ലഹരിവിരുദ്ധ ക്യാമ്പെയ്ൻ ഊർജിതമാക്കും

കേരളം ലഹരിവിരുദ്ധ പോരാട്ടത്തിന്റെ പാതയിലാണെന്നും ലഹരിവിരുദ്ധ പ്രചാരണം ശക്തമാക്കുമെന്നും മുഖ്യമന്ത്രി പിണറായി വിജയൻ വാർത്താ സമ്മേളനത്തിൽ വ്യക്തമാക്കി. ജൂൺ 26-ന് അന്താരാഷ്ട്ര ലഹരിവിരുദ്ധ ദിനത്തിൽ അഞ്ചാം ഘട്ട ലഹരിവിരുദ്ധ ക്യാമ്പെയ്ൻ ഉദ്ഘാടനം ചെയ്യും. ‘എന്റെ കുടുംബം ലഹരിമുക്ത കുടുംബം’ എന്ന ക്യാമ്പെയ്ൻ 2026 ജനുവരി 30 വരെ തുടരും. വിദ്യാലയങ്ങൾ കേന്ദ്രീകരിച്ച് ലഹരിവിരുദ്ധ പരിപാടികൾ നടപ്പാക്കുമെന്നും സ്കൂളുകളിലെ പരാതികൾ പരിശോധിക്കുമെന്നും മുഖ്യമന്ത്രി അറിയിച്ചു. ഓപ്പറേഷൻ ഡി-ഹണ്ടിന്റെ ഭാഗമായി ജൂൺ 10 മുതൽ 16 വരെ 730 ലഹരിക്കേസുകൾ രജിസ്റ്റർ ചെയ്തതായും അദ്ദേഹം വെളിപ്പെടുത്തി.

രാജ്ഭവന്റെ വെല്ലുവിളി

സർക്കാർ പരിപാടികളിൽ സർക്കാർ അംഗീകരിച്ച പൊതു ബിംബങ്ങൾ മാത്രമേ ഉപയോഗിക്കാവൂ എന്ന നിലപാട് കൃഷിമന്ത്രി ഗവർണറെ അറിയിച്ചതായി മുഖ്യമന്ത്രി പറഞ്ഞു. വ്യക്തിപരമായ താൽപ്പര്യങ്ങൾ ഔദ്യോഗിക പരിപാടികളിൽ പ്രകടിപ്പിക്കരുതെന്നും ഗവർണർക്ക് ഇക്കാര്യം ബോധ്യമായെന്നും അദ്ദേഹം കൂട്ടിച്ചേർത്തു. രാജ്ഭവൻ രാഷ്ട്രീയ പ്രചാരണ വേദിയല്ലെന്നും ഭരണഘടനയോടുള്ള വെല്ലുവിളികൾ അംഗീകരിക്കാനാവില്ലെന്നും മുഖ്യമന്ത്രി വ്യക്തമാക്കി. ‘ഭാരതാംബ’ വിവാദത്തിൽ, ആർഎസ്എസിന്റെ കൊടിയാണ് ഭാരതാംബയുടെ കയ്യിലുള്ളതെന്നും ഇത് അംഗീകരിക്കാൻ ബുദ്ധിമുട്ടുണ്ടെന്നും അദ്ദേഹം ചൂണ്ടിക്കാട്ടി. ആർഎസ്എസിന് അവരുടെ ചിഹ്നം ഉപയോഗിക്കാമെങ്കിലും മറ്റുള്ളവർ അത് അംഗീകരിക്കണമെന്ന് ആവശ്യപ്പെടുന്നത് ശരിയല്ലെന്നും മുഖ്യമന്ത്രി പറഞ്ഞു.

ആർഎസ്എസ് പ്രീണനം ഇല്ല

സിപിഎമ്മിന് ഒരിക്കലും ആർഎസ്എസിനോട് പ്രീണനമില്ലെന്ന് മുഖ്യമന്ത്രി ഉറപ്പിച്ചു പറഞ്ഞു. ആർഎസ്എസിന്റെ വർഗീയതയോടോ മറ്റേതെങ്കിലും വർഗീയ ശക്തിയോടോ സിപിഎം ഒരു ഘട്ടത്തിലും കൂട്ടുകെട്ട് നടത്തിയിട്ടില്ല. ആർഎസ്എസിനെതിരെ എന്നും പോരാടിയിട്ടുള്ളത് സിപിഎമാണെന്നും, ആർഎസ്എസ് കമ്മ്യൂണിസ്റ്റുകളെ ആഭ്യന്തര ശത്രുക്കളായി കാണുന്നുവെന്നും അദ്ദേഹം ചൂണ്ടിക്കാട്ടി. ആർഎസ്എസുമായി ഒരു ബന്ധവുമില്ലെന്നും, അവരുടെ ആശയങ്ങൾക്കെതിരെ പോരാട്ടം തുടരുമെന്നും മുഖ്യമന്ത്രി വ്യക്തമാക്കി.

കപ്പൽ അപകടം

കപ്പൽ അപകടങ്ങളുമായി ബന്ധപ്പെട്ട വിവരശേഖരണത്തിനായി സംസ്ഥാന ദുരന്ത നിവാരണ അതോറിറ്റി വെബ് ആപ്ലിക്കേഷൻ തയ്യാറാക്കിയിട്ടുണ്ട്. 65 കണ്ടെയ്നറുകൾ തീരപ്രദേശങ്ങളിൽ കണ്ടെത്തിയതായി റിപ്പോർട്ടുണ്ട്. കപ്പലിൽ ഇപ്പോഴും തീയും പുകയും ഉണ്ടെന്നാണ് വിവരം. എറണാകുളം, കൊല്ലം, ആലപ്പുഴ ജില്ലകളുടെ തീരങ്ങളിൽ കണ്ടെയ്നറുകൾ അടിയാൻ സാധ്യതയുണ്ട്. കടൽത്തീരത്ത് കപ്പലിൽ നിന്ന് വീണതെന്ന് സംശയിക്കുന്ന വസ്തുക്കൾ കണ്ടാൽ സ്പർശിക്കരുതെന്നും, 200 മീറ്റർ അകലം പാലിക്കണമെന്നും, 112-ൽ വിവരം അറിയിക്കണമെന്നും മുഖ്യമന്ത്രി നിർദേശിച്ചു.

ഇറാൻ-ഇസ്റാഈൽ സംഘർഷം

ഇറാനെതിരായ ആക്രമണം അവസാനിപ്പിക്കാൻ ഇസ്റാഈൽ തയ്യാറാകണമെന്നും ഐക്യരാഷ്ട്രസഭ ഇടപെടണമെന്നും മുഖ്യമന്ത്രി ആവശ്യപ്പെട്ടു.ഇസ്റാഈലിനെതിരെ ഇന്ത്യ പ്രതിഷേധം രേഖപ്പെടുത്തണമെന്നും, യുദ്ധഭൂമിയിൽ കുടുങ്ങിയവരെ തിരികെ എത്തിക്കാൻ നടപടി വേണമെന്നും അദ്ദേഹം പറഞ്ഞു. തിരിച്ചുവരാൻ ആഗ്രഹിക്കുന്ന മലയാളികൾ നോർക്കയിൽ പേര് രജിസ്റ്റർ ചെയ്യണമെന്നും മുഖ്യമന്ത്രി അറിയിച്ചു.

Kerala CM Pinarayi Vijayan announced a stronger anti-drug campaign, launching the fifth phase on June 26, extending to January 30, 2026, with school-focused programs. Operation D-Hunt registered 730 drug cases from June 10-16. On the Bharat Mata controversy, he criticized the use of RSS symbols in official events, stating Raj Bhavan must not become an RSS shakha. He reaffirmed CPM’s opposition to RSS, denying any alliance. Regarding a ship accident, 65 containers were found along Kerala’s coast, with warnings to avoid touching debris. On Iran-Israel tensions, he urged UN intervention and repatriation of stranded Malayalis.