​ 

ഗസ്സ: ഗസ്സയിൽ പുലർച്ചെ മുതൽ ഇസ്റാഈൽ നടത്തിയ വെടിവയ്പ്പിൽ 36 ഫലസ്തീനികൾ കൊല്ലപ്പെട്ടതായി അൽ ജസീറ റിപ്പോർട്ട് ചെയ്തു. പ്രാദേശിക ആശുപത്രി വൃത്തങ്ങൾ അൽ ജസീറക്ക് നൽകിയ വിവരങ്ങളിലാണ് കൊല്ലപ്പെട്ടവരുടെ എണ്ണം രേഖപ്പെടുത്തിയത്. ഗസ്സ ഹ്യുമാനിറ്റേറിയൻ ഫൗണ്ടേഷൻ (ജിഎച്ച്എഫ്) നടത്തുന്ന സഹായ വിതരണ കേന്ദ്രങ്ങളിൽ എത്തിയവരാണ് മരിച്ചവരിൽ ഭൂരിഭാഗവും. റാഫയ്ക്ക് സമീപമുള്ള ജിഎച്ച്എഫ് സഹായ വിതരണ കേന്ദ്രത്തിന് നേരെയുണ്ടായ ഇസ്റാഈൽ വെടിവയ്പ്പിൽ ആറ് പേർ കൊല്ലപ്പെട്ടതായി കുവൈറ്റ് ഫീൽഡ് ആശുപത്രി അധികൃതർ അറിയിച്ചു.

ഗസ്സ നഗരത്തിലെ തുഫ പ്രദേശത്ത് ഇസ്റാഈൽ ഡ്രോൺ ആക്രമണത്തിൽ പത്രപ്രവർത്തകൻ ഉൾപ്പെടെ 10 പേരാണ് കൊല്ലപ്പെട്ടത്. ഗസ്സയിലെ 17,000 കുട്ടികൾ പോഷകാഹാരക്കുറവ് അനുഭവിക്കുന്നതായി മെഡിക്കൽ റിലീഫ് ഡയറക്ടർ അൽ ജസീറയോട് വെളിപ്പെടുത്തി. "ഗുരുതരമായ ഇടപെടലുകൾ ഇല്ലെങ്കിൽ, പോഷകാഹാരക്കുറവ് മൂലം നിരവധി കുട്ടികൾ മരിക്കാനിടയുണ്ട്," അദ്ദേഹം മുന്നറിയിപ്പ് നൽകി. കുഞ്ഞുങ്ങളുടെ പാൽ, മരുന്ന്, മെഡിക്കൽ സാധനങ്ങൾ എന്നിവയുടെ കുറവ് മൂലം നിരവധി ശസ്ത്രക്രിയകൾ മാറ്റിവച്ചിരിക്കുകയാണ്.

ലെബനനിൽ വ്യോമാക്രമണം

തെക്കൻ ലെബനനിലെ നബതിയേയിൽ ഇസ്റാഈൽ നടത്തിയ വ്യോമാക്രമണത്തിൽ സ്ത്രീ കൊല്ലപ്പെടുകയും 20 പേർക്ക് പരുക്കേൽക്കുകയും ചെയ്തതായി ലെബനൻ ആരോഗ്യ മന്ത്രാലയം അറിയിച്ചു. നബതിയേയിലെ റെസിഡൻഷ്യൽ അപ്പാർട്ട്മെന്റിന് നേരെയുണ്ടായ ആക്രമണത്തിൽ 13 പേർക്കും, നഗരത്തിന്റെ പ്രാന്തപ്രദേശങ്ങളിൽ നടന്ന മറ്റൊരു ആക്രമണത്തിൽ ഏഴ് പേർക്കും പരുക്കേറ്റു.

ലെബനൻ പ്രധാനമന്ത്രി നവാഫ് സലാം ആക്രമണത്തെ "ദേശീയ പരമാധികാരത്തിന്റെയും കഴിഞ്ഞ നവംബറിലെ വെടിനിർത്തൽ കരാറിന്റെയും നഗ്നമായ ലംഘനം" എന്ന് വിശേഷിപ്പിച്ച് ശക്തമായി അപലപിച്ചു. "ഈ ആക്രമണങ്ങൾ സ്ഥിരതയ്ക്ക് ഭീഷണിയാണ്," അദ്ദേഹം എക്‌സിൽ കുറിച്ചു. തെക്കൻ ലെബനനിൽ ഹിസ്ബുള്ള ലക്ഷ്യങ്ങൾ എന്ന് വിളിക്കുന്ന സ്ഥലങ്ങളിൽ ഇസ്റാഈൽ ആക്രമണം ശക്തമാക്കിയതായി ലെബനൻ മാധ്യമങ്ങളും ഇസ്റാഈൽ സൈന്യവും റിപ്പോർട്ട് ചെയ്തു.