അമ്പലവയൽ: റീൽസ് ചിത്രീകരണത്തിനിടെ കാരാപ്പുഴ ഡാമിന്റെ റിസർവോയറിലേക്ക് ജീപ്പ് മറിഞ്ഞ സംഭവത്തിൽ കർശന നടപടിയുമായി അമ്പലവയൽ പൊലീസ്. സംഭവവുമായി ബന്ധപ്പെട്ട് ജീപ്പ് പിടിച്ചെടുത്തതിനു പുറമേ, ചിത്രീകരണത്തിനായി വാഹനവുമായി എത്തിയ അഞ്ച് യുവാക്കൾക്കെതിരെ ജാമ്യമില്ലാ വകുപ്പുകൾ പ്രകാരം കേസെടുത്തു. മീനങ്ങാടി സ്വദേശി പി.കെ. ഫായിസ്, കോഴിക്കോട് വടകര സ്വദേശികളായ മുഹമ്മദ് റാഹിൽ, മുഹമ്മദ് റജാസ്, മുഹമ്മദ് ഷാനിഫ്, മുഹമ്മദ് ഫാഫി എന്നിവർക്കെതിരെയാണ് കേസ്. പ്രതികളെ സുൽത്താൻ ബത്തേരി കോടതിയിൽ ഹാജരാക്കി.

നെല്ലറച്ചാൽ വ്യൂ പോയിന്റിൽ ദിവസങ്ങൾക്ക് മുമ്പ് ട്രാക്ടർ ഉപയോഗിച്ച് അഭ്യാസപ്രകടനം നടത്തിയപ്പോൾ അപകടമുണ്ടായ സ്ഥലത്ത് തന്നെയാണ് ജീപ്പ് ഡാമിലേക്ക് മറിഞ്ഞത്. റീൽസ് ചിത്രീകരണത്തിനായി രാവിലെ ഡാമിന് സമീപമെത്തിയ യുവാക്കൾ, വാഹനം കീഴ്ക്കാംതൂക്കായ ഭാഗത്ത് ഓടിക്കുന്നതിനിടെ നിയന്ത്രണം വിട്ട് ജലാശയത്തിലേക്ക് ഇറങ്ങിപ്പോവുകയായിരുന്നു. കുടിവെള്ള സ്രോതസ്സായ ഡാം മലിനമാക്കിയതിനും വാഹന നിയന്ത്രണമുള്ള പ്രദേശത്ത് അനുവാദമില്ലാതെ ജീപ്പ് ഓടിച്ചതിനും കടുത്ത വകുപ്പുകൾ ചുമത്തിയാണ് കേസെടുത്തിരിക്കുന്നത്.

ജലാശയത്തിൽ വാഹനം മുങ്ങിപ്പോകാൻ പാകത്തിൽ ആഴമുള്ള ഭാഗത്തേക്കാണ് ജീപ്പ് മറിഞ്ഞത്. തലനാരിഴയ്ക്കാണ് യുവാക്കൾ രക്ഷപ്പെട്ടത്. വാഹനത്തിന്റെ രജിസ്ട്രേഷൻ റദ്ദാക്കുന്നതിന് മോട്ടോർ വാഹന വകുപ്പിനെ സമീപിക്കാനും പൊലീസ് തീരുമാനിച്ചിട്ടുണ്ട്.

A jeep fell into the Karapuzha Dam reservoir during a reels shoot, prompting strict action by the Ambalavayal police. The vehicle was seized, and a case was filed against five youths P.K. Faisal from Meenangadi and Kozhikode natives Muhammad Rahil, Muhammad Rajas, Muhammad Shanif, and Muhammad Fafi under non-bailable sections.