കോട്ടക്കല്‍: എട്ടുവര്‍ഷമായി ഒളിവിലായിരുന്ന മോഷ്ടാവ് പിടിയിലായി. മാറാക്കര പയ്യാപന്ത അബ്ദുല്‍ ഖാദര്‍ (സീസ് ഖാദര്‍-42) ആണ് അറസ്റ്റിലായത്. എട്ടു വര്‍ഷമായി ഒളിവിലായിരുന്ന ഇയാള്‍ വാഹന മോഷണം, ടയര്‍, ചെമ്പ് കമ്പി മോഷണം, അമ്പലങ്ങളിലെ കവര്‍ച്ച തുടങ്ങിയ വിവിധ മോഷണ കേസുകളില്‍ പ്രതിയാണ്. കഴിഞ്ഞ ദിവസം വീടിന്റെ പരിസരത്ത് നിന്ന് കോട്ടക്കല്‍ പൊലിസാണ് ഇയാളെ പിടികൂടിയത്. 2008ല്‍ കോട്ടക്കലിലെ ഒരു പഞ്ചര്‍ ഷോപ്പില്‍നിന്ന് ഒന്നര ലക്ഷം രൂപ വിലവരുന്ന ടയര്‍ റീസോളിംഗ് മൊഡ്യൂള്‍ മോഷ്ടിച്ച കേസിലാണ് പൊലിസ് അറസ്റ്റ് രേഖപ്പെടുത്തിയിരിക്കുന്നത്. മലപ്പുറം ജില്ലക്ക് പുറമെ കോഴിക്കോട്, തൃശൂര്‍, പാലക്കാട് ജില്ലകളിലെ പൊലിസ് സ്റ്റേഷനുകളിലും ഇയാള്‍ക്കെതിരെ കേസുണ്ടെന്നും കൂട്ടുപ്രതികളെ നേരത്തെ പിടികൂടിയതാണെന്നും എസ്.ഐ ആര്‍ വിനോദ് പറഞ്ഞു. പ്രതിയെ റിമാന്‍ഡ് ചെയ്തു.