നീണ്ട 17 വർഷക്കാലത്തെ കാത്തിരിപ്പിനൊടുവിലായിരുന്നു ഇന്ത്യ 2024 ടി-20 ലോകകപ്പ് സ്വന്തമാക്കിയത്. ഫൈനൽ പോരാട്ടത്തിൽ സൗത്ത് ആഫ്രിക്കയെ വീഴ്ത്തിയായിരുന്നു ഇന്ത്യ കിരീടം ചൂടിയത് കൂടിയത്. ഇപ്പോൾ ഈ ലോകകപ്പ് ഫൈനലിലെ ഓർമ്മകളെക്കുറിച്ച് സംസാരിക്കുകയാണ് ഇന്ത്യൻ നായകൻ രോഹിത് ശർമ. ഈ ഫൈനൽ മത്സരത്തിലെ ഇന്ത്യയുടെ കളി മാറ്റിമറിച്ച താരത്തെക്കുറിച്ചും രോഹിത് സംസാരിച്ചു. ഫൈനൽ മത്സരത്തിൽ അക്സർ പട്ടേൽ നടത്തിയ പ്രകടനങ്ങളെക്കുറിച്ചായിരുന്നു രോഹിത് സംസാരിച്ചത്. ഫൈനലിലെ അക്സറിന്റെ പ്രകടനങ്ങളെക്കുറിച്ച് അധികം ആരും സംസാരിക്കുന്നില്ലെന്നും ആ ഇന്നിങ്സാണ് കളിയുടെ ഗതി മാറ്റിമറിച്ചതെന്നുമാണ് രോഹിത് പറഞ്ഞത്.

"അക്സറിന്റെ പ്രകടനങ്ങളെക്കുറിച്ച് അധികം ആരും സംസാരിക്കുന്നില്ല. എന്നാൽ അതാണ് കളിയുടെ ഗതി മാറ്റിമറിച്ചത്. ആ സമയങ്ങളിൽ 31 പന്തിൽ 47 റൺസ് നേടിയത് വളരെ നിർണായകമായിരുന്നു. ഇന്നിങ്സിൽ നന്നായി ബാറ്റ് ചെയ്യാൻ ഞങ്ങൾക്കൊരു താരത്തെ ആവശ്യമായിരുന്നു വിരാട് അത് മികച്ച രീതിയിൽ ചെയ്തു" രോഹിത് ശർമ ജിയോസ്റ്റാറിന് നൽകിയ അഭിമുഖത്തിൽ പറഞ്ഞു. 

ടൂർണമെന്റിൽ ഉടനീളം ബാറ്റിങ്ങിലും ബൗളിങ്ങിനും മികച്ച പ്രകടനം നടത്തിയ താരമായിരുന്നു അക്സർ പട്ടേൽ. 92 റൺസും ഒമ്പത് വിക്കറ്റുകളും ആയിരുന്നു താരം ഈ ടൂർണ്ണമെന്റിൽ നേടിയിരുന്നത്. മത്സരത്തിൽ വിരാടിനൊപ്പം മികച്ച കൂട്ടുകെട്ടാണ് അക്സർ പട്ടേൽ പടുത്തുയർത്തിയത്. ഇരുവരും ചേർന്ന് നാലാം വിക്കറ്റിൽ 72 റൺസിന്റെ കൂട്ടുകെട്ടാണ് ഇന്ത്യക്ക് നൽകിയത്. ഈ നിർണായകമായ റൺസ് ആയിരുന്നു ഇന്ത്യയെ മികച്ച ടോട്ടലിലേക്ക് നയിച്ചത്. കോഹ്‌ലി 59 പന്തിൽ 76 റൺസ് നേടിയാണ് തിളങ്ങിയത്. ഫൈനൽ പോരാട്ടത്തിലെ മാൻ ഓഫ് ദി മാച്ച് അവാർഡും കോഹ്‌ലിയാണ് നേടിയത്. 

മത്സരത്തിൽ ഇന്ത്യൻ ബൗളിങ്ങിൽ ഹർദിക് പാണ്ഡ്യ മൂന്ന് വിക്കറ്റുകളും ജസ്പ്രീത് ബുംറ, അർഷ്ദീപ് സിങ് എന്നിവർ രണ്ടു വീതം വിക്കറ്റുകളും നേടി ഇന്ത്യയുടെ വിജയത്തിൽ നിർണായകമായി. എട്ടു മത്സരങ്ങളിൽ നിന്നും 15 വിക്കറ്റുകൾ സ്വന്തമാക്കിയ ബുംറയായിരുന്നു  പ്ലെയർ ഓഫ് ദി ടൂർണ്ണമെന്റ് അവാർഡ് സ്വന്തമാക്കിയത്.

Rohit Sharma talks about Axar Patels performance in the 2024 T20 World Cup final