറ്റത്. വിദ്യാർഥി താഴെ വീണത് അറിയാതെ മുന്നോട്ട് പോയ ബസിനെ നാട്ടുകാർ തടഞ്ഞുവെച്ച് വിവരം അറിയിക്കുകയായിരുന്നു. വിദ്യാർഥി വാതിൽ പടിയിൽ നിന്ന് വീഴുന്നതിന്റെ സി.സി.ടി.വി ദൃശ്യങ്ങൾ പുറത്തുവന്നിട്ടുണ്ട്.

ഇന്ന് രാവിലെ എട്ടരയോടെ പൊടിയാടി ജങ്ഷനിലായിരുന്നു സംഭവം. മാവേലിക്കര - തിരുവല്ല റൂട്ടിൽ ഓടുന്ന രഘുമോൻ എന്ന ബസിൽ നിന്നാണ് സ്‌കൂളിലേക്ക് പോവുകയായിരുന്ന വിദ്യാർഥി തെറിച്ച് വീണത്. സ്റ്റോപ്പിൽ നിർത്തിയ ബസിൽ കയറുന്നതിനിടെ ബസ് നീങ്ങുകയും കുട്ടി പിൻവശത്തെ വാതിൽ പടിയിൽ നിന്നും പുറത്തേക്ക് തെറിച്ചു വീഴുകയുമായിരുന്നു. 

സംഭവ ശേഷം ബസ് നിർത്താതെ പോയി. പിന്നാലെ കാറിലെത്തിയ മനുകുമാർ എന്നയാൾ തൊട്ടടുത്തുള്ള കാവുംഭാഗം ജങ്ഷനിൽ വച്ച് ബസ് തടഞ്ഞുനിർത്തി ജീവനക്കാരെ വിവരം അറിയിക്കുകയായിരുന്നു. എന്നാൽ തങ്ങളുടെ ബസിൽ നിന്നും ആരും താഴേക്ക് വീണില്ലെന്ന വാദമാണ് ജീവനക്കാർ പറഞ്ഞത്. മാത്രമല്ല, ജീവനക്കാർ മനു കുമാറിനോട് തട്ടിക്കയറുകയും ചെയ്തു. തുടർന്ന് ചുറ്റുംകൂടിയ നാട്ടുകാരും ബസ് ജീവനക്കാരും തമ്മിൽ വാക്ക് തർക്കമായി. പൊലിസ് എത്തിയാണ് രംഗം ശാന്തമാക്കിയത്. രാവിലെ ഓഫീസ് - സ്‌കൂൾ സമയമായതിനാൽ മറ്റ് യാത്രക്കാരുടെ യാത്ര മുടങ്ങാതിരിക്കാൻ പൊലിസ് ഇടപെട്ട് ബസ് വിട്ടയച്ചു.

A student was injured after falling from a bus due to the automatic door closing prematurely before the student could board. The incident occurred at Podiyadi in Thiruvalla, allegedly due to the carelessness of the bus staff.