ഇന്ത്യക്കെതിരായ മൂന്നാം ടെസ്റ്റ് മത്സരങ്ങൾക്കുള്ള ഇംഗ്ലണ്ട് ടീമിനെ പ്രഖ്യാപിച്ചു. ടീമിൽ പേസർ ജോഫ്ര ആർച്ചർ ഇടം നേടി. ക്രിസ് വോക്സ് നയിക്കുന്ന ബൗളിംഗ് നിരയിൽ ആർച്ചർ കൂടിയെത്തുമ്പോൾ ഇംഗ്ലണ്ട് ബൗളിംഗ് നിര കൂടുതൽ കരുത്തുറ്റതായി മാറുമെന്ന് ഉറപ്പാണ്. ഇംഗ്ലണ്ടിനായി ടെസ്റ്റ് ക്രിക്കറ്റിൽ 13 മത്സരങ്ങളിൽ മാത്രമാണ് ആർച്ചർ കളിച്ചിട്ടുള്ളത്. ഇതിൽ 42 വിക്കറ്റുകൾ സ്വന്തമാക്കാനും താരത്തിന് സാധിച്ചിട്ടുണ്ട്. മൂന്ന് തവണ താരം റെഡ് ബോൾ ക്രിക്കറ്റിൽ അഞ്ച് വിക്കറ്റുകൾ സ്വന്തമാക്കിയിട്ടുണ്ട്. ജൂലൈ 10 മുതൽ 14 വരെയാണ് മൂന്നാം  ടെസ്റ്റ് മത്സരം ആരംഭിക്കുന്നത്. 

പരമ്പരയിലെ ആദ്യ മത്സരത്തിൽ ഇന്ത്യ പരാജയപ്പെട്ടിരുന്നു. അഞ്ച് വിക്കറ്റുകൾക്കായിരുന്നു ഇംഗ്ലണ്ട് ഇന്ത്യയെ വീഴ്ത്തിയത്. മത്സരത്തിൽ ഇന്ത്യ ഉയർത്തിയ 371 റൺസ് വിജയലക്ഷ്യം പിന്തുടർന്നിറങ്ങിയ ഇംഗ്ലണ്ട് അഞ്ചു വിക്കറ്റുകൾ ബാക്കിനിൽക്കെ അനായാസമായി ലക്ഷ്യം മറികടക്കുകയായിരുന്നു. 

അതേസമയം മൂന്നാം മത്സരത്തിൽ സ്റ്റാർ പേസർ ജസ്പ്രീത് ബുംറ ഇന്ത്യൻ ടീമിലേക്ക് മടങ്ങിയെത്തുമെന്നാണ് പ്രതീക്ഷിക്കുന്നത്. രണ്ടാം മത്സരത്തിൽ ബുംറ കളിച്ചിരുന്നില്ല. ഉയർന്ന ജോലിഭാരം കാരണം ബുംറക്ക് വിശ്രമം അനുവദിക്കാൻ ടീം മാനേജ്മെന്റ് തീരുമാനിക്കുകയായിരുന്നു. 

ഒന്നാം ടെസ്റ്റിൽ ഇന്ത്യൻ ബൗളിംഗ് നിരയിൽ നിർണായകമായ പ്രകടനം കാഴ്ചവെച്ചത് ബുംറയായിരുന്നു. ആദ്യ ഇന്നിങ്സിൽ അഞ്ച് വിക്കറ്റുകൾ ആയിരുന്നു ബുംറ നേടിയിരുന്നത്. അതുകൊണ്ടുതന്നെ താരത്തിന്റെ തിരിച്ചുവരവ് ഇന്ത്യയ്ക്ക് കൂടുതൽ ആത്മവിശ്വാസം നൽകും. 

നിലവിൽ പരമ്പരയിൽ ഓരോ മത്സരങ്ങൾ വീതം വിജയിച്ചുകൊണ്ട് ഇരു ടീമുകളും ഒപ്പത്തിനൊപ്പമാണ്. ആദ്യ മത്സരം പരാജയപ്പെട്ട ഇന്ത്യ രണ്ടാം ടെസ്റ്റിൽ ശക്തമായി തിരിച്ചുവരവ് നടത്തി വിജയം കൈപ്പിടിയിലാക്കുകയായിരുന്നു. മൂന്നാം മത്സരത്തിലും ഈ വിജയ പരമ്പര തുടരാനായിരിക്കും ഇന്ത്യ ലക്ഷ്യം വെക്കുക. 

ഇംഗ്ലണ്ട് പ്ലെയിങ് ഇലവൻ

സാക്ക് ക്രാളി, ബെൻ ഡക്കറ്റ്, ഒല്ലി പോപ്പ്, ജോറൂട്ട്, ഹാരി ബ്രൂക്ക്, ബെൻ സ്റ്റോക്സ് (ക്യാപ്റ്റൻ), ജാമി സ്മിത്ത് (വിക്കറ്റ് കീപ്പർ), ക്രിസ് വോക്സ്, ബ്രൈഡൺ കാർസെ, ജോഫ്ര ആർച്ചർ, ഷോയിബ് ബഷീർ.

England have announced their squad for the third Test against India Pacer Jofra Archer has been included in the squad