മാഞ്ചസ്റ്റർ: ഇംഗ്ലണ്ടിനെതിരായ നാലാം ടെസ്റ്റ് മത്സരത്തിൽ യുവതാരം അൻഷുൽ കംബോജ് ഇന്ത്യയ്ക്കായി ടെസ്റ്റ് ക്രിക്കറ്റിൽ അരങ്ങേറ്റം കുറിച്ചിരുന്നു. മത്സരം നടക്കുന്ന മാഞ്ചസ്റ്ററിലെ ഓൾഡ് ട്രാഫോഡിൽ ടെസ്റ്റ് ക്രിക്കറ്റിൽ അരങ്ങേറ്റം കുറിക്കുന്ന പതിനൊന്നാമത്തെ ഇന്ത്യൻ താരമാണ് അൻഷുൽ.

ഇന്ത്യൻ ഇതിഹാസ സ്പിന്നർ അനിൽ കുംബ്ലെക്ക് ശേഷം ഓൾഡ് ട്രാൻസ്ഫോർഡിൽ അരങ്ങേറ്റം കുറിക്കുന്ന ആദ്യ ഇന്ത്യൻ ബൗളർ കൂടിയാണ് അൻഷുൽ. 1990ലായിരുന്നു അനിൽ കുംബ്ലെ മാഞ്ചസ്റ്ററിൽ തന്റെ ആദ്യ ടെസ്റ്റ് മത്സരം കളിച്ചത്. 1974ന് ശേഷം മാഞ്ചസ്റ്ററിൽ അരങ്ങേറ്റം കുറിക്കുന്ന ആദ്യ ഇന്ത്യൻ പേസർ കൂടിയാണ് അൻഷുൽ കംബോജ്. 1974ൽ മദൻ ലാൽ ആയിരുന്നു ഇതിനുമുമ്പ് ഈ വേദിയിൽ അരങ്ങേറ്റം കുറിച്ചിരുന്നത്

പരുക്കേറ്റ ഇടംകയ്യൻ പേസർ അർഷ്ദീപ് സിങ്ങിന്റെ പകരക്കാരനായാണ് അൻഷുൽ കംബോജ് ഇന്ത്യൻ ടീമിൽ ഇടം നേടിയത്. ഇംഗ്ലണ്ടിനെതിരെയുള്ള അനൗദ്യോഗിക ടെസ്റ്റ് പരമ്പരയിൽ ഇന്ത്യ എ ടീമിൽ അൻഷുൽ കളിച്ചിരുന്നു. രണ്ട് മത്സരങ്ങളിൽ നിന്നും അഞ്ചു വിക്കറ്റുകൾ താരം സ്വന്തമാക്കിയിരുന്നു. ഇതിനു പുറമെ ബാറ്റിങ്ങിൽ അർദ്ധ സെഞ്ച്വറി നേടിയും അൻഷുൽ തിളങ്ങി.

2024-25 രഞ്ജി ട്രോഫിയിൽ കേരളത്തിനെതിരെ മിന്നും ബൗളിംഗ് പ്രകടനം നടത്തി തിളങ്ങിയ താരമാണ് അൻഷുൽ. ഒറ്റ ഇന്നിങ്സിൽ  10 വിക്കറ്റുകൾ നേടിയാണ് താരം തിളങ്ങിയത്. കേരളത്തിനെതിരെ 30.1 ഓവറിൽ ഒമ്പത് മെയ്ഡൻ ഓവറുകൾ ഉൾപ്പെടെ 49 റൺസ് വഴങ്ങിയാണ് കംബോജ് പത്ത് വിക്കറ്റ് വീഴ്ത്തിയത്.

രഞ്ജി ട്രോഫിയിൽ ഒരു ഇന്നിങ്സിൽ 10 വിക്കറ്റുകൾ നേടുന്ന മൂന്നാമത്തെ താരം കൂടിയാണ് കംബോജ്. കഴിഞ്ഞ ഐപിഎല്ലിൽ ചെന്നൈ സൂപ്പർ കിങ്സിന് വേണ്ടിയാണ് കംബോജ് കളിച്ചത്. എംഎസ് ധോണിയുടെ കീഴിൽ എട്ട് മത്സരങ്ങളിലാണ് താരം കളത്തിൽ ഇറങ്ങിയത്. ഇതിൽ താരം എട്ട് വിക്കറ്റുകളും നേടിയിട്ടുണ്ട്. 

നിലവിൽ പരമ്പരയിൽ ഇംഗ്ലണ്ട് 2-1ന് മുന്നിലാണ്. ആദ്യ മത്സരത്തിൽ ഇംഗ്ലണ്ട് വിജയിച്ചപ്പോൾ രണ്ടാം മത്സരത്തിൽ ഇന്ത്യ വിജയിച്ചുകൊണ്ട് പരമ്പരയിൽ ഒപ്പം പിടിക്കുകയായിരുന്നു. മൂന്നാം മത്സരത്തിൽ ബെൻ സ്റ്റോക്‌സും സംഘവും വീണ്ടും വിജയിച്ചുകൊണ്ട് പരമ്പരയിൽ മുന്നിലെത്തുകയായിരുന്നു. പരമ്പര സ്വന്തമാക്കണമെങ്കിൽ ഇന്ത്യക്ക് ഇനിയുള്ള രണ്ട് മത്സരങ്ങളും വിജയിക്കുക തന്നെ വേണം. 

ഇന്ത്യ പ്ലെയിങ് ഇലവൻ

യശസ്വി ജയ്‌സ്വാൾ, ശുഭ്മാൻ ഗിൽ (ക്യാപ്റ്റൻ), രവീന്ദ്ര ജഡേജ, വാഷിംഗ്ടൺ സുന്ദർ, ഷാർദുൽ താക്കൂർ, ഋഷഭ് പന്ത് (വിക്കറ്റ് കീപ്പർ), കെ എൽ രാഹുൽ, സായ് സുദർശൻ, അൻഷുൽ കംബോജ്, ജസ്പ്രീത് ബുംറ, മുഹമ്മദ് സിറാജ്.

Young pacer Anshul Kamboj has debut for the fourth Test against England in Manchester Old Trafod