ദുബൈ: ദുബൈയിലെ നായിഫില്‍ ടൂറിസം കമ്പനിയുടെ ഓഫീസില്‍ കവര്‍ച്ച നടത്തിയ 48 വയസ്സുകാരനായ അറബ് പൗരന് ദുബൈ ഫസ്റ്റ് ഇന്‍സ്റ്റന്‍സ് കോടതി മൂന്ന് വര്‍ഷം തടവും 2,47,000 ദിര്‍ഹം പിഴയും വിധിച്ചു. ജയില്‍ ശിക്ഷ പൂര്‍ത്തിയാക്കിയ ശേഷം പ്രതിയെ നാടുകടത്താനും കോടതി ഉത്തരവിട്ടു. വിധി അപ്പീല്‍ കോടതി ശരിവച്ചു.

ALSO READ: ജിസിസിയിലെ ഏറ്റവും വലിയ ലുലുവിന്റെ ലോട്ട് സ്റ്റോര്‍ അല്‍ഐനില്‍ തുറന്നു

കേസ് രേഖകള്‍ പ്രകാരം, 2025 മാര്‍ച്ചിലാണ് സംഭവം നടന്നത്. മറ്റ് അഞ്ച് പേര്‍ക്കൊപ്പം ചേര്‍ന്നാണ് പ്രധാന പ്രതി ടൂറിസം കമ്പനിയുടെ ഓഫീസില്‍ അതിക്രമിച്ച് കയറിയത്. തുടര്‍ന്ന് രണ്ട് ജീവനക്കാരെ ബന്ദികളാക്കിയ ശേഷം, കമ്പനിയുടെ സേഫില്‍ നിന്ന് 2,47,000 ദിര്‍ഹം കവര്‍ച്ച ചെയ്യുകയായിരുന്നു. കമ്പനി ഉടമയുടെ മൊഴി അനുസരിച്ച്, ഒരാള്‍ ഓഫീസിന്റെ വാതിലില്‍ മുട്ടി. തുറന്നപ്പോള്‍ ആറംഗ സംഘം ബലം പ്രയോഗിച്ച് അകത്തുകടന്നു. പ്രധാന പ്രതി കത്തി ഉപയോഗിച്ച് ഭീഷണിപ്പെടുത്തി സേഫ് തുറക്കാന്‍ ആവശ്യപ്പെട്ടു, മറ്റുള്ളവര്‍ ഉടമയെയും മറ്റൊരു ജീവനക്കാരനെയും ആക്രമിച്ചു.

സംഘത്തിലെ ഒരാള്‍ ഉടമയുടെ കൈയില്‍ നിന്ന് താക്കോല്‍ പിടിച്ചുപറിച്ച് സേഫ് തുറന്ന് പണം കവര്‍ന്ന ശേഷം സംഭവസ്ഥലത്ത് നിന്ന് രക്ഷപ്പെടുകയായിരുന്നു.

ALSO READ: 13 വര്‍ഷം വാര്‍ഷിക അവധി ഉപയോഗിച്ചില്ല; മുന്‍ജീവനക്കാരന്‌ 59,000 ദിര്‍ഹം നഷ്ടപരിഹാരം നല്‍കാന്‍ ഉത്തരവിട്ട് അബൂദബി കോടതി

ദുബൈ പൊലിസിന്റെ ക്രിമിനല്‍ ഇന്‍വെസ്റ്റിഗേഷന്‍ വിഭാഗം പ്രധാന പ്രതിയെ മറ്റൊരു എമിറേറ്റില്‍ വെച്ചാണ് അറസ്റ്റ് ചെയ്തത്. ചോദ്യം ചെയ്യലില്‍, പ്രതി കവര്‍ച്ചയില്‍ തന്റെ പങ്ക് സമ്മതിക്കുകയും ആഫ്രിക്കന്‍ വംശജരായ മറ്റ് പ്രതികള്‍ തന്നെ നിര്‍ബന്ധിച്ചതാണെന്ന് അവകാശപ്പെടുകയും ചെയ്തു. തന്റെ മൊബൈല്‍ ഫോണ്‍, വ്യക്തിഗത രേഖകള്‍ എന്നിവ മറ്റ് പ്രതികള്‍ മോഷ്ടിച്ചിരുന്നുവെന്നും, മദ്യം കയറ്റുമതി ചെയ്യുന്നതിന്  സഹായിച്ചാല്‍ മാത്രമേ അവ തിരികെ നല്‍കൂ എന്ന് അവര്‍ ആവശ്യപ്പെട്ടതായും പ്രതി വാദിച്ചു. സംശയം തോന്നാതിരിക്കാന്‍ പരമ്പരാഗത ഇമാറാത്തി വസ്ത്രം ധരിക്കാന്‍ ആവശ്യപ്പെട്ടതായും ഇയാള്‍ പറഞ്ഞു.

പ്രതിയുടെ വാദങ്ങള്‍ തള്ളിയ കോടതി, കവര്‍ച്ച, നിയമവിരുദ്ധ തടങ്കല്‍, ക്രിമിനല്‍ ഗൂഢാലോചന എന്നീ കുറ്റങ്ങള്‍ ചുമത്തിയാണ് പ്രതിയെ ശിക്ഷിച്ചത്.

Dubai court jails Arab citizen for 3 years and imposes Dh247,000 fine after conviction for armed robbery at gunpoint.