പേരാമ്പ്ര: കോഴിക്കോട് പേരാമ്പ്രയിൽ ബീവറേജ് ഔട്ട്‌ലെറ്റിന് സമീപമുള്ള ‘ആയുഷ് സ്പാ’ എന്ന ആയുർവേദ മസാജ് കേന്ദ്രത്തിന്റെ മറവിൽ നടന്നിരുന്ന പെൺവാണിഭ കേന്ദ്രത്തിൽ പൊലീസ് റെയ്ഡ്. നാല് സ്ത്രീകൾ ഉൾപ്പെടെ എട്ട് പേർ അറസ്റ്റിലായി. മറ്റ് സംസ്ഥാനങ്ങളിൽ നിന്നുള്ള സ്ത്രീകളെ എത്തിച്ചാണ് സ്ഥാപനം പ്രവർത്തിച്ചിരുന്നതെന്ന് പൊലീസ് വെളിപ്പെടുത്തി.

റെയ്ഡിനെത്തിയ പൊലീസ് സ്ഥാപനത്തിൽ ഇടപാടുകാർ ഉൾപ്പെടെയുള്ളവരെ കണ്ടെത്തി. സ്ഥാപനത്തിന്റെ മാനേജരായ ചെമ്പനോട സ്വദേശി ആന്റോ ഉൾപ്പെടെയുള്ളവരെ കസ്റ്റഡിയിലെടുത്തു. മസാജിന്റെ പേര് പറഞ്ഞ് പെൺവാണിഭമാണ് നടന്നിരുന്നതെന്ന് പൊലീസ് വ്യക്തമാക്കി. പാലക്കാട് ആലത്തൂർ സ്വദേശി കൃഷ്ണദാസിന്റെ ഉടമസ്ഥതയിലാണ് സ്ഥാപനം.

ഓൺലൈൻ വഴി ഇടപാടുകാരെ ആകർഷിച്ചിരുന്ന സ്ഥാപനത്തിൽ ദിനംപ്രതി നിരവധി പേർ എത്തിയിരുന്നതായി പൊലീസ് പറയുന്നു. 1,000 രൂപ മുതൽ തുടങ്ങുന്ന മസാജിന്റെ തരം മാറുമ്പോൾ തുക കൂടുന്നതായിരുന്നു രീതി. അറസ്റ്റിലായവരെ സ്റ്റേഷനിലേക്ക് കൊണ്ടുപോകുന്നതിനിടെ, സ്ഥാപനത്തിനെതിരെ മുമ്പും പരാതികൾ ഉയർന്നിട്ടും നടപടിയെടുക്കാത്തതിൽ പ്രതിഷേധിച്ച് നാട്ടുകാർ രംഗത്തെത്തി.

കൂടുതൽ പൊലീസിനെ വിന്യസിച്ചാണ് പ്രതികളെ പേരാമ്പ്ര പൊലീസ് സ്റ്റേഷനിലേക്ക് മാറ്റിയത്. കേസിൽ തുടർ അന്വേഷണം നടന്നുവരുന്നു.

Kozhikode police raided 'Ayush Spa' near Perambra’s beverage outlet, uncovering a prostitution racket operating under the guise of Ayurvedic massage. Eight people, including four women from other states and the manager, were arrested. The spa, owned by Krishnadas from Alathur, Palakkad, attracted clients online with massages starting at ₹1,000.