തിരുവനന്തപുരം: സ്വകാര്യ ബസ് ഓപ്പറേറ്റർമാരുടെ കുത്തക തകർക്കാൻ കെഎസ്ആർടിസി പുതിയ സ്ലീപ്പർ ബസുകൾ ഉടൻ നിരത്തിലിറക്കുന്നു. ബാംഗ്ലൂർ ഉൾപ്പെടെയുള്ള ദീർഘദൂര സർവീസുകളിൽ മികവ് പുലർത്താൻ ലക്ഷ്യമിട്ടുള്ള ഈ നീക്കം കെഎസ്ആർടിസിയുടെ മുഖം മാറ്റത്തിന്റെ നിർണായക ചുവടുവയ്പാണെന്ന് ഗതാഗത മന്ത്രി കെ.ബി. ഗണേഷ് കുമാർ അറിയിച്ചു.

"പുത്തൻ സ്ലീപ്പർ ബസുകൾ ഉടൻ എത്തും. ആദ്യ ബസിന്റെ അന്തിമ പരിശോധന മാത്രമാണ് ഇനി ബാക്കി," മന്ത്രി വ്യക്തമാക്കി. എട്ട് സ്ലീപ്പർ ബസുകൾ, എട്ട് സീറ്റർ ബസുകൾ, 10 സ്ലീപ്പർ-കം-സീറ്റർ ബസുകൾ, 10 പ്രീമിയം സൂപ്പർ ഫാസ്റ്റ് പാസഞ്ചർ ബസുകൾ എന്നിവ ഉൾപ്പെടെ വിവിധ ക്ലാസുകളിൽ പുതിയ വാഹനങ്ങൾ കെഎസ്ആർടിസി അവതരിപ്പിക്കും.

കർണാടക, തമിഴ്നാട് ഗതാഗത വകുപ്പുകളുമായി സംസ്ഥാന സർക്കാർ കരാറിൽ എത്തിയിട്ടുണ്ട്. തമിഴ്നാട്ടിലെ ആരാധനാലയങ്ങൾ കേന്ദ്രീകരിച്ചുള്ള ബജറ്റ് ടൂറിസത്തിനായി 50 ബസുകൾക്ക് പെർമിറ്റ് ലഭിച്ചു. യാത്രാസമയം കുറയ്ക്കാൻ ലിമിറ്റഡ് സ്റ്റോപ് പ്രീമിയം ഫാസ്റ്റ് പാസഞ്ചർ ബസുകളും നിരത്തിലിറക്കും. കൂടാതെ, കൂടുതൽ ബസുകളിൽ ഹൈബ്രിഡ് എസി സംവിധാനം നടപ്പാക്കുമെന്നും മന്ത്രി വ്യക്തമാക്കി.

സ്വകാര്യ ബസുകളുടെ ആധിപത്യം അവസാനിപ്പിച്ച് യാത്രക്കാർക്ക് മെച്ചപ്പെട്ട സേവനം ഉറപ്പാക്കാനുള്ള കെഎസ്ആർടിസിയുടെ ഈ നീക്കം അന്തിമഘട്ടത്തിലാണെന്ന് മന്ത്രി കൂട്ടിച്ചേർത്തു.