കോഴിക്കോട്: നിപാ ബാധിച്ച് കോഴിക്കോട് മെഡി. കോളജ് ആശുപത്രിയിൽ പ്രവേശിപ്പിച്ച പാലക്കാട്‌ സ്വദേശിയായ യുവതിയുടെ ആരോഗ്യനില അതീവ ഗുരുതരമായി തുടരുന്നതായി ഡോക്ടർമാർ അറിയിച്ചു. നിലവിൽ  കെ.എച്ച്.ആർ.ഡബ്ല്യു.എസ് പേ വാർഡിലെ വെന്റിലേറ്റർ സൗകര്യത്തോടെ ഒരുക്കിയ ഐസൊലേഷൻ മുറിയിലാണ് യുവതിയുള്ളത്. 
മെഡി. കോളജ് മെഡിസിൻ വിഭാഗം മേധാവി ‍ഡോ. പി. ജയേഷ് കുമാറിന്റെ മേൽനോട്ടത്തിൽ മെഡിക്കൽ ബോർഡ് രൂപീകരിച്ചാണ് പ്രവർത്തനങ്ങൾ ഏകോപിപ്പിക്കുന്നത്. മെഡിസിൻ വിഭാഗം അസി. പ്രഫസർമാരായ ഡോ. വി.കെ ഷമീർ, ഡോ. ഇ.ഡാനിഷ്, ഡോ. ആർ.ഗായത്രി, എമർജൻസി വിഭാഗം മേധാവി ഡോ.ആർ ചാന്ദ്നി എന്നിവരടങ്ങുന്ന സംഘമാണ് രോഗിയെ പരിചരിക്കുന്നത്.

ALSO READ: നിപ സമ്പര്‍ക്കപ്പട്ടികയില്‍ ആകെ 383 പേര്‍; മന്ത്രി വീണാ ജോര്‍ജിന്റെ നേതൃത്വത്തില്‍ ഉന്നതതല യോഗം ചേര്‍ന്നു

പെരിന്തൽമണ്ണയിലെ സ്വകാര്യ ആശുപത്രിയിൽ ചികിത്സയിലായിരുന്ന യുവതിയെ വെള്ളിയാഴ്ച രാത്രിയോടെയാണ് കോഴിക്കോട് മെഡി.കോളജിലേക്ക് മാറ്റിയത്.

ALSO READ: നിപയിൽ ആശ്വാസം; രോഗലക്ഷണമുള്ള മൂന്ന് കുട്ടികളുടെ ഫലം നെഗറ്റീവ്

നിലവിൽ ആശുപത്രിയിൽ സുരക്ഷ ശക്തമാക്കിയിട്ടുണ്ട്. രോഗലക്ഷണങ്ങളുമായി വരുന്നവരെ പരിചരിക്കാൻ ട്രെയാജ് സംവിധാനവും ഇന്ന് സജ്ജമാക്കും. അനാവശ്യമായി ആളുകൾ ആശുപത്രിയിൽ എത്തുന്നത് ഒഴിവാക്കണമെന്ന നിർദേശവുമുണ്ട്.
ജൂലൈ ഒന്നിന് സ്വകാര്യ ആശുപത്രിയിൽ മരണപ്പെട്ട മലപ്പുറം മങ്കടയിലെ 18കാരിയുടെ പൂനെയിലെ ലെവൽ 3 വൈറോളജി ലാബിൽ നിന്നുള്ള പരിശോധന ഫലവും പോസിറ്റീവാണ്. മെഡി. കോളജിലെ ലെവൽ ടു വൈറോളജി ലാബിൽ നടത്തിയ പ്രാഥമിക പരിശോധനയിൽ ഇവർക്ക് നിപാ സ്ഥിരീകരിച്ചിരുന്നു. പൂർണ സ്ഥിരീകരണത്തിനായാണ്  പൂനെയിലേക്ക് സാമ്പിൾ അയച്ചത്. നിലവിൽ പോസ്റ്റ്‌മോർട്ടം ഉൾപ്പെടെ നടത്തിയ 87 ആരോഗ്യപ്രവർത്തകർ നിരീക്ഷണത്തിൽ തുടരുകയാണ്.