ന്യൂഡൽഹി: 2019ലെ ബാലാകോട്ട് വ്യോമാക്രമണത്തിനിടെ ഇന്ത്യൻ വ്യോമസേനയുടെ വിങ് കമാൻഡർ അഭിനന്ദൻ വർധമാനെ പിടികൂടിയ പാകിസ്ഥാൻ സൈന്യത്തിലെ മേജർ സയ്യിദ് മോയിസ് അബ്ബാസ് ഷാ, തെഹ്‌രിക്-ഇ-താലിബാൻ പാകിസ്ഥാൻ (ടിടിപി) ഭീകരരുമായുള്ള ഏറ്റുമുട്ടലിൽ കൊല്ലപ്പെട്ടു. പാകിസ്ഥാന്റെ സ്പെഷ്യൽ സർവീസ് ഗ്രൂപ്പിന്റെ (എസ്എസ്ജി) ആറാം കമാൻഡോ ബറ്റാലിയനിൽ അംഗമായിരുന്നു 37 വയസ്സുള്ള മോയിസ് അബ്ബാസ്. ഖൈബർ പഖ്തൂൺഖ്വാ പ്രവിശ്യയിലെ സൗത്ത് വസീറിസ്ഥാൻ ജില്ലയിലെ സരറോഗ മേഖലയിൽ നടന്ന രഹസ്യ ഓപ്പറേഷനിടെയാണ് സംഭവം.

പാക്-അഫ്ഗാൻ അതിർത്തിയിൽ സജീവമായ ടിടിപി ഭീകരരുമായുള്ള ഏറ്റുമുട്ടലിൽ 11 ഭീകരർ കൊല്ലപ്പെടുകയും ഏഴുപേർക്ക് പരിക്കേൽക്കുകയും ചെയ്തു. മേജർ മോയിസ് അബ്ബാസിനൊപ്പം 27 വയസ്സുള്ള ലാൻസ് നായിക് ജിബ്രാൻ ഉള്ളയും ഈ ഏറ്റുമുട്ടലിൽ കൊല്ലപ്പെട്ടു. പാകിസ്ഥാൻ സൈന്യത്തിന്റെ മാധ്യമ വിഭാഗമായ ഇന്റർ-സർവീസസ് പബ്ലിക് റിലേഷൻസ് (ഐഎസ്പിആർ) ആണ് ഇക്കാര്യം സ്ഥിരീകരിച്ചത്.

2019 ഫെബ്രുവരി 14ന് ജമ്മു കശ്മീരിലെ പുൽവാമയിൽ 40 ഇന്ത്യൻ സൈനികർ കൊല്ലപ്പെട്ട ഭീകരാക്രമണത്തിന് 12 ദിവസത്തിന് ശേഷം, ഫെബ്രുവരി 26ന് പാകിസ്ഥാനിലെ ഖൈബർ പഖ്തുഗ്വയിലെ ബാലാകോട്ടിലെ ഭീകര പരിശീലന കേന്ദ്രം ഇന്ത്യൻ വ്യോമസേന തകർത്തിരുന്നു. ഇതിന് പിന്നാലെ, ഫെബ്രുവരി 27ന് പാകിസ്ഥാൻ വ്യോമസേന ഇന്ത്യൻ സൈനിക കേന്ദ്രങ്ങളെ ലക്ഷ്യമിട്ട് പ്രത്യാക്രമണം നടത്തി. ഈ വ്യോമയുദ്ധത്തിനിടെ, ശ്രീനഗറിലെ 51 സ്ക്വാഡ്രണിൽ നിന്നുള്ള അഭിനന്ദൻ വർധമാൻ പറത്തിയ മിഗ്-21 ബൈസൺ വിമാനം പാകിസ്ഥാൻ വ്യോമസേന തകർത്തു.

വിമാനം തകർന്നതിനെ തുടർന്ന് പാരച്യൂട്ടിൽ ഇറങ്ങിയ അഭിനന്ദനെ പാകിസ്ഥാൻ സൈന്യം പാക് അധിനീത കശ്മീരിലെ ഹോറൻ ഗ്രാമത്തിൽ വെച്ച് പിടികൂടി. അഭിനന്ദൻ ഒരു പാകിസ്ഥാൻ എഫ്-16 വിമാനം വീഴ്ത്തിയതിന് ശേഷമാണ് തന്റെ വിമാനം തകർന്നതെന്ന് ഇന്ത്യൻ വ്യോമസേന പിന്നീട് സ്ഥിരീകരിച്ചു. ഇന്ത്യയുടെ ശക്തമായ നയതന്ത്ര ഇടപെടലുകളും യുദ്ധമുന്നറിയിപ്പും മൂലം, പാകിസ്ഥാൻ പ്രധാനമന്ത്രി ഇമ്രാൻ ഖാൻ അഭിനന്ദനെ "സമാധാന സന്ദേശ"മായി വിട്ടയക്കുമെന്ന് പ്രഖ്യാപിച്ചു.

58 മണിക്കൂറിനുള്ളിൽ, 2019 ഫെബ്രുവരി 28ന് രാത്രി അട്ടാരി-വാഗ അതിർത്തി വഴി അഭിനന്ദൻ ഇന്ത്യയിലേക്ക് മടങ്ങിയെത്തി. 2021ൽ ഗ്രൂപ്പ് ക്യാപ്റ്റനായി സ്ഥാനക്കയറ്റം ലഭിച്ച അഭിനന്ദൻ വർധമാനെ രാജ്യം വീർ ചക്ര നൽകി ആദരിച്ചു.

Major Syed Moiz Abbas Shah, a Pakistani officer who captured Indian Air Force pilot Wing Commander Abhinandan Varthaman in 2019 after the Balakot airstrike, was killed in a clash with Tehreek-e-Taliban Pakistan (TTP) militants in South Waziristan, Khyber Pakhtunkhwa. The intelligence-based operation killed 11 terrorists, but Shah and another soldier also died.