മഴക്കാലം തുടങ്ങിയാല്‍ വിലിക്കാതെത്തുന്ന കുറേയേറെ അതിഥികളുണ്ട്. കൊതുക് മുതല്‍ പുഴുക്കള്‍ വരെ പരന്നു കിടക്കുന്നു ശല്യക്കാര്‍. അതില്‍ പ്രധാനിയാണ് നമ്മുടെ ഒച്ച്. എന്തു ചെയ്താലും പോവുകയുമില്ല. അതിന്‍രെ വഴുവഴുപ്പും മറ്റും ആകെക്കൂടി അറപ്പുളവാക്കുന്നതുമാണ്. ഇവയെ തുരത്താന്‍ രാസവസ്തുക്കള്‍ ഉപയോഗിച്ചാലോ അത് നമ്മുടെ മണ്ണിനും ചെടികള്‍ക്കും ദോഷമാണ് താനും. ഇവരെ തുരത്താന്‍ പിന്നെ എന്ത് ചെയ്യും. അധികം തലപുകക്കേണ്ട. നമ്മുടെ അടുക്കളയില്‍ തന്നെയുണ്ട് ചില പൊടിക്കൈകള്‍.

ഉപ്പ്
ഒച്ചുകളെ തുരത്താന്‍ പണ്ടുമുതലേ ഉപയോഗിക്കുന്നതാണ് ഉപ്പ്. ഒച്ചിന്റെ ശരീരത്തിലെ ജലാംശം വലിച്ചെടുത്ത് അവയെ നിര്‍ജ്ജലീകരിക്കാന്‍ ഉപ്പിന് കഴിയുമെന്നാണ് പറയുന്നത്. ഒച്ചുകളുടെ മേല്‍ നേരിട്ട് ഉപ്പ് വിതറുന്നത് അവയെ നശിപ്പിക്കും. പക്ഷേ, ഇത് ചെടികള്‍ക്ക് ദോഷകരമാകാന്‍ സാധ്യതയുണ്ട്.

വിനാഗിരിയും ഉപ്പും
ഒരു സ്‌പ്രേ ബോട്ടിലില്‍ തുല്യ അളവില്‍ വെള്ളവും വെളുത്ത വിനാഗിരിയും നന്നായി കലര്‍ത്തുക. ഈ ലായനി ഒച്ചുകളുടെ ശരീരത്തിലേക്ക് നേരിട്ട് സ്‌പ്രേ ചെയ്യുക.  അവ പെട്ടെന്ന് തന്നെ ചുരുങ്ങുന്നതും ഇല്ലാതാവുന്നതും കാണാം. ഒച്ചുകള്‍ വരാന്‍ സാധ്യതയുള്ള നടപ്പാതകള്‍, മതിലുകള്‍, ചെടിച്ചട്ടികളുടെ വക്കുകള്‍ എന്നിവിടങ്ങളിലും ഈ ലായനി തളിക്കാവുന്നതാണ്. 

വെളുത്തുള്ളി ലായനി
രൂക്ഷഗന്ധമുള്ള വെളുത്തുള്ളി ഒച്ചുകളെ അകറ്റാന്‍ വളരെ നല്ലതാണെന്നാണ് പറയുന്നത്. കുറച്ച് വെളുത്തുള്ളി അല്ലികള്‍ ചതച്ച് വെള്ളത്തില്‍ കലര്‍ത്തി ഒരു രാത്രി വെക്കണം. പിറ്റേ ദിവസം ഈ ലായനി അരിച്ചെടുത്ത് ഒരു  ബോട്ടിലില്‍ ഒഴിച്ച് ഒച്ചുകള്‍ കാണുന്ന സ്ഥലങ്ങളിലും ചെടികളിലും സ്‌പ്രേ ചെയ്യുക. 

നാരങ്ങാ തൊലി
ഓറഞ്ച് പോലുള്ള സിട്രസ് പഴങ്ങളുടെ തൊലികളും ഒച്ചുകള്‍ക്ക് ഇഷ്ടമല്ല. ഈ തൊലികള്‍ ചെറിയ കഷ്ണങ്ങളാക്കി ഒച്ചുകള്‍ വരുന്ന സ്ഥലങ്ങളിലും ചെടികളുടെ ചുവട്ടിലും വെക്കുന്നത് നല്ലതാണ്. ഇവയുടെ ഗന്ധം ഒച്ചുകളെ അകറ്റി നിര്‍ത്താന്‍ സഹായിക്കും.

ALSO READ: ഒറ്റയടിക്ക് കൂടിയത് 800ലേറെ രൂപ; ഞെട്ടിച്ച് പൊന്ന്, വില കൂടാനുള്ള കാരണം നോക്കാം

മുട്ടത്തോട്

മുട്ടത്തോടുകളും ഒച്ചുകളെ തുരത്താനുള്ള നല്ല മാര്‍ഗമാണ്. മുട്ടത്തോടുകള്‍ നന്നായി കഴുകി ഉണക്കി ചെറിയ കഷ്ണങ്ങളാക്കി പൊടിച്ചെടുക്കുക. ഇത് ചെടികളുടെ ചുവട്ടിലും ഒച്ചുകള്‍ വരുന്ന സ്ഥലങ്ങളിലും വിതറുക. ഒച്ചുകള്‍ക്ക് ഈ പൊടിച്ച മുട്ടത്തോടുകളിലൂടെ സഞ്ചരിക്കാന്‍ കഴിയില്ല. മാത്രമല്ല മുട്ടത്തോടിലുള്ള കാല്‍സ്യം ചെടികള്‍ക്ക് വളമാവുകയും ചെയ്യും.

കാപ്പിപ്പൊടി
ഒച്ചുകള്‍ വരുന്ന സ്ഥലങ്ങളില്‍ കാപ്പിപ്പൊടി വിതറുന്നതും ഒച്ചുകളെ അകറ്റും. കാപ്പിപ്പൊടിയിലെ കഫീന്‍ ഒച്ചുകള്‍ക്ക് വിഷമാണ്. അതുകൊണ്ട് ഉപയോഗിച്ച കാപ്പിപ്പൊടി കളയണ്ട. ഇത് ചെടികളുടെ ചുവട്ടില്‍ വിതറുന്നത് ഒച്ചുകളെ തുരത്തും. കൂടാതെ ചെടികള്‍ക്ക് വളവുമാകും.

ചാരം
വിറക് കത്തിച്ച ചാരവും ഒച്ചുകളെ തുരത്താന്‍ ഉപയോഗിക്കാം. ചാരം ചെടികളുടെ ചുറ്റും വിതറുന്നത് ഒച്ചുകള്‍ക്ക് കടന്നുപോകാന്‍ ബുദ്ധിമുട്ടുണ്ടാക്കും. ചാരത്തിലെ ക്ഷാരഗുണം ഒച്ചുകള്‍ക്ക് അസ്വസ്ഥത ഉണ്ടാക്കുകയും ചെയ്യുമെന്നും പറപ്പെടുന്നു. 

വീടിനകത്ത് ഒച്ചുകളെ തടയാന്‍....
മാലിന്യ കൂമ്പാരങ്ങള്‍, പഴയ മരത്തടികള്‍, കല്ലുകള്‍ക്കിടയിലുള്ള വിടവുകള്‍ തുടങ്ങിയവ ഒച്ചുകള്‍ക്ക് ഒളിച്ചിരിക്കാനും മുട്ടയിടാനും പറ്റിയ സ്ഥലങ്ങളാണ്. ഇവയെല്ലാം വീടിന്റെ പരിസരത്ത് നിന്ന് നീക്കം ചെയ്യുന്നത് ഒച്ചിന്റെ വരവ് ഒഴിവാക്കാന്‍ നല്ലതാണ്. വീടിന്റെ ഭിത്തിയോട് ചേര്‍ന്ന് ചെടികള്‍ വച്ച് പിടിപ്പിക്കുന്നതും ഒഴിവാക്കാം. വീടിന് ചുറ്റുമുള്ള പുല്ലുകള്‍ വെട്ടി വൃത്തിയാക്കുന്നതും നല്ലതാണ്. ഒച്ചുകള്‍ രാത്രിയിലാണ് കൂടുതല്‍ സജീവമാകുന്നത്. അതിനാല്‍ രാത്രിയില്‍ ജനലുകളും വാതിലുകളും അടച്ചിടുന്നത് നല്ലതാണ്.