ദില്ലി: തിരുവനന്തപുരം മെഡിക്കല്‍ കോളജിലുണ്ടായ ശസ്ത്രക്രിയാ ഉപകരണക്ഷാമത്തെക്കുറിച്ച് പരസ്യ പ്രതികരണം നടത്തിയ ഡോ. ഹാരിസ് മികച്ച ഡോക്ടറാണെന്ന് സിപിഐ സംസ്ഥാന സെക്രട്ടറി ബിനോയ്‌വിശ്വം. അദ്ദേഹത്തെ വ്യക്തിപരമായി അറിയില്ലെന്നും പക്ഷേ, നിരവധിപേര്‍ പറഞ്ഞത് അദ്ദേഹം മികച്ച ഡോക്ടര്‍ ആണെന്നും കാര്യങ്ങള്‍ നേരെയാകണം എന്ന ബോധ്യത്തോടെയാണ് അദ്ദേഹം പറഞ്ഞതും എന്നാണ്.

അതായിരിക്കണം ഉദ്ദേശമെന്നും 'കുനിഷ്ട്' ഉള്ളതായി തോന്നുന്നില്ല എന്നും സര്‍വീസ് ചട്ടങ്ങളുമായി ബന്ധപ്പെട്ട കാര്യങ്ങള്‍ സര്‍ക്കാര്‍ നോക്കട്ടെയെന്നും അദ്ദേഹം പറഞ്ഞു. മുഖ്യമന്ത്രിയുടെ വിമര്‍ശനത്തെ കുറിച്ചുള്ള ചോദ്യത്തോട് ബിനോയ് വിശ്വം പ്രതികരിച്ചിട്ടില്ല. തിരുവനന്തപുരം മെഡിക്കല്‍ കോളജില്‍ ശസ്ത്രക്രിയ ഉപകരണങ്ങള്‍ ഇല്ലാത്തതിന്റെ പേരില്‍ തുറന്നടിച്ച ഡോ. ഹാരിസ് ചിറയ്ക്കല്‍ ഇപ്പോള്‍ സംതൃപ്തന്‍ ആണ്.

ഇപ്പോള്‍ വളരെ സന്തോഷം തോന്നുന്നുവെന്ന് ഡോ. ഹാരിസ് ചിറയ്ക്കല്‍ പറയുന്നു. യൂറോളജി വകുപ്പിലേക്ക് ആവശ്യമായ ശസ്ത്രക്രിയ ഉപകരണം ഇന്നലെ എത്തിച്ച് ശസ്ത്രക്രിയകള്‍ ആരംഭിക്കുകയും ചെയ്തു. ഇതിന് പിന്നാലെയാണ് ഡോക്ടറുടെ പ്രതികരണമുണ്ടായതും. താന്‍ പ്രതികരിച്ചപ്പോള്‍ ഒരുപാട് പേര്‍ ഒപ്പം നിന്നു. ബ്യൂറോക്രസിയുടെ വീഴ്ചയുണ്ട്. അത് പരിഹരിക്കണം. പ്രശ്‌നങ്ങള്‍ പരിഹരിച്ചാല്‍ ആരോഗ്യമേഖല ഉയര്‍ച്ചയിലേക്ക് പോകുമെന്നും മുഖ്യമന്ത്രിയുടെ കുറ്റപ്പെടുത്തലില്‍ വിഷമമില്ലെന്നും താന്‍ നടത്തിയത് പ്രൊഫഷണല്‍ സൂയിസൈഡാണെന്നും അദ്ദേഹം കൂട്ടിച്ചേര്‍ത്തു.