മസ്‌കത്ത്: ഒമാനില്‍ തൊഴില്‍ വിസ (ലേബര്‍ കാര്‍ഡ്) പുതുക്കലിനും നിയമപരമായ തൊഴില്‍ പദവി ശരിയാക്കുന്നതിനുമുള്ള പിഴരഹിത ഗ്രേസ് പിരീഡ് ജൂലൈ 31ന് അവസാനിക്കുമെന്ന് തൊഴില്‍ മന്ത്രാലയം അറിയിച്ചു. വ്യക്തികള്‍, തൊഴിലുടമകള്‍, തൊഴിലാളികള്‍ എന്നിവര്‍ക്കുള്ള അന്തിമ ഓര്‍മ്മപ്പെടുത്തലായാണ് മന്ത്രാലയം അറിയിപ്പ് പുറപ്പെടുവിച്ചിരിക്കുന്നത്.

'ജൂലൈ 31ന് ഗ്രേസ് പിരീഡ് അവസാനിക്കും. ഈ തീയതിക്ക് ശേഷം സമര്‍പ്പിക്കുന്ന അപേക്ഷകള്‍ പരിഗണിക്കില്ല,' മന്ത്രാലയം പുറത്തിറക്കിയ അറിയിപ്പില്‍ വ്യക്തമാക്കി. ഇളവ് പാക്കേജ് പ്രയോജനപ്പെടുത്താന്‍ ബന്ധപ്പെട്ട എല്ലാ കക്ഷികളോടും മന്ത്രാലയം അഭ്യര്‍ത്ഥിച്ചു.

ALSO READ: ജിസിസി രാജ്യങ്ങളില്‍ ഏറ്റവും കുറവ് ജീവിതച്ചെലവ് ഉള്ളത് ഈ രാജ്യത്തെന്ന് റിപ്പോര്‍ട്ട്

2025 ജനുവരിയില്‍ ഒമാന്‍ മന്ത്രിസഭ അംഗീകരിച്ച 60 ദശലക്ഷം ഒമാനി റിയാല്‍ (156 മില്യണ്‍ ഡോളര്‍) മൂല്യമുള്ള സമഗ്ര ഇളവ് സംരംഭത്തിന്റെ ഭാഗമായാണ് ഗ്രേസ് പിരീഡ്. തൊഴില്‍ ശക്തി നിയന്ത്രണം മെച്ചപ്പെടുത്തുക, തൊഴിലാളികളുടെയും തൊഴിലുടമകളുടെയും അവകാശങ്ങള്‍ സംരക്ഷിക്കുക, കൂടുതല്‍ കാര്യക്ഷമമായ തൊഴില്‍ വിപണി സൃഷ്ടിക്കുക എന്നിവയാണ് ഈ പദ്ധതിയുടെ ലക്ഷ്യങ്ങള്‍.

ഇളവ് പാക്കേജിന്റെ പ്രധാന സവിശേഷതകള്‍

• പിഴ ഒഴിവാക്കല്‍: ഏഴ് വര്‍ഷത്തിലധികം പ്രവര്‍ത്തനരഹിതമായ ലേബര്‍ കാര്‍ഡുകളുടെ പിഴയും കുടിശ്ശികയും റദ്ദാക്കല്‍.
• വിമാനക്കൂലി ഇളവ്: 2018ന് മുമ്പ് ഒമാനില്‍നിന്ന് മടങ്ങിയ തൊഴിലാളികള്‍ക്ക് സ്വദേശത്തേക്ക് മടങ്ങുന്നതിനുള്ള ചെലവുകള്‍ (വിമാനക്കൂലി) നല്‍കേണ്ട ആവശ്യമില്ല.
• ലേബര്‍ കാര്‍ഡ് റദ്ദാക്കല്‍: 10 വര്‍ഷത്തിലധികം ഉപയോഗിക്കാത്ത ലേബര്‍ കാര്‍ഡുകള്‍, ബന്ധപ്പെട്ട സേവന അഭ്യര്‍ത്ഥനകള്‍ ഇല്ലെങ്കില്‍, റദ്ദാക്കും.
• ലിക്വിഡേറ്റഡ് കമ്പനികള്‍: ലിക്വിഡേറ്റ് ചെയ്ത കമ്പനികള്‍ തൊഴിലാളികളെ മടക്കി അയക്കുകയോ അവരുടെ സേവനങ്ങള്‍ കൈമാറ്റം ചെയ്യുകയോ ചെയ്താല്‍ ഇളവുകള്‍ ലഭിക്കും.

2025 ഫെബ്രുവരി 1 മുതല്‍ ജൂലൈ 31 വരെയാണ് തൊഴിലാളി പദവി സ്ഥിരപ്പെടുത്തുന്നതിനും പിഴ ഒഴിവാക്കുന്നതിനുമുള്ള ആറ് മാസത്തെ ഗ്രേസ് പിരീഡ്. ഇതിന് വിധേയമായ നിബന്ധനകള്‍:

അടുത്ത രണ്ട് വര്‍ഷത്തേക്ക് ലേബര്‍ കാര്‍ഡ് പുതുക്കലും ഫീസ് അടയ്ക്കലും.
ഒളിച്ചോടല്‍ (ജോലി ഉപേക്ഷിക്കല്‍) റിപ്പോര്‍ട്ടുകള്‍ റദ്ദാക്കല്‍.
സേവനങ്ങളുടെ കൈമാറ്റം അല്ലെങ്കില്‍ സ്വദേശത്തേക്ക് മടങ്ങുന്നതിനുള്ള ചെലവുകള്‍ അടയ്ക്കല്‍.

അപേക്ഷകള്‍: എവിടെ, എപ്പോള്‍?

2025 ഫെബ്രുവരി 1 മുതല്‍ ജൂലൈ 31 വരെ മന്ത്രാലയത്തിന്റെ വെബ്‌സൈറ്റ് വഴിയോ അംഗീകൃത സേവന ചാനലുകള്‍ വഴിയോ മാത്രമേ അപേക്ഷകള്‍ സ്വീകരിക്കൂ.

ALSO READ: ഡ്രൈവിങിനിടെയുള്ള മൊബൈല്‍ ഫോണ്‍ ഉപയോഗവും സീറ്റ് ബെല്‍റ്റ് നിയമലംഘനങ്ങളും കണ്ടെത്താന്‍ എഐ ക്യാമറകള്‍; നിയമലംഘകരെ പൂട്ടാന്‍ റോയല്‍ ഒമാന്‍ പൊലിസ്

പ്രവാസി തൊഴിലാളികള്‍

ഒമാനിലെ പ്രവാസി തൊഴിലാളികളില്‍ ബംഗ്ലാദേശ് (6,22,078), ഇന്ത്യ (5,07,956), പാകിസ്ഥാന്‍ (3,14,997) എന്നീ രാജ്യങ്ങളില്‍നിന്നുള്ളവരാണ് മുന്‍നിരയില്‍. രാജ്യത്തെ പ്രവാസി തൊഴിലാളികളുടെ 80%ത്തിലധികവും ഈ മൂന്ന് രാജ്യങ്ങളില്‍നിന്നുള്ളവരാണ്.

'നിയമപരമായ പദവി ശരിയാക്കാന്‍ ഈ അവസരം പ്രയോജനപ്പെടുത്തണമെന്ന് ഞങ്ങള്‍ എല്ലാവരോടും അഭ്യര്‍ത്ഥിക്കുന്നു,' തൊഴില്‍ മന്ത്രാലയം വ്യക്തമാക്കി.

The Ministry of Labor in Oman has announced that the grace period for visa renewals will end on July 31. Residents and employers are urged to complete all renewal procedures before the deadline to avoid penalties.