മനുഷ്യ ശരീരത്തിലെ പ്രധാനപ്പെട്ട അവയവമാണ് കരള്‍. ലോകത്ത് ആകെ മരണങ്ങളില്‍ നാല് ശതമാനം ആളുകളും കരള്‍ രോഗം ബാധിച്ചിരിക്കുന്നവരാണ്. കരള്‍ രോഗങ്ങള്‍ മൂലം എല്ലാ വര്‍ഷവും രണ്ട് ദശലക്ഷം മനുഷ്യര്‍ മരണപ്പെടുന്നുമുണ്ട്. ഡിടോക്‌സിഫിക്കേഷന്‍, മെറ്റബോളിസം എന്നിങ്ങനെ ശരീരത്തിന് ആവശ്യമായ പ്രവര്‍ത്തനങ്ങള്‍ നടത്തുന്ന അവയവമാണ് കരള്‍. ഉദാസീനമായ ജീവിതശൈലി, അനാരോഗ്യകരമായ ഭക്ഷണക്രമം, മദ്യപാനം എന്നിവയൊക്കെ കരള്‍ രോഗങ്ങള്‍ക്ക് കാരണമാകുന്നുണ്ട്. കരളിന്റെ പ്രവര്‍ത്തനം വര്‍ധിപ്പിക്കാന്‍ സഹായിക്കുന്ന നാല് പാനീയങ്ങളെ കുറിച്ചു നമുക്ക് പരിചയപ്പെടാം.

കാപ്പി

കാപ്പി എന്നു കേള്‍ക്കുമ്പോള്‍ ആദ്യം ഓര്‍മവരുക കഫീന്‍ ആണ്. എന്നാല്‍ കാപ്പിയില്‍ ആന്റി ഓക്‌സിഡന്റുകളും മറ്റു വസ്തുക്കളും അടങ്ങിയിട്ടുണ്ട്. ഇത് ആന്തരിക വീക്കം കുറയ്ക്കുകയും രോഗങ്ങളില്‍ നിന്നു സംരക്ഷിക്കുകയും ചെയ്യുമെന്ന് പോഷകാഹാര വിദഗ്ധര്‍ പറയുന്നു. കാപ്പി നിങ്ങള്‍ക്ക് ഊര്‍ജം നല്‍കുന്നു. പാലും മധുരവും ചേര്‍ക്കാത്ത കട്ടന്‍ കാപ്പി നിങ്ങളുടെ ആരോഗ്യത്തെ സംരക്ഷിക്കുന്നു. മാത്രമല്ല ഹൃദയസ്തംഭനം തടയാനും സഹായിക്കുന്നു. 

കാപ്പി കുടിക്കുന്നവരില്‍ കാപ്പി കുടിക്കാത്തവരേ അപേക്ഷിച്ച് കരള്‍ എന്‍സൈമിന്റെ അളവ്  ആരോഗ്യകരമായ പരിധിയില്‍ ഉണ്ടാവാനുള്ള സാധ്യതയും കൂടുതലാണെന്ന് ഗവേഷണങ്ങള്‍ പറയുന്നു. അതുപോലെ പക്ഷാഘാതം വന്‍കുടല്‍ കാന്‍സര്‍ അല്‍ഷിമേഴ്‌സ് രോഗം എന്നിവ വരാനുള്ള സാധ്യതയും കുറവാണ്. 

ഫാറ്റി ലിവര്‍, ലിവര്‍ ക്യാന്‍സര്‍ എന്നിവയുള്‍പ്പെടെ എല്ലാത്തരം കരള്‍ രോഗങ്ങളുടെയും സാധ്യത കുറയ്ക്കുന്ന ഒരു പാനീയമാണ് കാപ്പി. കുടിക്കുമ്പോള്‍ പഞ്ചസാരയും പാലും ഒഴിവാക്കി കട്ടന്‍ കാപ്പി കുടിക്കുവാന്‍ ശ്രദ്ധിക്കുക.

ഗ്രീന്‍ ടീ

ശരീരഭാരം കുറയ്ക്കാനും ആരോഗ്യത്തിനുവേണ്ടിയും പലരും ഗ്രീന്‍ ടി കുടിക്കുന്നതു കാണാം. എന്നാല്‍ പതിവായി ഗ്രീന്‍ ടി കുടിക്കുന്നവരെയും കാണാം. ഗ്രീന്‍ ടിയില്‍ അമിതമായ പ്രോസസിങ് നടക്കുന്നില്ല. തേയില ഇലകളില്‍ ആവി കയറ്റി ഉണക്കി ഈര്‍പ്പം വറ്റിച്ച ശേഷം ചെറിയ തരികളോടെ നുറുക്കി എടുക്കുന്നതാണ് ഗ്രീന്‍ ടി. കെമിക്കലൊന്നും ചേര്‍ക്കാതെയുള്ള ഈ ഗ്രീന്‍ടി ആരോഗ്യത്തിന് നല്‍കുന്ന ഗുണം ചെറുതല്ല.

ഇതിലടങ്ങിയ ആന്റിഓക്‌സിഡന്റുകള്‍ ഞരമ്പുകളുടെ ആരോഗ്യം നിലനിര്‍ത്താനും സ്ട്രസ് കുറയ്ക്കാനും സഹായിക്കുന്നു. 
എന്നാല്‍ ഗുണം പോലെ തന്നെ ഇതിനു ദോഷവശങ്ങളുമുണ്ട്. ഇതില്‍ പ്രധാനപ്പെട്ടവയാണ് അനീമിയ. ഗ്രീന്‍ ടിയിലടങ്ങിയ (ഇജിസിജി) ശരീരത്തില്‍ നിന്ന് അയേണിന്റെ സാന്നിധ്യം കുറയ്ക്കാനും അയേണ്‍ ആഗിരണം ചെയ്യപ്പെടുന്നതും തടയുന്നു. കരളിലെ കൊഴുപ്പ് അടിഞ്ഞു കൂടുന്നത് കുറയ്ക്കാന്‍ ഗ്രീന്‍ ടീ സഹായിക്കും. മാത്രമല്ല നോണ്‍ ഫാറ്റി ലിവര്‍ ഡിസീസ് നിന്നും തടയുകയും ചെയ്യും. എന്നാല്‍ അമിതമായി ഗ്രീന്‍ ടീ കുടിച്ചാലും അത് കരളിനെ ബാധിക്കുമെന്നും വിദഗ്ധര്‍ പറയുന്നു.

ബീറ്റ്‌റൂട്ട് ജ്യൂസ്

ശരീരഭാരം നിയന്ത്രിക്കാന്‍ ബീറ്റ്‌റൂട്ട് ജ്യൂസ് സൂപ്പറാണ്. രക്തസമ്മര്‍ദം കുറയ്ക്കാനും ഇതിലെ ഉയര്‍ന്ന നൈട്രേറ്റ് അളവ് രക്തക്കുഴലുകളെ വികസിപ്പിച്ച് രക്തസമ്മര്‍ദത്തെ കുറയ്ക്കുന്നു. ബീറ്റ്‌റൂട്ടിലെ ബീറ്റാലൈനുകള്‍ ശക്തമായ ആന്റിഓക്‌സിഡന്റുകളായി പ്രവര്‍ത്തിക്കുകയും കോശങ്ങളെ സമ്മര്‍ദത്തില്‍ നിന്നും വീക്കങ്ങളില്‍ നിന്നും രക്ഷിക്കുകയും ചെയ്യുന്നു.  കരളിനുണ്ടാകുന്ന ഓക്‌സിഡേറ്റീവ് ഡാമേജ് കുറയ്ക്കുവാന്‍ സഹായിക്കുന്നത് ബീറ്റ്‌റൂട്ട് ജ്യൂസ് ആണ്. ഇത് കരളിലെ വീക്കത്തെയും കുറയ്ക്കുന്നതാണ്.

 നാരങ്ങാ വെള്ളം

നാരങ്ങാവെള്ളം കുടിക്കുന്നത് ദഹനത്തെ സഹായിക്കുകയും കരളിലെ വിഷം വിമുക്തമാക്കുകയും ചെയ്യുന്നു. മദ്യം മൂലമുണ്ടാകുന്ന കേടുപാടുകളില്‍ നിന്നും നാരങ്ങാ വെള്ളം കരളിനെ സഹായിക്കുന്നു. ദഹനപ്രശ്‌നങ്ങള്‍ക്ക് മികച്ച പ്രതിവിധിയാണ് നാരങ്ങാ വെള്ളം. രാവിലെ ഒരു ഗ്ലാസ് നാരങ്ങാ വെള്ളം കുടിച്ചാല്‍ വയറ്റിലെ മാലിന്യങ്ങളെ പുറത്താക്കുകയും ഗ്യാസ് കെട്ടി വയര്‍ വീര്‍ത്തിരിക്കുന്ന അവസ്ഥയെ ഇല്ലാതാക്കുകയും ചെയ്യുന്നു.

മാത്രമല്ല ഇത് നിര്‍ജലീകരണത്തെ തടയുകയും ചെയ്യുന്നു. ഇത് നിങ്ങള്‍ക്ക് പൊട്ടാസ്യം നല്‍കുന്നു. വീക്കം കുറയ്ക്കുന്നു. മാനസികാവസ്ഥ മെച്ചപ്പെടുത്തുന്നു. വൃക്കയിലെ  കല്ലുകളെ തടയാന്‍ സഹായിക്കുന്നു. ചര്‍മത്തിന്റെ ആരോഗ്യം മെച്ചപ്പെടുത്തുന്നു.