മുംബൈ: ആധാര്‍ നമ്പര്‍ വളരെ പ്രധാനമാണ്. ബാങ്ക് അക്കൗണ്ടുകളിലേക്കും നമ്മുടെ മറ്റു സ്വകാര്യതകളിലേക്കും കയറാനുള്ള താക്കോല്‍ കൂടിയാണ് ആധാര്‍. ഈ ആധാര്‍ സുരക്ഷിതമാക്കിയിട്ടില്ലെങ്കില്‍ ജീവിതത്തിലെ മുഴുവന്‍ സമ്പാദ്യവും നഷ്ടമാകാന്‍ ഇതു കാരണമാവും. ഇതില്‍ നിന്നെല്ലാം സംരക്ഷിക്കാനുള്ള ഏകവഴി ആധാര്‍ സുരക്ഷിതമാക്കുക എന്നതാണ്. നമ്മുടെ ആധാര്‍ നമുക്ക് നിരവധി സൗകര്യങ്ങള്‍ നല്‍കുന്നുണ്ടെങ്കിലും അതു മറ്റുള്ളവരിലെത്തിയാല്‍ സംഭവിക്കാന്‍ സാധ്യതയുള്ളത് വലിയ അപകടങ്ങളാണ്.

ആധാര്‍ നമ്പര്‍ നഷ്ടപ്പെടുകയോ മറ്റാര്‍ക്കെങ്കില്‍ കിട്ടുകയോ ചെയ്താല്‍ അത് ലഭിക്കുന്നവര്‍ക്ക് സിംകാര്‍ഡുകള്‍ പരിശോധിക്കുന്നത് മുതല്‍ നമ്മുടെ പേരില്‍ മറ്റുള്ളവര്‍ക്ക് ബാങ്ക് അക്കൗണ്ടുകള്‍ തുടങ്ങാന്‍ വരെ സാധിക്കുന്നതാണ്. അനധികൃത യുപിഐ പേയ്‌മെന്റുകള്‍ നടത്തുക, അക്കൗണ്ടില്‍ നിന്ന് പണം പിന്‍വലിക്കുക തുടങ്ങിയ കാര്യങ്ങള്‍ക്കും ഉപയോഗിക്കാവുന്നതാണ്. ഇടപാടുകള്‍ നടക്കുമ്പോള്‍ ഒടിപി വരും  എന്ന് നിങ്ങള്‍ ക രുതുന്നുണ്ടെങ്കില്‍ ഓര്‍ക്കുക, പല ഗ്രാമീണ ബാങ്കുകളിലും ഫോണ്‍ നമ്പര്‍ പോലും ആവശ്യമില്ല.

അവിടെയാണ് യഥാര്‍ഥ അപകടസാധ്യതയും. പണം പോകുന്നതും വരുന്നതും അറിയില്ല. കാരണം എസ്.എം.എസോ കോളുകളോ ലഭിക്കില്ല. ഇനി എടിഎമ്മുകളിലും ബ്രാഞ്ചുകളിലും സിസിടിവി കാമറകള്‍ ഇല്ലെങ്കില്‍ ആരാണ് പണമെടുത്തതെന്ന് കണ്ടെത്താനും പ്രയാസമാണ്. ഉത്തരേന്ത്യന്‍ സംസ്ഥാനങ്ങളിലാണ് ഇത് വ്യാപകമായി സംഭവിച്ചു കൊണ്ടിരിക്കുന്നത്. ജാര്‍ഖണ്ഡ് യുപി ബിഹാര്‍ ഛത്തിസ്ഗഡ് ഒഡിഷ എന്നിവടങ്ങളിലെ നഗരങ്ങളില്‍ പോലും ഇത്തരം സംഭവങ്ങള്‍ റിപോര്‍ട്ട് ചെയ്തിട്ടുണ്ട്. 

ഇത്തരം അപകടങ്ങള്‍ക്ക് കാരണം ലോക്ക് ചെയ്യാത്ത ആധാര്‍ കാര്‍ഡാണെന്നാണ് വിദഗ്ധര്‍ നല്‍കുന്ന മുന്നറിയിപ്പ്.  ഇതിനു പരിഹാരമായി നമ്മള്‍ ചെയ്യേണ്ടത്, ആധാര്‍ ബയോമെട്രിക്‌സ് സുരക്ഷിതമാക്കുകയെന്നതാണ്. അതിന് യാതൊരു ചെലവുമില്ല. ഒരു മിനിറ്റ് മാത്രം മതി. ബയോമെട്രിക് വഴിയുള്ള തട്ടിപ്പില്‍ നിന്ന് ഒരു പരിധിവരെ സംരക്ഷിക്കാന്‍  അതു മതിയാകും. 

എങ്ങനെ സുരക്ഷിതമാക്കാം

UIDAI യുടെ ഔദ്യോഗിക വെബ്‌സൈറ്റ് സന്ദര്‍ശിക്കുക 

'My Aadhaar' വിഭാഗത്തിലേക്കും തുടര്‍ന്ന് Aadhaar Services എന്നതിലേക്കും പോകുക

Lock/Unlock Aadhaar അല്ലെങ്കില്‍ Lock/Unlock Biomterics തിരഞ്ഞെടുക്കുക

Lock UID അല്ലെങ്കില്‍ Enable Biomteric Lock എന്ന ഓപ്ഷന്‍ തിരഞ്ഞെടുക്കുക

ആധാര്‍ നമ്പറും മറ്റ് ആവശ്യമായ വിശദാംശങ്ങളും നല്‍കുക

ലോക്കിങ് പ്രക്രിയ പൂര്‍ത്തിയാക്കാന്‍ തുടര്‍ന്നുള്ള നിര്‍ദേശങ്ങള്‍ പാലിക്കുക.

നിങ്ങളുടെ വിരലടയാളവും ഐറിസ് ഡാറ്റയും സുരക്ഷിതമാണ്.

അണ്‍ലോക്ക് ചെയ്യുന്നതുവരെ നിങ്ങള്‍ക്ക് അത് വീണ്ടും ഉപയോഗിക്കാന്‍ കഴിയില്ല.

mAadhaar ആപ്പ് ഉപയോഗിച്ച് ഫോണിലും ഇത് ചെയ്യാന്‍ കഴിയും. ബയോമെട്രിക്‌സ് ഉപയോഗിക്കേണ്ടി വരുമ്പോള്‍ അണ്‍ലോക്ക് ചെയ്ത് ഉപയോഗിക്കുക. തുടര്‍ന്ന് വീണ്ടും ലോക്ക് ചെയ്യുക. 

അണ്‍ലോക്ക് ചെയ്ത ആധാര്‍ എന്നത് എടിഎം കാര്‍ഡിന് പിന്നില്‍ പിന്‍ എഴുതിയ ശേഷം റോഡില്‍ ഉപേക്ഷിക്കുന്നത് പോലെയാണ്.