ഇന്നേക്ക് 50 വര്‍ഷം മുമ്പ്, കൃത്യമായി പറഞ്ഞാല്‍ 1975 ജൂണ്‍ 25നാണ് അടിയന്തരാവസ്ഥ പ്രഖ്യാപിച്ചത്. ലോകത്തെ ഏറ്റവും വലിയ ജനാധിപത്യ രാജ്യമായ ഇന്ത്യയില്‍, അവിടത്തെ ഏറ്റവും വലുതും പ്രായംചെന്നതുമായ ജനാധിപത്യപാര്‍ട്ടി ഭരിക്കുമ്പോഴുണ്ടായ ജനാധിപത്യ ഹത്യ എന്ന നിലയിലാണ് അടിയന്തരാവസ്ഥ ഇന്നും സ്മരിക്കപ്പെടുന്നത്.
പ്രതികരിക്കാനും പ്രതിഷേധിക്കാനും അവസരങ്ങള്‍ നിഷേധിക്കപ്പെട്ട, വ്യക്തിസ്വാതന്ത്ര്യം അടിച്ചമര്‍ത്തപ്പെട്ട കറുത്ത 21 മാസങ്ങള്‍.! 
മനുഷ്യാവകാശങ്ങളുടെ സമ്പൂര്‍ണ ലംഘനങ്ങളുടെ സമയംകൂടിയായിരുന്നു അത്. 
ഇന്ത്യ കണ്ട എക്കാലത്തെയും മികച്ച, കരുത്തുറ്റ പ്രധാനമന്ത്രിമാരിലൊരാളെന്ന ഇന്ദിരാഗാന്ധിയുടെ പ്രതിച്ഛായക്ക് കരിനിഴല്‍ വീഴ്ത്തിയ പ്രഖ്യാപനം. 
പൊലിസ് മുറകളുടെ കിരാത മര്‍ദനമുറകള്‍ക്ക് കേരളവും സാക്ഷ്യംവഹിച്ചു. 
പാര്‍ട്ടിചരിത്രത്തിലെ കറുത്ത അധ്യായം തെറ്റായിരുന്നുവെന്ന് പറയാന്‍ ഇന്ദിരാഗാന്ധിയുടെ കൊച്ചുമകനായ കോണ്‍ഗ്രസിന്റെ മുന്‍ അധ്യക്ഷന്‍ രാഹുല്‍ ഗാന്ധി ധൈര്യവും മാന്യതയും കാട്ടി. 
50 വര്‍ഷങ്ങള്‍ക്ക് ശേഷം ഇന്ന് പ്രഖ്യാപിക്കാതെയും പ്രസിഡന്റ് ഔദ്യോഗികമായി ഒപ്പുചാര്‍ത്താതെയും 1970കളുടെ മധ്യത്തിലെതിന് സമാനമായ സാഹചര്യമാണ്. പ്രതിപക്ഷത്തെ, വ്യക്തിസ്വാന്ത്ര്യത്തെ, അഭിപ്രായസ്വാതന്ത്ര്യത്തെ തടയുന്ന, അപ്രഖ്യാപിത അടിയന്തരാവസ്ഥ. 
1975ല്‍നിന്ന് വ്യത്യസ്തമായി രാഷ്ട്രസ്ഥാപനങ്ങള്‍പോലും ഭരണകൂടം നിയന്ത്രിക്കപ്പെടുന്ന ഘട്ടത്തിലാണ് അടിയന്തരാവസ്ഥയുടെ ഒരുവാര്‍ഷികം കൂടി എത്തുന്നത്.