മസ്‌കത്ത്: വാഹനമോടിക്കുമ്പോഴുള്ള മൊബൈല്‍ ഫോണ്‍ ഉപയോഗവും സീറ്റ് ബെല്‍റ്റ് ധരിക്കാതിരിക്കലും ഉള്‍പ്പെടെയുള്ള ഗതാഗത നിയമലംഘനങ്ങള്‍ നിരീക്ഷിക്കാന്‍ ആര്‍ട്ടിഫിഷ്യല്‍ ഇന്റലിജന്‍സ് (എഐ) അധിഷ്ഠിത സ്മാര്‍ട്ട് ക്യാമറകളുമായി റോയല്‍ ഒമാന്‍ പൊലിസ്. റോഡ് സുരക്ഷ വര്‍ധിപ്പിക്കുന്നതിനും ഗതാഗത അപകടങ്ങള്‍ കുറയ്ക്കുന്നതിനുമുള്ള റോയല്‍ ഒമാന്‍ പൊലിസിന്റെ വിപുലമായ തന്ത്രത്തിന്റെ ഭാഗമാണ് ഈ സംരംഭം.

'നൂതന നിരീക്ഷണ രീതികളും കൃത്രിമബുദ്ധിയും ഉപയോഗിച്ച് മനുഷ്യ ഇടപെടലില്ലാതെ തന്നെ നിയമലംഘനങ്ങള്‍ കണ്ടെത്താന്‍ ഈ സംവിധാനങ്ങള്‍ക്ക് കഴിയും,' ഒമാന്‍ പൊലിസിലെ ട്രാഫിക് ഡയറക്ടര്‍ ജനറലായ ബ്രിഗേഡിയര്‍ എന്‍ജിനീയര്‍ അലി ബിന്‍ സുലൈം അല്‍ ഫലാഹി പറഞ്ഞു.

സിഗ്‌നല്‍ കവലകള്‍ ഉള്‍പ്പെടെയുള്ള പ്രധാന ട്രാഫിക് പോയിന്റുകളില്‍ സ്മാര്‍ട്ട് ക്യാമറകളും മോണിറ്ററിംഗ് ഉപകരണങ്ങളും സ്ഥാപിച്ചിട്ടുണ്ട്. ഡ്രൈവമാരുടെ അപകടകരമായ റോഡ് പെരുമാറ്റം തത്സമയം കണ്ടെത്തി രേഖപ്പെടുത്താന്‍ ഈ ഉപകരണങ്ങള്‍ക്ക് കഴിയും.

ALSO READ: ജിസിസി രാജ്യങ്ങളില്‍ ഏറ്റവും കുറവ് ജീവിതച്ചെലവ് ഉള്ളത് ഈ രാജ്യത്തെന്ന് റിപ്പോര്‍ട്ട്

ഒമാനിലെ പ്രധാന നിയമലംഘനങ്ങള്‍

ബ്രിഗേഡിയര്‍ അല്‍ ഫലാഹിയുടെ അഭിപ്രായത്തില്‍, ഒമാനിലെ ഏറ്റവും സാധാരണ ഗതാഗത നിയമലംഘനങ്ങള്‍ ഇവയാണ്:

• വേഗത പരിധി ലംഘനം
• റെഡ് സിഗ്‌നല്‍ ലംഘനം
• സീറ്റ് ബെല്‍റ്റ് ധരിക്കാതിരിക്കല്‍
• വാഹനമോടിക്കുമ്പോഴുള്ള മൊബൈല്‍ ഫോണ്‍ ഉപയോഗം

ഈ എഐ സംവിധാനങ്ങള്‍ക്ക് നിയമ ലംഘനങ്ങള്‍ തത്സമയം കണ്ടെത്താനാകും. ഇത് ട്രാഫിക് നിയമങ്ങള്‍ വേഗത്തിലും ഫലപ്രദമായും നടപ്പാക്കാന്‍ പൊലിസിനെ സഹായിക്കും. ആവര്‍ത്തിച്ചുള്ള നിയമലംഘനങ്ങള്‍ക്ക് ട്രാഫിക് പോയിന്റ് സിസ്റ്റത്തിന് കീഴില്‍ കര്‍ശന ശിക്ഷകള്‍ ലഭിക്കും. ഇവയില്‍ ഉള്‍പ്പെടുന്നവ:

• താല്‍ക്കാലിക ലൈസന്‍സ് സസ്‌പെന്‍ഷന്‍
• നിര്‍ബന്ധിത ഡ്രൈവിംഗ് കോഴ്‌സുകള്‍
• വാഹനം കണ്ടുകെട്ടല്‍
• ഗുരുതര കേസുകളില്‍ ലൈസന്‍സ് റദ്ദാക്കല്‍

അശ്രദ്ധമായ ഡ്രൈവിംഗ്: വര്‍ധിക്കുന്ന ആശങ്ക

ആഗോളതലത്തില്‍ വര്‍ധിച്ചുവരുന്ന ആശങ്കകള്‍ക്കിടയിലാണ് രാജ്യത്ത് അശ്രദ്ധമായ ഡ്രൈവിംഗിനെതിരെ കര്‍ശന നടപടികള്‍ സ്വീകരിക്കുന്നത്. ലോകാരോഗ്യ സംഘടനയുടെ (ഡബ്ല്യുഎച്ച്ഒ) കണക്കനുസരിച്ച്, മൊബൈല്‍ ഫോണ്‍ ഉപയോഗം ഉള്‍പ്പെടെയുള്ള അശ്രദ്ധമായ ഡ്രൈവിംഗ് റോഡ് സുരക്ഷയ്ക്ക് വലിയ ഭീഷണിയാണ് ഉയര്‍ത്തുന്നത്.

'വാഹനമോടിക്കുമ്പോള്‍ മൊബൈല്‍ ഫോണ്‍ ഉപയോഗിക്കുന്നത് അപകട സാധ്യത ഏകദേശം നാലിരട്ടി വര്‍ധിപ്പിക്കുന്നു, അത് ഹാന്‍ഡ്‌ഹെല്‍ഡ് ആയാലും ഹാന്‍ഡ്‌സ്ഫ്രീ ആയാലും. ടെക്സ്റ്റിംഗ് ഇതിലും അപകടകരമാണ്, കാരണം ഇത് ഡ്രൈവറുടെ പ്രതികരണ സമയത്തെയും ശ്രദ്ധയെയും സാരമായി ബാധിക്കുന്നു,' ഡബ്ല്യുഎച്ച്ഒ റിപ്പോര്‍ട്ട് വ്യക്തമാക്കുന്നു.

ലോകമെമ്പാടും പ്രതിവര്‍ഷം 1.19 ദശലക്ഷം ആളുകള്‍ റോഡ് അപകടങ്ങളില്‍ മരിക്കുന്നു. 20 മുതല്‍ 50 ദശലക്ഷം വരെ ആളുകള്‍ക്ക് മാരകമല്ലാത്ത പരുക്കുകള്‍ സംഭവിക്കുന്നു. ചികിത്സാ ചെലവുകളും ഉല്‍പ്പാദനക്ഷമത നഷ്ടവും കാരണം പല രാജ്യങ്ങളിലും ജിഡിപിയുടെ 3% വരെ നഷ്ടം ഈ അപകടങ്ങള്‍ മൂലം ഉണ്ടാകുന്നു.

റോഡ് സുരക്ഷ ഉറപ്പാക്കാന്‍ എഐ

മുന്‍കരുതല്‍ നടപടികളിലൂടെയും സാങ്കേതികവിദ്യാധിഷ്ഠിത നടപ്പാക്കലിലൂടെയും ഒമാനില്‍ സുരക്ഷിതമായ റോഡുകള്‍ സൃഷ്ടിക്കുക എന്നതാണ് പൊലിസിന്റെ എഐ സംരംഭത്തിന്റെ ലക്ഷ്യം. 'ഈ സ്മാര്‍ട്ട് സംവിധാനങ്ങള്‍ ഡ്രൈവര്‍മാരുടെ പെരുമാറ്റം മെച്ചപ്പെടുത്താനും അപകടങ്ങള്‍ കുറയ്ക്കാനും സഹായിക്കും,' ബ്രിഗേഡിയര്‍ അല്‍ ഫലാഹി കൂട്ടിച്ചേര്‍ത്തു.

The Royal Oman Police has deployed AI-powered cameras to monitor drivers using mobile phones and not wearing seat belts. Offenders will face strict penalties, including possible jail time.