ചെന്നൈ: കുപ്രസിദ്ധ വനം കൊള്ളക്കാരൻ വീരപ്പന് സ്മാരകം നിർമിക്കണമെന്ന് ആവശ്യം. വീരപ്പന്റെ ഭാര്യ മുത്തുലക്ഷ്മിയാണ് ആവശ്യവുമായി രംഗത്ത് വന്നത്. തമിഴ്‌നാട് സർക്കാരിനോടാണ് തമിഴക വാഴ്‌വുരിമൈ കച്ചി എക്‌സിക്യൂട്ടീവ് കമ്മിറ്റി അംഗം കൂടിയായ മുത്തുലക്ഷ്മി ആവശ്യം ഉന്നയിച്ചിരിക്കുന്നത്. 

വീരപ്പനെ അടക്കം ചെയ്ത സ്ഥലത്ത് സ്മാരകം നിർമ്മിക്കണമെന്നാണ് മുത്തുലക്ഷ്മിയുടെ ആവശ്യം. ഡിണ്ടിഗൽ ജില്ലയിലെ ഒരു വിവാഹ ചടങ്ങിൽ പങ്കെടുക്കവെയാണ് മുത്തുലക്ഷ്മി ഈ ആവശ്യം ഉന്നയിച്ചത്. ഇതിനായി ഉദ്യോഗസ്ഥർക്ക് അപേക്ഷ നൽകുമെന്ന് അവർ പറഞ്ഞു.

ALSO READ: വിവാദങ്ങൾക്കൊടുവിൽ പരിഹാരം; തിരുവനന്തപുരം മെഡിക്കൽ കോളജിൽ ഉപകരണങ്ങൾ എത്തിച്ചു

വടക്കൻ സംസ്ഥാനങ്ങളിൽ നിന്നുള്ള കുടിയേറ്റ തൊഴിലാളികൾ തമിഴ് യുവാക്കളുടെ പ്രാദേശിക തൊഴിലവസരങ്ങളെ ബാധിക്കുന്നതിനെക്കുറിച്ചും അവർ ആശങ്ക പ്രകടിപ്പിച്ചു. സിനിമാതാരങ്ങളുടെ രാഷ്ട്രീയ പ്രവേശനത്തെ വിമർശിച്ച മുത്തുലക്ഷ്മി, ബിജെപിയുടെ സഖ്യങ്ങൾ സംസ്ഥാനത്തെ പ്രാദേശിക പാർട്ടികൾക്ക് ദോഷം ചെയ്യുമെന്ന് മുന്നറിയിപ്പ് നൽകി.

ആരാണ് വീരപ്പൻ?

 

 

കൂസെ മുനിസ്വാമി വീരപ്പൻ ഗൗണ്ടർ അഥവാ വീരപ്പൻ (1952-2004), ഇന്ത്യ കണ്ട ഏറ്റവും കുപ്രസിദ്ധനായ വനം കൊള്ളക്കാരനും ചന്ദനക്കടത്ത് ഉൾപ്പടെ നടത്തിയിരുന്ന വ്യക്തിയായിരുന്നു. കർണാടക-തമിഴ്‌നാട് അതിർത്തിയിലെ സത്യമംഗലം വനം കേന്ദ്രീകരിച്ചായിരുന്നു വീരപ്പന്റെ പ്രവർത്തനം. ആനക്കൊമ്പ്, ചന്ദനം തുടങ്ങിയവയുടെ കള്ളക്കടത്തിനും, നിരവധി കൊലപാതകങ്ങൾ, തട്ടിക്കൊണ്ടുപോകലുകൾ എന്നിവയ്ക്കും പേര് കേട്ട വീരപ്പൻ, പൊലിസിനേയും ഭരണകൂടത്തെയും വെല്ലുവിളിച്ച് വർഷങ്ങളോളം ഒളിവിൽ കഴിഞ്ഞു. 2000-ൽ നടൻ രാജ്കുമാറിനെ തട്ടിക്കൊണ്ടുപോയ സംഭവം വീരപ്പനെ കൂടുതൽ കുപ്രസിദ്ധനാക്കി. 

വീരപ്പൻ ഏകദേശം 184 ആളുകളെ കൊലപ്പെടുത്തിയതായി രേഖപ്പെടുത്തിയിട്ടുണ്ട്, ഇതിൽ പകുതിയോളം (ഏകദേശം 90-100) പേരും പൊലിസുകാരും വനം വകുപ്പ് ഉദ്യോഗസ്ഥരുമായിരുന്നു. 2,000 മുതൽ 3,000 വരെ ആനകളെ കൊലപ്പെടുത്തിയതായി ചില റിപ്പോർട്ടുകൾ പറയുന്നുണ്ടെങ്കിലും, വിദഗ്ധർ പറയുന്നത്, വീരപ്പന്റെ സംഘം ഏകദേശം 500 ആനകളെ കൊന്നെന്നാണ്. ഇത്തരത്തിൽ ഏകദേശം 7,500 കിലോഗ്രാം ആനക്കൊമ്പ് വീരപ്പൻ കച്ചവടം നടത്തിയിട്ടുണ്ട്. ഇന്ത്യൻ രൂപ 16 കോടി വില വരുന്നതാണ് ഈ ആനക്കൊമ്പുകൾ. കള്ളക്കടത്തിന്റെ കാര്യത്തിൽ, വീരപ്പൻ ഏകദേശം 65 ടൺ ചന്ദനം (143 കോടി രൂപ) കടത്തിയതായി രേഖപ്പെടുത്തിയിട്ടുണ്ട്. 

2004-ൽ തമിഴ്‌നാട് പൊലിസിന്റെ പ്രത്യേക സേനയായ എസ്.ടി.എഫ് നടത്തിയ ഓപ്പറേഷൻ കൊക്കൂണിൽ ആണ് വീരപ്പൻ വെടിയേറ്റ് കൊല്ലപ്പെട്ടത്.

Muthulakshmi, wife of the infamous forest brigand Veerappan, has stirred debate by demanding the construction of a memorial in his name. She made the request to the Tamil Nadu government in her capacity as an executive committee member of the Tamilaga Vazhvurimai Katchi.