ലീഡ്സ്: ഇംഗ്ലണ്ടിനെതിരായ അഞ്ച് ടെസ്റ്റ് മത്സരങ്ങളുടെ പരമ്പരയിലെ ആദ്യ മത്സരത്തിൽ ഇന്ത്യ പരാജയപ്പെട്ടിരുന്നു. അഞ്ച് വിക്കറ്റുകൾക്കായിരുന്നു ഇംഗ്ലണ്ട് ഇന്ത്യയെ വീഴ്ത്തിയത്. മത്സരത്തിൽ ഇന്ത്യ ഉയർത്തിയ 371 റൺസ് വിജയലക്ഷ്യം ഇംഗ്ലണ്ട് അനായാസമായി മറികടക്കുകയായിരുന്നു. മത്സരത്തിൽ ഇന്ത്യയ്ക്കുവേണ്ടി അഞ്ച് സെഞ്ച്വറികൾ പിറവിയെടുത്തിട്ടും തോൽക്കാൻ ആയിരുന്നു ഇന്ത്യയുടെ വിധി. ടെസ്റ്റ് ക്രിക്കറ്റിന്റെ ചരിത്രത്തിൽ തന്നെ ഇതാദ്യമായാണ് ഒരു മത്സരത്തിൽ അഞ്ച് സെഞ്ച്വറികൾ നേടിയിട്ടും ഒരു ടീം പരാജയപ്പെടുന്നത്.

 ഒന്നാം ഇന്നിംഗ്സിൽ ക്യാപ്റ്റൻ ശുഭ്മൻ ഗിൽ, റിഷബ് പന്ത്, യശ്വസി ജെയ്‌സ്വാൾ എന്നിവരും രണ്ടാം ഇന്നിംഗ്സിൽ കെഎൽ രാഹുലും പന്തുമാണ് സെഞ്ച്വറികൾ നേടിയത്. ഒന്നാം ഇന്നിംഗ്‌സിൽ178 പന്തിൽ 134 റൺസ് നേടിയാണ് പന്ത് തിളങ്ങിയത്. 12 ഫോറുകളും ആറ് സിക്സുകളും അടങ്ങുന്നതായിരുന്നു പന്തിന്റെ ഇന്നിംഗ്സ്. ഗിൽ 227 പന്തിൽ 19 ഫോറുകളും ഒരു സിക്സും ഉൾപ്പെടെ 147 റൺസും നേടി.

യശ്വസി ജെയ്‌സ്വാൾ 158 പന്തിൽ 101 റൺസും നേടി. 16 ഫോറുകളും ഒരു സിക്സും അടങ്ങുന്നതായിരുന്നു താരത്തിന്റെ തകർപ്പൻ ഇന്നിങ്‌സ്. രണ്ടാം ഇന്നിങ്സിൽ 247 പന്തിൽ 18 ഫോറുകൾ ഉൾപ്പെടെ 137 റൺസാണ് രാഹുൽ അടിച്ചെടുത്തത്. മറുഭാഗത്ത് 140 പന്തിൽ 118 റൺസ് നേടിയാണ് പന്ത് തിളങ്ങിയത്. 15 ഫോറുകളും മൂന്ന് സിക്സുകളും അടങ്ങുന്നതായിരുന്നു പന്തിന്റെ തകർപ്പൻ ഇന്നിങ്സ്.

രണ്ടാം ഇന്നിഗ്സിൽ സെഞ്ച്വറി നേടിയ ബെൻ ഡക്കറ്റിന്റെ കരുത്തിലാണ് ഇംഗ്ലണ്ട് വിജയം സ്വന്തമാക്കിയത്. 170 പന്തിൽ നിന്നും 21 ഫോറുകളും ഒരു സിക്സും ഉൾപ്പെടെ 149 റൺസ് നേടിയാണ് താരം തിളങ്ങിയത്. ജോ റൂട്ട് അർദ്ധ സെഞ്ച്വറി നേടിയും ടീമിന്റെ വിജയത്തിൽ നിർണായകമാണ്. 84 പന്തിൽ പുറത്താവാതെ 53 റൺസ് ആണ് റൂട്ട് സ്വന്തമാക്കിയത്. ആറ് ഫോറുകളാണ് താരത്തിന്റെ ബാറ്റിൽ നിന്നും പിറന്നത്.

Indias record of a huge defeat fell on their heads for the first time in 147 years of history