പാലക്കാട്: പാലക്കാട് തച്ചനാട്ടുകരയില്‍ ഒന്‍പതാം ക്ലാസുകാരി ആശീര്‍ നന്ദ ജീവനൊടുക്കിയത് അധ്യാപകരുടെ മാനസിക പീഡനത്തെ തുടര്‍ന്നാണെന്ന് ബന്ധുക്കള്‍. ഒന്നര മാര്‍ക്ക് കുറഞ്ഞത്തിന്റെ പേരില്‍ അധ്യാപകര്‍ മാനസികമായി പീഡിപ്പിച്ചുവെന്ന് അച്ഛന്‍ പ്രശാന്തും ബന്ധുക്കളും ആരോപിച്ചു. ശ്രീകൃഷ്ണപുരം സെന്റ് ഡൊമിനിക് സ്‌കൂളിനെതിരെയാണ് പരാതി. 

ഒന്‍പതാം ക്ലാസില്‍ ക്ലാസ് തുടങ്ങി മാസങ്ങള്‍ പിന്നിട്ട ശേഷം ഡിവിഷന്‍ മാറ്റിയിരുത്തി. സ്വന്തം കൈപ്പടയില്‍ ഇനി മാര്‍ക്ക് കുറഞ്ഞാല്‍ എട്ടാം ക്ലാസില്‍ തന്നെ പഠനം തുടരാം എന്ന് നിര്‍ബന്ധിച്ച് എഴുതി വാങ്ങിച്ചുവെന്നും ബന്ധുക്കള്‍ ആരോപിച്ചു. മാതാപിതാക്കളുടെ മുന്‍പില്‍ വച്ചാണ് ആശിര്‍ നന്ദയെക്കൊണ്ട് എഴുതി വാങ്ങിച്ചതെന്നും ബന്ധുക്കള്‍ പറഞ്ഞു. 

സംഭവത്തില്‍ ജില്ലാ കലക്ടര്‍ റിപ്പോര്‍ട്ട് ആവശ്യപ്പെട്ടു. ജില്ലാ വിദ്യാഭ്യാസ വകുപ്പ് ഓഫീസിലെ ഉദ്യോഗസ്ഥര്‍ സ്‌കൂളിലെത്തി തെളിവെടുത്തു. അതേസമയം സ്‌കൂളില്‍ ഒരു പീഡനവും നടന്നിട്ടില്ലെന്നാണ് പ്രിന്‍സിപ്പല്‍ നല്‍കുന്ന വിശദീകരണം. വിദ്യാര്‍ഥിനിക്ക് കണക്ക് പരീക്ഷയില്‍ മാര്‍ക്ക് കുറവായതിനാല്‍ മറ്റൊരു ക്ലാസ്സിലേക്ക് മാറ്റിയിരുന്നു. അത് സത്യമാണെന്നും സ്‌കൂള്‍ മാനേജ്മന്റ് വ്യക്തമാക്കി.

ചോളോട് സ്വദേശിനിയായ ആശീര്‍ നന്ദയെ കഴിഞ്ഞ ദിവസമാണ് തൂങ്ങിമരിച്ച നിലയില്‍ കണ്ടെത്തിയത്.