തിരുവനന്തപുരം: കേരള സർവകലാശാലയിൽ ഭരണ പ്രതിസന്ധി തുടരുന്നു. ഡിജിറ്റൽ ഫയലുകൾ പൂർണമായി തന്റെ നിയന്ത്രണത്തിൽ വേണമെന്ന വൈസ് ചാൻസലർ ഡോ. മോഹനൻ കുന്നുമ്മലിന്റെ ആവശ്യം സർവീസ് പ്രൊവൈഡർമാർ തള്ളി. സൂപ്പർ അഡ്മിൻ ആക്സസ് വി.സിക്ക് മാത്രം നൽകണമെന്ന നിർദേശവും ഇ-ഫയലിംഗ് സേവനദാതാക്കൾ അംഗീകരിച്ചില്ല.

സർവകലാശാലയുമായി കരാർ ഒപ്പിട്ട കെൽട്രോണിന്റെ അനുമതി ഇല്ലാതെ ഫയലുകൾ കൈമാറാനാകില്ലെന്ന നിലപാടാണ് ടെക്നോപാർക്കിലെ സ്വകാര്യ കമ്പനിയായ സർവീസ് പ്രൊവൈഡർമാർ സ്വീകരിച്ചത്. വി.സി നേരിട്ട് ബന്ധപ്പെട്ടെങ്കിലും കെൽട്രോൺ നിർദേശിക്കുന്നവർക്ക് മാത്രമേ ഫയലുകൾ അയക്കാനാകൂവെന്ന് കമ്പനി വ്യക്തമാക്കി. രജിസ്ട്രാറുടെ അഡ്മിൻ അധികാരം പിൻവലിക്കണമെന്ന വി.സിയുടെ ആവശ്യവും പ്രൊവൈഡർമാർ നിരസിച്ചു.

കഴിഞ്ഞ ദിവസം വി.സി ചുമതലപ്പെടുത്തിയ രജിസ്ട്രാർ മിനി കാപ്പന് ഫയലുകൾ അയക്കണമെന്ന് നിർദേശിച്ചിരുന്നു. എന്നാൽ, ഇത് നടപ്പാകാതെ വന്നതോടെ, സസ്പെൻഷൻ റദ്ദാക്കപ്പെട്ട രജിസ്ട്രാർ കെ.എസ്. അനിൽകുമാറിന് ഫയലുകൾ അയക്കാനാണ് പ്രൊവൈഡർമാർ തീരുമാനിച്ചത്. ഇതിനെതിരെ, ഫയലുകൾ തനിക്ക് നേരിട്ട് അയക്കണമെന്ന് വി.സി ആവശ്യപ്പെട്ടു.

ALSO READ: പ്രായപൂർത്തിയാകാത്ത പെൺകുട്ടിക്ക് നേരെ ലൈംഗികാതിക്രമം: സിപിഐ എം നഗരസഭ ചെയർമാൻ അറസ്റ്റിൽ

രജിസ്ട്രാർ സ്ഥാനത്ത് മിനി കാപ്പൻ തുടരും

മിനി കാപ്പനോട് തൽക്കാലം രജിസ്ട്രാർ ഇൻ ചാർജ് സ്ഥാനത്ത് തുടരാൻ വി.സി നിർദേശിച്ചു. തന്നെ ഈ സ്ഥാനത്ത് നിന്ന് ഒഴിവാക്കണമെന്നായിരുന്നു മിനി കാപ്പന്റെ ആവശ്യം. എന്നാൽ, പകരം ക്രമീകരണം ഒരുക്കാമെന്ന് വി.സി ഉറപ്പ് നൽകി. ഇടത് സിന്ഡിക്കേറ്റ് അംഗങ്ങൾ മിനി കാപ്പനിലേക്കുള്ള ഫയൽ നീക്കം തടഞ്ഞതിനെ തുടർന്നാണ് ഇവർ ഒഴിവാക്കണമെന്ന ആവശ്യം ഉന്നയിച്ചത്.

സിന്ഡിക്കേറ്റ് തീരുമാനങ്ങൾക്ക് വി.സിയുടെ എതിർപ്പ്

കെ.എസ്. അനിൽകുമാർ അയക്കുന്ന ഫയലുകൾ തീരുമാനമെടുക്കാതെ വി.സി തിരിച്ചയക്കുകയാണ്. ജോയിന്റ് രജിസ്ട്രാറുമാരോട് നേരിട്ട് ഫയലുകൾ അയക്കാൻ വി.സി നിർദേശിച്ചു. സിന്ഡിക്കേറ്റ് യോഗം ഉടൻ വിളിക്കേണ്ടതില്ലെന്നും വി.സി വ്യക്തമാക്കി. ഭാരതാംബ വിഷയവുമായി ബന്ധപ്പെട്ട വിവാദങ്ങളാണ് കേരള സർവകലാശാലയെ പ്രതിസന്ധിയിലാക്കിയത്. പുതിയ കോഴ്സുകളിലേക്കുള്ള അഡ്മിഷൻ, പരീക്ഷാ നടത്തിപ്പ്, സർട്ടിഫിക്കറ്റ് വിതരണം തുടങ്ങിയ ദൈനംദിന പ്രവർത്തനങ്ങൾ താളംതെറ്റിയിരിക്കുകയാണ്. സർവകലാശാലകളിലെ ഭരണപ്രതിസന്ധി പരിഹരിക്കാൻ ഗവർണറുമായി ചർച്ച നടത്താൻ സർക്കാർ ശ്രമിക്കുന്നതായി റിപ്പോർട്ടുകൾ. പ്രശ്നങ്ങൾക്ക് പരിഹാരം കാണാൻ മുൻകൈ എടുക്കാനാണ് സർക്കാരിന്റെ തീരുമാനം.

Kerala University grapples with an ongoing administrative crisis as Vice-Chancellor Dr. Mohanan Kunnummal’s attempt to control digital files is rejected by service providers. The refusal to grant exclusive super admin access and the dismissal of demands to revoke the registrar’s admin rights have intensified tensions. Daily operations, including admissions, exams, and certificate distribution, are disrupted, while the government explores discussions with the Governor to resolve the deadlock