വാഷിങ്ടൺ: ചൈനയുടെ സഹായത്തോടെ അമേരിക്ക വരെ എത്താൻ ശേഷിയുള്ള ഭൂഖണ്ഡാന്തര ബാലിസ്റ്റിക് മിസൈൽ (ഐസിബിഎം) രഹസ്യമായി വികസിപ്പിക്കാൻ പാകിസ്ഥാൻ ശ്രമിക്കുന്നതായി യുഎസ് രഹസ്യാന്വേഷണ റിപ്പോർട്ട്. ഇന്ത്യയുടെ ഓപ്പറേഷൻ സിന്ദൂർ പാകിസ്ഥാൻ സൈന്യത്തിന് തിരിച്ചടി നൽകിയതിന് പിന്നാലെയാണ് ഈ നീക്കം. ഇന്ത്യയുമായും അമേരിക്കയുമായും സംഘർഷ സാധ്യത മുന്നിൽക്കണ്ട്, ചൈനയുടെ സാങ്കേതിക സഹായത്തോടെ പാകിസ്ഥാൻ തങ്ങളുടെ ആയുധശേഖരം നവീകരിക്കുകയാണെന്ന് റിപ്പോർട്ട് വ്യക്തമാക്കുന്നു.

പാകിസ്ഥാൻ തങ്ങളുടെ ആണവായുധ പരിപാടി ഇന്ത്യയെ പ്രതിരോധിക്കാനാണെന്ന് അവകാശപ്പെട്ടെങ്കിലും, അമേരിക്ക വരെ എത്താൻ കഴിയുന്ന ഭൂഖണ്ഡാന്തര ബാലിസ്റ്റിക് മിസൈലിന്റെ വികസനം യുഎസിന് വെല്ലുവിളിയാണെന്നാണ് വിലയിരുത്തൽ. ഇത്തരമൊരു മിസൈൽ വിജയകരമായി വികസിപ്പിച്ചാൽ, പാകിസ്ഥാനെ ആണവ എതിരാളിയായി അമേരിക്ക കണക്കാക്കേണ്ടിവരും. റഷ്യ, ചൈന, ഉത്തരകൊറിയ എന്നിവയാണ് നിലവിൽ യുഎസിന്റെ ആണവ എതിരാളികളായ രാജ്യങ്ങൾ.

ഈ മിസൈൽ വികസനം പാകിസ്ഥാന്‍റെ ആണവ ശേഷി വർധിപ്പിക്കാനും, അമേരിക്കയുടെ സാധ്യമായ പ്രതിരോധ ആക്രമണങ്ങളോ ഇന്ത്യ-പാക് സംഘർഷത്തിൽ യുഎസിന്റെ ഇടപെടലോ തടയാനുള്ള ശ്രമമാണെന്നും റിപ്പോർട്ട് ചൂണ്ടിക്കാട്ടുന്നു. 5,500 കിലോമീറ്ററിൽ കൂടുതൽ ദൂരപരിധിയുള്ള ഐസിബിഎം, ആണവ, പരമ്പരാഗത ആയുധങ്ങൾ വഹിക്കാൻ ശേഷിയുള്ളതാണ്. പാകിസ്ഥാന്റെ ദീർഘദൂര മിസൈൽ പദ്ധതിയിൽ യുഎസ് ആശങ്ക പ്രകടിപ്പിക്കുകയും, ഇതിന്റെ ഭാഗമായി പാകിസ്ഥാന്റെ നാഷണൽ ഡവലപ്മെന്റ് കോംപ്ലക്സിനെതിരെ ഉപരോധം ഏർപ്പെടുത്തുകയും ചെയ്തിട്ടുണ്ട്.

U.S. intelligence reports indicate Pakistan is developing a nuclear-armed intercontinental ballistic missile (ICBM) with China's support, potentially capable of striking the U.S. This development, spurred by tensions with India post-Operation Sindoor, could lead Washington to designate Pakistan as a nuclear adversary, reshaping U.S.-Pakistan relations. The missile program aims to deter U.S. intervention and enhance Pakistan's strategic capabilities, raising global nuclear concerns.