തിരുവനന്തപുരം: കേരള സർവകലാശാലയുടെ സെനറ്റ് ഹാളിൽ ശ്രീ പദ്മനാഭ സേവാസമിതി സംഘടിപ്പിച്ച ‘അടിയന്തരാവസ്ഥയുടെ 50 വർഷങ്ങൾ’ എന്ന പരിപാടിയിൽ കാവിക്കൊടിയേന്തിയ ഭാരതാംബയുടെ ചിത്രം സ്ഥാപിച്ചത് വിവാദവും സംഘർഷവും സൃഷ്ടിച്ചു. മതചിഹ്നമെന്ന് ആരോപിച്ച് സർവകലാശാല രജിസ്ട്രാർ പരിപാടിക്ക് അനുമതി നിഷേധിച്ചെങ്കിലും, പ്രതിഷേധങ്ങൾ അവഗണിച്ച് ഗവർണർ രാജേന്ദ്ര അർലേകർ പരിപാടിയിൽ പങ്കെടുത്തു.

ALSO READ: കാവിക്കൊടിയേന്തിയ ഭാരതാംബ ചിത്രം; കേരള സർവകലാശാലയിൽ നാടകീയ രംഗങ്ങൾ; പരിപാടി റദാക്കിയെന്ന് രജിസ്ട്രാർ, റദാക്കിയില്ലെന്ന് സംഘാടകർ

സെനറ്റ് ഹാളിന് പുറത്ത് എസ്എഫ്ഐ, കെഎസ്‌യു പ്രവർത്തകർ പ്രതിഷേധിച്ചത് പൊലീസുമായുള്ള ഏറ്റുമുട്ടലിൽ കലാശിച്ചു. സിപിഎം നേതാക്കളായ സിൻഡിക്കേറ്റ് അംഗങ്ങളും പ്രതിഷേധവുമായി രംഗത്തെത്തി. ബിജെപി-ആർഎസ്എസ് അനുകൂലികൾ മറുവശത്ത് തടിച്ചുകൂടി, സംഘർഷാവസ്ഥ ഉടലെടുത്തു. സർവകലാശാല ചട്ടങ്ങൾ ലംഘിച്ചാണ് ചിത്രം സ്ഥാപിച്ചതെന്ന് രജിസ്ട്രാറും പൊലീസും ചൂണ്ടിക്കാട്ടി, ചിത്രം നീക്കണമെന്ന് ആവശ്യപ്പെട്ടെങ്കിലും സംഘാടകർ വഴങ്ങിയില്ല.

സർവകലാശാലയിൽ മതചിഹ്നങ്ങൾ പ്രദർശിപ്പിക്കുന്നത് ചട്ടവിരുദ്ധമാണെന്നും പരിപാടി അനുവദിക്കില്ലെന്നും ഇടത് പ്രവർത്തകർ വ്യക്തമാക്കി. എന്നാൽ, ഗവർണർ പരിപാടിയിൽ പങ്കെടുക്കുമെന്ന് വ്യക്തമാക്കി വേദിയിലെത്തി. ആർഎസ്എസ് നേതാവ് കാ. ഭാ. സുരേന്ദ്രന്റെ പുസ്തക പ്രകാശനവും ചടങ്ങിന്റെ ഭാഗമായി നടന്നു.

സംഘാടകർക്ക് ഹാൾ ബുക്ക് ചെയ്യുമ്പോൾ തന്നെ നിബന്ധനകൾ വ്യക്തമാക്കിയിരുന്നുവെന്ന് രജിസ്ട്രാർ വ്യക്തമാക്കി. സംഘർഷ സാഹചര്യം കണക്കിലെടുത്ത് ഗവർണർ പങ്കെടുക്കരുതെന്ന് രാജ്ഭവനെ അറിയിച്ചിരുന്നു, എന്നിട്ടും പരിപാടി നടന്നു.

A saffron-flagged Bharat Mata portrait at a Kerala University Senate Hall event, organized by Sri Padmanabha Seva Samiti, triggered clashes. Despite the registrar's objection over religious symbolism, Governor Rajendra Arlekar attended, defying SFI and KSU protests. BJP-RSS supporters clashed with police, escalating tensions.