തിരുവനന്തപുരം: ആലംകോട് ഗവൺമെന്റ് വൊക്കേഷണൽ ഹയർ സെക്കൻഡറി സ്കൂളിൽ (വിഎച്ച്എസ്ഇ) പ്ലസ് വൺ വിദ്യാർഥികളും സീനിയർ വിദ്യാർഥികളും തമ്മിൽ ഉണ്ടായ സംഘർഷത്തിൽ മൂന്ന് വിദ്യാർഥികൾക്ക് ഗുരുതര പരിക്ക്. സംഭവത്തെ തുടർന്ന് ഏഴ് സീനിയർ വിദ്യാർഥികളെ സ്കൂൾ അധികൃതർ സസ്‌പെൻഡ് ചെയ്തു.

കഴിഞ്ഞ ദിവസം നടന്ന സംഭവത്തിൽ, പുതുതായി പ്ലസ് വൺ ക്ലാസിൽ അഡ്മിഷൻ എടുത്ത വിദ്യാർഥികളോട് പ്ലസ് ടു വിദ്യാർഥികൾ പേര് ഉച്ചത്തിൽ പറയാൻ ആവശ്യപ്പെട്ടതാണ് തർക്കത്തിന് തുടക്കമിട്ടത്. പേര് പറഞ്ഞപ്പോൾ ശബ്ദം കുറഞ്ഞുപോയെന്ന് ആരോപിച്ച് സീനിയർ വിദ്യാർഥികൾ തട്ടിക്കയറുകയായിരുന്നു. തുടക്കത്തിൽ ഉന്തും തള്ളും മാത്രമായിരുന്നെങ്കിലും, കൂടുതൽ സീനിയർ വിദ്യാർഥികൾ എത്തിയതോടെ സംഘർഷം രൂക്ഷമായി.

പത്തോളം സീനിയർ വിദ്യാർഥികൾ, കൈയിൽ കിട്ടിയ സാധനങ്ങൾ ഉപയോഗിച്ച് പുതിയ വിദ്യാർഥികളെ ആക്രമിച്ചതായി പരാതിയിൽ പറയുന്നു. ആക്രമണത്തിൽ അമീൻ, ഷിഫാൻ, മുനീർ എന്നീ വിദ്യാർഥികൾക്ക് കണ്ണിനും തലയ്ക്കും ശരീരത്തിനും ഗുരുതര പരിക്കേറ്റു.

സംഭവത്തിന് പിന്നാലെ, സ്കൂൾ അധികൃതർ ഏഴ് സീനിയർ വിദ്യാർഥികളെ സസ്‌പെൻഡ് ചെയ്യുകയും നഗരൂർ പൊലീസ് സ്റ്റേഷനിൽ പരാതി രജിസ്റ്റർ ചെയ്യുകയും ചെയ്തു. പരിക്കേറ്റ വിദ്യാർഥികളുടെ രക്ഷിതാക്കളും പൊലീസിൽ പരാതി നൽകിയിട്ടുണ്ട്.

സ്കൂൾ മാനേജ്മെന്റ്, പിടിഎ, രക്ഷിതാക്കൾ എന്നിവർ ചേർന്ന് തുടർനടപടികൾ ആലോചിക്കുകയാണ്. മുൻപ് ഇത്തരം സംഘർഷങ്ങൾ സ്കൂളിൽ റിപ്പോർട്ട് ചെയ്യപ്പെട്ടിട്ടില്ലെന്നും, സമീപവാസികളായ വിദ്യാർഥികൾ തമ്മിലുള്ള വ്യക്തിപരമായ തർക്കമാണ് സംഘർഷത്തിൽ കലാശിച്ചതെന്നും നാട്ടുകാർ പറയുന്നു.