കോഴിക്കോട്: തിരുവനന്തപുരം മെഡിക്കൽ കോളേജിലെ ദുരിതം തുറന്നുപറഞ്ഞ യൂറോളജി വിഭാഗം മേധാവി ഡോ. ഹാരിസ് ചിറക്കലിനെ അഭിനന്ദിച്ച് യൂത്ത് ലീഗ് സംസ്ഥാന ജനറൽ സെക്രട്ടറി പി.കെ ഫിറോസ്. ഹാരിസ് ചിറക്കൽ കേരളത്തിന്റെ കഫീൽ ഖാൻ ആണെന്ന് ഫിറോസ് പറഞ്ഞു. അച്ചടക്ക നടപടി കൊണ്ട് ഇത്തരം ഡോക്ടർമാരുടെ വായ മൂടിക്കെട്ടാമെന്ന് സർക്കാർ വിചാരിക്കുന്നുവെങ്കിൽ കഫീൽഖാന് പിന്തുണ നൽകിയ കേരളം ഹാരിസ് ചിറക്കലുമാരോടൊപ്പവും നിലയുറപ്പിക്കുമെന്നും അദ്ദേഹം ഫേസ്ബുക്കിൽ കുറച്ചു.

യോഗി ആദിത്യനാഥിൻ്റെ ഉത്തർപ്രദേശിൽ ആശുപത്രികളുടെ ശോചനീയാവസ്ഥ തുറന്നു പറഞ്ഞ ഡോക്ടർ കഫീൽ ഖാനെ പോലെ കേരളത്തിലെ മെഡിക്കൽ കോളേജുകളുടെ ദയനീയാവസ്ഥ വിളിച്ചു പറഞ്ഞിരിക്കുകയാണ് ഡോക്ടർ ഹാരിസ് ചിറക്കൽ. കഫീൽ ഖാന് യോഗി ആദിത്യനാഥ് സമ്മാനിച്ചത് ജയിലറയാണെങ്കിൽ ഇടതുപക്ഷ അനുഭാവി കൂടിയായ ഹാരിസ് ചിറക്കലിന് അച്ചടക്ക നടപടിയുടെ ഭീഷണിയാണ് സർക്കാർ മുന്നോട്ട് വെച്ചതെന്നും പി.കെ ഫിറോസ് പറഞ്ഞു.

ALSO READ: വെളിപ്പെടുത്തലില്‍ ഉറച്ച് ഡോക്ടര്‍ ഹാരിസ്: രോഗികള്‍ക്ക് വേണ്ടിയാണ് പറയുന്നതെന്നും ശസ്ത്രക്രിയക്കായി കാത്തു നില്‍ക്കുന്നവര്‍ നിരവധി പേരെന്നും ഡോക്ടര്‍

പി.കെ ഫിറോസിന്റെ പോസ്റ്റിന്റെ പൂർണരൂപം 

കേരളത്തിൻ്റെ കഫീൽ ഖാൻ

യോഗി ആദിത്യനാഥിൻ്റെ ഉത്തർപ്രദേശിൽ ആശുപത്രികളുടെ ശോചനീയാവസ്ഥ തുറന്നു പറഞ്ഞ ഡോക്ടർ കഫീൽ ഖാനെ പോലെ കേരളത്തിലെ മെഡിക്കൽ കോളേജുകളുടെ ദയനീയാവസ്ഥ വിളിച്ചു പറഞ്ഞിരിക്കുകയാണ് ഡോക്ടർ ഹാരിസ് ചിറക്കൽ. കഫീൽ ഖാന് യോഗി ആദിത്യനാഥ് സമ്മാനിച്ചത് ജയിലറയാണെങ്കിൽ ഇടതുപക്ഷ അനുഭാവി കൂടിയായ ഹാരിസ് ചിറക്കലിന് അച്ചടക്ക നടപടിയുടെ ഭീഷണിയാണ് സർക്കാർ മുന്നോട്ട് വെച്ചത്.

സമ്മർദ്ധത്തെ തുടർന്ന് ആദ്യം ഫേസ്ബുക്ക് പോസ്റ്റ് ഡിലീറ്റ് ചെയ്തുവെങ്കിലും ഒടുവിൽ മാധ്യമങ്ങളോട് താൻ പറഞ്ഞ കാര്യങ്ങളിൽ ഉറച്ചു നിൽക്കുന്നുവെന്ന് പറഞ്ഞ ഡോ. ഹാരിസ് ചിറക്കലിൻ്റെ ധീരതയെ അഭിനന്ദിക്കാതെ വയ്യ. അച്ചടക്ക നടപടി കൊണ്ട് ഇത്തരം ഡോക്ടർമാരുടെ വായ മൂടിക്കെട്ടാമെന്ന് സർക്കാർ വിചാരിക്കുന്നുവെങ്കിൽ കഫീൽഖാന് പിന്തുണ നൽകിയ കേരളം ഹാരിസ് ചിറക്കലുമാരോടൊപ്പവും നിലയുറപ്പിക്കും.

ആരാണ് ഡോ. കഫീൽ ഖാൻ 

ഡോ. കഫീൽ ഖാൻ ഒരു ഇന്ത്യൻ ഡോക്ടറും എഴുത്തുകാരനും ഉത്തർപ്രദേശിലെ ഗോരഖ്പൂരിലെ ബാബാ രാഘവ് ദാസ് (ബി.ആർ.ഡി.) മെഡിക്കൽ കോളേജിലെ ശിശുരോഗ വിഭാഗത്തിൽ മുൻ ലക്ചററുമാണ്. 2017-ലെ ഗോരഖ്പൂർ ആശുപത്രി ദുരന്തവുമായി ബന്ധപ്പെട്ട വിവാദങ്ങൾ അദ്ദേഹത്തെ ദേശീയ ശ്രദ്ധയിൽ കൊണ്ടുവന്നു. 2017 ഓഗസ്റ്റിൽ ബി.ആർ.ഡി. മെഡിക്കൽ കോളേജിൽ ഓക്സിജൻ വിതരണം പണം അടയ്ക്കാത്തതിനാൽ നിന്നുപോയതിനെ തുടർന്ന് 60-ലധികം കുട്ടികൾ മരിച്ചു. ഓക്സിജൻ ലഭ്യത കുറഞ്ഞപ്പോൾ, ഡോ. കഫീൽ സ്വന്തം പണം ഉപയോഗിച്ച് ഓക്സിജൻ സിലിണ്ടറുകൾ വാങ്ങി, സ്വന്തം നേതൃത്വത്തിൽ പ്രതിസന്ധി പരിഹരിക്കാൻ ശ്രമിച്ചതിനാൽ മാധ്യമങ്ങൾ അദ്ദേഹത്തെ 'ഹീറോ' എന്ന് വിശേഷിപ്പിച്ചു. 

ഉത്തർപ്രദേശ് സർക്കാരിന്റെ ആരോഗ്യരംഗത്തെ വീഴ്ച പുറംലോകമറിഞ്ഞതോടെ ഭരണകൂടം പ്രതികാര നടപടി ആരംഭിച്ചു. ഓക്സിജൻ കുറവിന്റെ ഉത്തരവാദിത്തം അദ്ദേഹത്തിന് മേൽ ആരോപിച്ചായിരുന്നു സർക്കാരിന്റെ നടപടി. 2017-ൽ അദ്ദേഹത്തെ നോഡൽ ഓഫീസർ സ്ഥാനത്തുനിന്ന് നീക്കം ചെയ്യുകയും അറസ്റ്റ് ചെയ്യുകയും ചെയ്തു. 2018 ഏപ്രിലിൽ, 9 മാസത്തെ ജയിൽവാസത്തിന് ശേഷം, മെഡിക്കൽ അനാസ്ഥയ്ക്ക് തെളിവില്ലെന്ന് കോടതി വിധിച്ച് ജാമ്യത്തിൽ വിട്ടയച്ചു. 

പിന്നീട്, 2019 ഡിസംബറിൽ അലിഗഢ് മുസ്ലിം യൂണിവേഴ്സിറ്റിയിൽ പൗരത്വ നിയമ ഭേദഗതി (CAA) വിരുദ്ധ പ്രതിഷേധത്തിനിടെ 'പ്രകോപനപരമായ' പ്രസംഗം നടത്തിയെന്നാരോപിച്ച് 2020 ജനുവരിയിൽ ഡോ. കഫീലിനെ ദേശീയ സുരക്ഷാ നിയമ പ്രകാരം അറസ്റ്റ് ചെയ്തു. 2020 സെപ്റ്റംബറിൽ അലഹബാദ് ഹൈക്കോടതി ചാർജുകൾ റദ്ദാക്കി അദ്ദേഹത്തെ മോചിപ്പിച്ചു.

2021-ൽ പ്രസിദ്ധീകരിച്ച "The Gorakhpur Hospital Tragedy: A Doctor's Memory of a Deadly Medical Crisis" എന്ന അദ്ദേഹത്തിന്റെ പുസ്തകം ഏറെ ശ്രദ്ധനേടി. പുസ്തകം യു.പി സർക്കാരിന്റെ വീഴ്ചകളെ തുറന്നുകാട്ടി. എന്നാൽ, 2023 നവംബറിൽ ഉത്തർപ്രദേശ് പൊലിസ് അദ്ദേഹത്തിനെതിരെ കേസ് ഫയൽ ചെയ്തു. ഈ പുസ്തകം ഇംഗ്ലീഷ്, ഹിന്ദി, ഉറുദു, മറാത്തി, തമിഴ്, മലയാളം, ബംഗാളി ഭാഷകളിൽ പ്രസിദ്ധീകരിച്ചിട്ടുണ്ട്.

2025 മാർച്ചിൽ ഉത്തർപ്രദേശ് സർക്കാർ ഡോ. കഫീലിനെ ഔദ്യോഗികമായി സർവീസിൽ നിന്ന് പുറത്താക്കി.