തിരുവനന്തപുരം: നാളെ നടക്കാനിരിക്കുന്ന ദേശീയ പണിമുടക്കിൽ കെഎസ്ആർടിസി ഭാഗമാകില്ലെന്ന ഗതാഗത മന്ത്രി കെ.ബി. ഗണേഷ് കുമാറിന്റെ പ്രസ്താവന തൊഴിലാളി യൂണിയനുകൾ തള്ളി. കെഎസ്ആർടിസി ജീവനക്കാർക്ക് ശമ്പളം കൃത്യമായി ലഭിക്കുന്നതിനാൽ സന്തുഷ്ടരാണെന്നും അവർ പണിമുടക്കിന്റെ ഭാഗമാകില്ലെന്നുമായിരുന്നു മന്ത്രിയുടെ വാദം. എന്നാൽ, കഴിഞ്ഞ 25-ന് പണിമുടക്കിനായി നോട്ടീസ് നൽകിയിട്ടുണ്ടെന്ന് യൂണിയനുകൾ വ്യക്തമാക്കി. മന്ത്രിക്കല്ല, കെഎസ്ആർടിസി മാനേജ്‌മെന്റിനാണ് നോട്ടീസ് നൽകേണ്ടതെന്ന് സിഐടിയു നേതാക്കൾ പറഞ്ഞു.

നരേന്ദ്ര മോദി സർക്കാരിന്റെ തൊഴിലാളി വിരുദ്ധ നയങ്ങൾക്കെതിരെ പ്രതിഷേധിക്കാനാണ് പണിമുടക്കെന്ന് സിപിഐഎം ദേശീയ സെക്രട്ടറി എം.എ. ബേബി അറിയിച്ചു. ബിഎംഎസ് ഒഴികെയുള്ള എല്ലാ പ്രമുഖ ട്രേഡ് യൂണിയനുകളും പണിമുടക്കിൽ പങ്കെടുക്കും. പത്ത് കേന്ദ്ര ട്രേഡ് യൂണിയനുകളും വിവിധ മേഖലകളിലെ അസോസിയേഷനുകളും ഫെഡറേഷനുകളും ഉൾപ്പെട്ട സംയുക്ത വേദിയാണ് പൊതു പണിമുടക്കിന് ആഹ്വാനം ചെയ്തിരിക്കുന്നത്. 25 കോടിയിലധികം തൊഴിലാളികൾ പണിമുടക്കിൽ പങ്കെടുക്കുമെന്നാണ് സംഘടനകൾ അവകാശപ്പെടുന്നത്.

ALSO READ: റെയിൽവേ ഗേറ്റിൽ സ്കൂൾ ബസിൽ ട്രെയിൻ ഇടിച്ച സംഭവം: റെയിൽവേയുടെ ആരോപണം തള്ളി ബസ് ഡ്രൈവർ

കേന്ദ്ര സർക്കാർ കൊണ്ടുവന്ന പുതിയ തൊഴിൽ ചട്ടങ്ങൾ പിൻവലിക്കുക, തൊഴിലാളികളുടെ വേതനം വർധിപ്പിക്കുക തുടങ്ങിയ ആവശ്യങ്ങൾ ഉന്നയിച്ചാണ് പണിമുടക്ക്. സംയുക്ത കിസാൻ മോർച്ച, കർഷക തൊഴിലാളി സംഘടനകൾ, ഇടത് പാർട്ടികൾ, ആർജെഡി തുടങ്ങിയവർ പണിമുടക്കിന് പിന്തുണ പ്രഖ്യാപിച്ചിട്ടുണ്ട്. തൊഴിലാളി അവകാശങ്ങൾക്കൊപ്പം ജനാധിപത്യ അവകാശങ്ങളും ഉന്നയിച്ചാണ് പണിമുടക്കെന്ന് എം.എ. ബേബി വ്യക്തമാക്കി. ബാങ്കിംഗ്, തപാൽ, കൽക്കരി ഖനനം, ഫാക്ടറികൾ, സംസ്ഥാന ഗതാഗത സേവനങ്ങൾ എന്നിവയെ പണിമുടക്ക് ബാധിക്കുമെന്ന് സംഘാടകർ അറിയിച്ചു.

അതേസമയം, പണിമുടക്കിനെ നേരിടാൻ കെഎസ്ആർടിസി ഡയസ്‌നോൺ പ്രഖ്യാപിച്ചു. ഡ്യൂട്ടിക്ക് എത്താത്തവരുടെ ശമ്പളം റദ്ദാക്കുമെന്നും ക്രമസമാധാന പ്രശ്‌നങ്ങൾ ഉണ്ടായാൽ പൊലീസിനെ അറിയിക്കണമെന്നും കെഎസ്ആർടിസി സിഎംഡിയുടെ ഉത്തരവിൽ പറയുന്നു. എന്നാൽ, കെഎസ്ആർടിസിയിലെ പ്രശ്‌നങ്ങൾ പൂർണമായി പരിഹരിക്കപ്പെട്ടിട്ടില്ലെന്നും നാളെ ബസുകൾ തെരുവിലിറക്കുന്നതിൽ പ്രശ്‌നമില്ലെന്നും എൽഡിഎഫ് കൺവീനർ ടി.പി. രാമകൃഷ്ണൻ വ്യക്തമാക്കി. 

Transport Minister K.B. Ganesh Kumar claimed KSRTC will not participate in the national strike, citing timely salary payments and content employees. Trade unions rejected this, confirming they issued a strike notice on the 25th and will join the protest against the central government's anti-labor policies