കൽപ്പറ്റ: പൂക്കോട് വെറ്ററിനറി കോളേജിൽ ആത്മഹത്യ ചെയ്ത ജെ എസ് സിദ്ധാർത്ഥന്റെ മാതാപിതാക്കൾക്ക് 7 ലക്ഷം രൂപ നഷ്ടപരിഹാരം നൽകണമെന്ന ദേശീയ മനുഷ്യാവകാശ കമ്മീഷന്റെ ഉത്തരവ് നടപ്പാക്കാത്തതിന് സംസ്ഥാന സർക്കാരിനെതിരെ മനുഷ്യാവകാശ കമ്മീഷൻ രംഗത്ത്. 2024 ഒക്ടോബർ 1-ന് നൽകിയ ഈ നിർദേശം ഇതുവരെ നടപ്പിലാക്കാത്തതിനാൽ, ജൂലൈ 10-ന് ചീഫ് സെക്രട്ടറി നേരിട്ട് ഹാജരായി വിശദീകരണം നൽകണമെന്ന് കമ്മീഷൻ ഉത്തരവിട്ടു.

2024 ഫെബ്രുവരി 18-ന് തിരുവനന്തപുരം നെടുമങ്ങാട് സ്വദേശിയായ ജെ എസ് സിദ്ധാർത്ഥനെ (20) പൂക്കോട് വെറ്ററിനറി കോളേജിലെ ഹോസ്റ്റൽ ശുചിമുറിയിൽ തൂങ്ങിമരിച്ച നിലയിൽ കണ്ടെത്തി. സിദ്ധാർത്ഥൻ അതിക്രൂരമായ റാഗിങിന് ഇരയായിരുന്നുവെന്നാണ് കണ്ടെത്തൽ. എസ്എഫ്ഐ പ്രവർത്തകർ ഉൾപ്പെടെ 18 പേർ കേസിൽ പ്രതികളാണ്. ഹോസ്റ്റലിൽ വെച്ച് സിദ്ധാർത്ഥനെ എസ്എഫ്ഐ പ്രവർത്തകർ ഉൾപ്പെടെയുള്ളവർ ക്രൂരമായി മർദിച്ചു. അടിവസ്ത്രം മാത്രം ധരിപ്പിച്ച് പരസ്യവിചാരണ നടത്തി, ബെൽറ്റുകളും മൊബൈൽ ഫോൺ ചാർജറുകളും ഉപയോഗിച്ച് അടിക്കുകയും ശരീരത്തിൽ ചവിട്ടി പരിക്കേൽപ്പിക്കുകയും ചെയ്തു.

സിദ്ധാർത്ഥന്റെ മരണം ആത്മഹത്യയായി വരുത്തിത്തീർക്കാൻ പോലീസ് ശ്രമിച്ചുവെന്നും, പ്രതികളെ രക്ഷിക്കാൻ ഹോസ്റ്റൽ വാർഡനും ഡീനും ശ്രമിച്ചുവെന്നും കുടുംബം ആരോപിച്ചു. ശക്തമായ സമ്മർദത്തെ തുടർന്നാണ് കേസിൽ നടപടികൾ ആരംഭിച്ചത്. കുടുംബത്തിന്റെ ആവശ്യപ്രകാരം കേസ് സിബിഐക്ക് കൈമാറിയെങ്കിലും, രേഖകൾ കൈമാറുന്നതിൽ താമസം വരുത്തി അന്വേഷണം വൈകിപ്പിക്കാൻ ശ്രമം നടന്നതായി ആരോപണമുണ്ട്.

കേസിലെ 19 പ്രതികൾക്ക് മണ്ണുത്തി ക്യാമ്പസിൽ തുടർപഠനത്തിന് ഹൈക്കോടതി അനുമതി നൽകിയിരുന്നു. എന്നാൽ, സിദ്ധാർത്ഥന്റെ കുടുംബം ഇതിനെതിരെ ഡിവിഷൻ ബെഞ്ചിനെ സമീപിച്ച് സ്റ്റേ വാങ്ങി.