ന്യൂഡല്‍ഹി: പാകിസ്ഥാനുവേണ്ടി ചാരവൃത്തി നടത്തിയ കേസില്‍ സൈനികനടക്കം രണ്ടുപേര്‍ അറസ്റ്റില്‍. പഞ്ചാബ് സ്വദേശികളായ സൈനികന്‍ ഗുര്‍പ്രീത് സിങ് എന്ന ഗോപി ഫൗജി, സഹില്‍ എന്ന ഷാലി എന്നിവരാണ് അറസ്റ്റിലായതെന്ന് അമൃത്സര്‍ (റൂറല്‍) സീനിയര്‍ പൊലിസ് സൂപ്രണ്ട് ഓഫ് പൊലിസ് (എസ്.എസ്.പി) മനീന്ദര്‍ സിങ് പറഞ്ഞു. ഗുര്‍പ്രീത് സിങ് 2016 മുതല്‍ ഇന്ത്യന്‍ ആര്‍മിയില്‍ സേവനമനുഷ്ഠിച്ചുവരികയാണ്. നിലവില്‍ ജമ്മു സെക്ടറിലാണ് സേവനംചെയ്യുന്നത്.

പാക് ചാരസംഘടനയായ ഐ.എസ്.ഐ ഉദ്യോഗസ്ഥരുമായി നേരിട്ട് ബന്ധപ്പെട്ടിരുന്നുവെന്നും യു.എസ്.ബി ഡ്രൈവുകള്‍ ഉപയോഗിച്ച് ഇന്ത്യന്‍ സൈനിക വിവരങ്ങള്‍ പാകിസ്ഥാന് കൈമാറിയിരുന്നതായും പ്രാഥമിക അന്വേഷണത്തില്‍ കണ്ടെത്തിയിട്ടുണ്ട്. പാകിസ്ഥാനിലെ ഐ.എസ്.ഐയുടെ പ്രധാന റിക്രൂട്ടറായ റാണ ജാവേദുമായി ഗുര്‍പ്രീത് നേരിട്ട് ആശയവിനിമയം നടത്തിയിരുന്നതായി എസ്.എസ്.പി സ്ഥിരീകരിച്ചു. ഐ.എസ്.ഐ ഏജന്റുമാരുമായി ബന്ധപ്പെടാന്‍ പ്രതികള്‍ ഉപയോഗിച്ച രണ്ട് മൊബൈല്‍ ഫോണുകള്‍ പൊലിസ് കണ്ടെടുത്തു. ഈ ഉപകരണങ്ങളുടെ ഫോറന്‍സിക് പരിശോധനാ ഫലം ചാരവൃത്തി ബന്ധങ്ങള്‍ സ്ഥിരീകരിച്ചതായി റിപ്പോര്‍ട്ടുണ്ട്.

പഹല്‍ഗാം ഭീകരാക്രമണസമയത്തും ഇയാള്‍ പാക് ഏജന്റുമാരുമായി ബന്ധപ്പെട്ടിരുന്നതായും അന്വേഷണസംഘത്തിന് വിവരംലഭിച്ചു. പഹല്‍ഗാം ആക്രമണത്തെക്കുറിച്ച് ഗുര്‍പ്രീതിന് മുന്‍കൂട്ടി അറിവുണ്ടായിരുന്നിരിക്കാമെന്നും അക്രമികള്‍ക്ക് അദ്ദേഹം വിവരങ്ങള്‍ കൈമാറിയിരിക്കാമെന്നും പൊലിസ് വൃത്തങ്ങള്‍ പറഞ്ഞതായി ഇന്ത്യാടുഡേ റിപ്പോര്‍ട്ട്‌ചെയ്തു.
അതേസമയം, ഏതെല്ലാം വിവരങ്ങളാണ് ഇരുവരും പാകിസ്ഥാന് കൈമാറിയതെന്ന് വ്യക്തമല്ല. ഇക്കാര്യത്തില്‍ വിശദമായി അന്വേഷണം നടത്തിവരികയാണെന്നും മൊബൈല്‍ ഫോണ്‍ ഉള്‍പ്പെടെയുള്ളവ പിടിച്ചെടുത്ത് പരിശോധിച്ചുവരികയാണെന്നും പൊലിസ് അറിയിച്ചു.

പഹല്‍ഗാമില്‍ നടന്ന ഭീകരാക്രമണവും അതേതുടര്‍ന്ന് പാക് കേന്ദ്രങ്ങളെ ലക്ഷ്യംവച്ചുള്ള ഇന്ത്യയുടെ തിരിച്ചടിക്കും പിന്നാലെ ഒന്നരഡസനോളം ചാരന്‍മാരാണ് ഇന്ത്യയിലെ വിവിധ ഏജന്‍സികള്‍ അറസ്റ്റ്‌ചെയ്തത്.

അതേസമയം, ചാരക്കേസില്‍ അറസ്റ്റിലായ ഹരിയാന സ്വദേശിയായ ട്രാവല്‍ വ്‌ളോഗര്‍ ജ്യോതി മല്‍ഹോത്രയുടെ ജുഡീഷ്യല്‍ കസ്റ്റഡി രണ്ടാഴ്ചത്തേക്ക് കൂടി നീട്ടി. കസ്റ്റഡി കാലാവധി അവസാനിച്ചതോടെ 33 കാരിയായ ജ്യോതിയെ ഇന്നലെ വിഡിയോ കോണ്‍ഫ്രന്‍സ് വഴിയാണ് ജില്ലാ കോടതിയില്‍ ഹാജരാക്കിയത്. ജാമ്യം ആവശ്യപ്പെട്ടെങ്കിലും അതു തള്ളിയാണ് കോടതി ഇവരെ അടുത്തമാസം ഏഴുവരെ കസ്റ്റഡിയില്‍ വിട്ടത്. മെയ് 16നാണ് ജ്യോതിയെ അറസ്റ്റ്‌ചെയ്തത്. രാജ്യത്തെ വന്‍ ചാരശൃംഖലയെക്കുറിച്ചുള്ള വിവരങ്ങള്‍ കൂടിയാണ് ജ്യോതിയുടെ അറസ്‌റ്റോടെ പുറത്തുവന്നത്. ട്രാവല്‍ വ്‌ളോഗര്‍മാരെ ഉപയോഗിച്ച് പാകിസ്ഥാന്‍ രാജ്യത്തു വന്‍ ചാരശൃംഖല കെട്ടിപ്പടുത്തതായും കണ്ടെത്തുകയുണ്ടായി.

Two people have been arrested for allegedly being involved in espionage activities linked to Pakistan's spy agency Inter-Services Intelligence (ISI). The accused have been identified as Gurpreet Singh alias Gopy Foji and Sahil Masih alias Shali.