തൃശൂർ: കൊടുങ്ങല്ലൂർ എടത്തിരുത്തിയിൽ വീട്ടിൽ അതിക്രമിച്ച് കയറി ഗൃഹനാഥനെ ആക്രമിച്ച് കാർ കവർന്ന കേസിൽ അന്തർജില്ലാ രാസലഹരി വിൽപ്പന സംഘത്തിലെ ദമ്പതികൾ ഉൾപ്പെടെ അഞ്ച് പേർ അറസ്റ്റിൽ. മലപ്പുറം അന്തിയൂർകുന്ന് സ്വദേശി മുബഷിർ, മലപ്പുറം പുളിക്കൽ സ്വദേശിനി തഫ്സീന, കോഴിക്കോട് ബേപ്പൂർ നാടുവട്ടം സ്വദേശികളായ അസ്ലം, സലാം, മനു എന്നിവരെയാണ് കയ്പമംഗലം പൊലീസ് അറസ്റ്റ് ചെയ്തത്.

2025 ജൂൺ 24-ന് പുലർച്ചെ 3:30-ന് എടത്തിരുത്തി ചൂലൂർ സ്വദേശി മുഹമ്മദ് ജാസിമിന്റെ വീട്ടിൽ പ്രതികൾ അതിക്രമിച്ച് കടന്നു. വീട്ടിൽ നിർത്തിയിട്ടിരുന്ന ജാസിമിന്റെ സ്വിഫ്റ്റ് ഡിസയർ കാറിന്റെ പൂട്ട് തുറക്കാൻ ശ്രമിച്ചപ്പോൾ കാറിന്റെ അലാറം മുഴങ്ങി. ശബ്ദം കേട്ട് പുറത്തെത്തിയ ജാസിമിനെ തടയാൻ ശ്രമിച്ചപ്പോൾ പ്രതികൾ ജാസിമിന്റെ കാലിലൂടെ കാറിന്റെ ടയർ കയറ്റിയിറക്കുകയും ഭീഷണിപ്പെടുത്തുകയും ചെയ്തു.

സംഭവത്തിന് ശേഷം രക്ഷപ്പെട്ട പ്രതികളെ പിടികൂടാൻ മറ്റ് ജില്ലകളിലേക്ക് വിവരം കൈമാറിയതിന്റെ അടിസ്ഥാനത്തിൽ കോഴിക്കോട് തേഞ്ഞിപ്പാലം പൊലീസ് അവരെ കാറിനൊപ്പം കസ്റ്റഡിയിൽ എടുത്തു. തുടർന്ന് തേഞ്ഞിപ്പാലത്ത് നിന്ന് കയ്പമംഗലം പൊലീസ് സ്റ്റേഷനിലെത്തിച്ച് അറസ്റ്റ് രേഖപ്പെടുത്തി.

മുബഷിർ, തഫ്സീന എന്നിവർ 2024-ൽ അരീക്കോട്, പെരിന്തൽമണ്ണ പൊലീസ് സ്റ്റേഷനുകളിൽ 31 ഗ്രാം എം.ഡി.എം.എ. വിൽപ്പനയ്ക്കായി കടത്തിയ കേസിലും മയക്കുമരുന്ന് ഉപയോഗിച്ച കേസിലും പ്രതികളാണ്. രാസലഹരി കടത്തിന് പരിശോധനകളിൽ നിന്ന് രക്ഷപ്പെടാൻ ദമ്പതികളായി ഒന്നിച്ചാണ് ഇവർ പ്രവർത്തിച്ചിരുന്നത്. സലാം 2020-ൽ ബേപ്പൂർ പൊലീസ് സ്റ്റേഷനിൽ കോവിഡ് കാലത്ത് നൈറ്റ് കർഫ്യു ലംഘിച്ച കേസിലെ പ്രതിയാണ്.

കയ്പമംഗലം പൊലീസ് സ്റ്റേഷൻ ഇൻസ്പെക്ടർ ബിനു എസ്., സബ് ഇൻസ്പെക്ടർമാരായ അഭിലാഷ്, മുഹമ്മദ് സിയാദ്, ഹരിഹരൻ, സി.പി.ഒ.മാരായ ജ്യോതിഷ്, വിനുകുമാർ, പ്രിയ, നീതു എന്നിവർ അന്വേഷണ സംഘത്തിൽ ഉണ്ടായിരുന്നു.

In Thrissur, five individuals, including a couple involved in interstate drug trafficking, were arrested for stealing a Swift Dezire car from Muhammad Jasim’s home in Edathiruthi. The group broke into the house at 3:30 AM, attacked Jasim, and drove over his legs while fleeing. The suspects, identified as Mubashir, Thafseen, Aslam, Salam, and Manu, were apprehended by Kaypamangalam police in Kozhikode with the stolen car.