നമ്മുടെ ജി മെയിലിലേക്ക് ദിവസവും ധാരാളം മെയിലുകളാണ് വന്നു നിറയാറുള്ളത്. അതില്‍ ഭൂരിഭാഗവും ആവശ്യമില്ലാത്ത ജങ്ക് മെയിലുകളും പ്രൊമോഷണല്‍ ഇമെയിലുകളും ന്യൂസ് ലെറ്ററുകളുമാകും. ഇത് കാരണം ബുദ്ധിമുട്ടുന്നവരും നിരവധിയാണ്. നമ്മള്‍ വിവിധ വെബ്‌സൈറ്റുകള്‍ സന്ദര്‍ശിക്കുമ്പോള്‍ അറിഞ്ഞോ അറിയാതെയോ സബ്‌സ്‌ക്രൈബ് ചെയ്യുന്നതിന്റെ തുടര്‍ച്ചയാണ് ഇത്തരം പ്രൊമോഷണല്‍ ഇമെയിലുകള്‍. 

അധികസമയവും നമ്മള്‍ക്ക് ആവശ്യമുള്ള മെയിലുകള്‍ ശ്രദ്ധിക്കാതെ പോകുന്നതിന്റെ പ്രധാന കാരണവും ഇത്തരം അനാവശ്യ മെയിലുകള്‍ തന്നെയാണ്. എന്നാല്‍ ഈ ശല്യമൊഴിവാക്കാനായി ഇപ്പോള്‍ പുതിയ അപ്‌ഡേറ്റ് കൊണ്ടുവന്നിരിക്കുകയാണ് ഗൂഗിള്‍. പ്രമോഷണല്‍ ഇമെയിലുകള്‍ ബ്ലോക്ക് ചെയ്യുന്ന പുതിയ അപ്‌ഡേറ്റുമായാണ് ഗൂഗിള്‍ എത്തുന്നത്.

വെബ് പേജിലെയോ ജിമെയിലിന്റെ ആപ്പിലെയോ ഇടത് ഭാഗത്തായി വരുന്ന നാവിഗേഷന്‍ സെക്ഷനിലാണ് പുതിയ ഓപ്ഷന്‍ ഉള്‍പ്പെടുത്തിയിരിക്കുന്നത്. ഇതില്‍ ക്ലിക്ക് ചെയ്ത് നമുക്ക് ന്യൂസ്ലെറ്ററുകളും പ്രൊമോഷണല്‍ മെയിലുകളും മറ്റും അയക്കുന്നവരുടെ ലിസ്റ്റ് എടുക്കാന്‍ ക!ഴിയും. ഇതില്‍ ഓരോന്നിന്റെയും വലതു വശത്തും 'അണ്‍സബ്‌സ്‌ക്രൈബ്' ബട്ടണ്‍ കാണാം. ഇതുപയോഗിച്ച് അനാവശ്യ മെയിലുകള്‍ ഒഴിവാക്കാം. പേഴ്‌സണല്‍ അക്കൗണ്ടുകളിലും പ്രൊഫഷണല്‍ അക്കൗണ്ടുകളിലും അടക്കം ജൂലൈ പകുതിയോടെ ഈ ഫീച്ചര്‍ ലഭ്യമാകും.