ടോക്കിയോ: അടുത്ത 30 വർഷത്തിനുള്ളിൽ ജപ്പാൻ കടലിൽ റിക്ടർ സ്കെയിലിൽ 7-ന് മുകളിൽ തീവ്രതയുള്ള ഭൂകമ്പം ഉണ്ടാകാനുള്ള സാധ്യത 16-18% ആണെന്ന് ജാപ്പനീസ് സർക്കാർ പാനൽ മുന്നറിയിപ്പ് നൽകി. ജപ്പാനിലെ കിങ്കി മുതൽ ഹൊകുരികു വരെയുള്ള പ്രദേശങ്ങളിൽ ഈ സാധ്യത കൂടുതലാണ്. കിഴക്കൻ ഭാഗത്ത് 12-14%, പടിഞ്ഞാറൻ ഭാഗത്ത് 4-6% സാധ്യതയുണ്ടെന്ന് NHK റിപ്പോർട്ട് ചെയ്തു. ക്തമായ ഭൂകമ്പത്തോടൊപ്പം ഉയർന്ന സുനാമി തിരമാലകളും ഉണ്ടാകാമെന്ന് അദ്ദേഹം മുന്നറിയിപ്പ് നൽകി. 2024-ലെ നോട്ടോ പെനിൻസുല ഭൂകമ്പത്തെ തുടർന്ന് അവിടെ ഉടൻ വീണ്ടും ഭൂകമ്പ സാധ്യത കുറവാണെന്നും പാനൽ വ്യക്തമാക്കി.

ദ്വീപുകളിൽ 470-ലധികം ഭൂചലനങ്ങൾ

ക്യൂഷുവിന് തെക്കുള്ള ടോക്കര ദ്വീപുകളിൽ കഴിഞ്ഞ ശനിയാഴ്ച മുതൽ 470-ലധികം ഭൂചലനങ്ങൾ രേഖപ്പെടുത്തിയതായി ജപ്പാൻ കാലാവസ്ഥാ ഏജൻസി (JMA) അറിയിച്ചു. ജാപ്പനീസ് ഭൂകമ്പ സ്കെയിലിൽ 1-ന് മുകളിൽ തീവ്രതയുള്ള ഈ ഭൂചലനങ്ങളിൽ ഏറ്റവും ശക്തമായത് 5.1 തീവ്രത രേഖപ്പെടുത്തി. കൊടകരജിമ ദ്വീപിൽ ഭൂകമ്പ പ്രവർത്തനങ്ങൾ വർദ്ധിച്ചതായി JMA സ്ഥിരീകരിച്ചു. വലിയ നാശനഷ്ടങ്ങൾ റിപ്പോർട്ട് ചെയ്യപ്പെട്ടിട്ടില്ലെങ്കിലും, ജനങ്ങൾക്ക് ജാഗ്രതാ നിർദേശം നൽകിയിട്ടുണ്ട്.

"ഭൂകമ്പ പ്രവർത്തനങ്ങൾ ശക്തമാണ്. ശക്തമായ ഭൂകമ്പങ്ങൾക്ക് സാധ്യതയുള്ളതിനാൽ ജനങ്ങൾ ജാഗ്രത പാലിക്കണം," JMA മുന്നറിയിപ്പ് നൽകി. കുമാമോട്ടോ സർവകലാശാലയിലെ സമുദ്ര അഗ്നിപർവ്വത വിദഗ്ദ്ധനായ ഹിസായോഷി യോക്കോസ്, റിക്ടർ സ്കെയിലിൽ 6 വരെ തീവ്രതയുള്ള ഭൂകമ്പം ഉണ്ടാകാൻ സാധ്യതയുണ്ടെന്നും അടുത്ത ഒരാഴ്ച ജാഗ്രത വേണമെന്നും അറിയിച്ചു.

"റിംഗ് ഓഫ് ഫയർ" ഭീഷണി

പസഫിക് "റിംഗ് ഓഫ് ഫയർ" മേഖലയിൽ നാല് ടെക്റ്റോണിക് പ്ലേറ്റുകളുടെ സംഗമസ്ഥാനത്താണ് ജപ്പാൻ. ഇതിനാൽ, വർഷം തോറും 1,500 ഭൂകമ്പങ്ങൾ രാജ്യത്ത് അനുഭവപ്പെടുന്നു, ഇത് ആഗോള ഭൂകമ്പങ്ങളുടെ 18% വരും. മിക്കവയും നേരിയ തോതിലുള്ളവയാണെങ്കിലും, സ്ഥാനവും ആഴവും അനുസരിച്ച് നാശനഷ്ടങ്ങൾ വ്യത്യാസപ്പെടാം.

പ്രവചനവും ജനഭയവും

2025 ജൂലൈ 5-ന് വിനാശകരമായ സൂപ്പർ ഭൂകമ്പം ഉണ്ടാകുമെന്ന് മാംഗ കലാകാരി റിയോ തത്സുകിയുടെ "ദി ഫ്യൂച്ചർ ഐ സോ" എന്ന പുസ്തകം പ്രവചിച്ചിരുന്നു. നഗരങ്ങൾ സമുദ്രത്തിലേക്ക് വീഴുന്നതും ഭീമാകാരമായ സുനാമിയും പുസ്തകത്തിൽ പരാമർശിക്കുന്നു. ടോക്കര ദ്വീപുകളിലെ തുടർഭൂചലനങ്ങൾ ഈ പ്രവചനവുമായി ബന്ധപ്പെടുത്തി ജനങ്ങൾക്കിടയിൽ ഭീതി വർദ്ധിക്കുന്നു. എന്നാൽ, ഈ ഭൂചലനങ്ങൾ നങ്കായ് തോട്ടിലെ മെഗാ-ഭൂകമ്പത്തിന് സമാനമല്ലെന്ന് യോക്കോസ് വ്യക്തമാക്കി. 2023 സെപ്റ്റംബറിൽ ടോക്കര ദ്വീപുകളിൽ 15 ദിവസത്തിനുള്ളിൽ 346 ഭൂകമ്പങ്ങൾ രേഖപ്പെടുത്തിയിരുന്നു. 12 ടോക്കര ദ്വീപുകളിൽ 7 എണ്ണത്തിൽ 700-ലധികം ആളുകൾ താമസിക്കുന്നു, ചില ദ്വീപുകളിൽ സജീവ അഗ്നിപർവ്വതങ്ങളും ഉണ്ട്.