ഇംഗ്ലണ്ടിനെതിരായ നാലാം ടെസ്റ്റിൽ അപൂർവ നേട്ടം കൈപ്പിടിയിലാക്കി ഇന്ത്യൻ വിക്കറ്റ് കീപ്പർ ധ്രുവ് ജുറൽ. പരുക്കേറ്റ റിഷബ് പന്തിന്റെ പകരക്കാരനായി കളത്തിലിറങ്ങി കീപ്പിങ്ങിൽ മികച്ച പ്രകടനം നടത്തിയാണ് ജുറൽ പുതിയ നേട്ടം കൈവരിച്ചത്. മത്സരത്തിൽ രണ്ട് സ്റ്റമ്പിങാണ് രാജസ്ഥാൻ റോയൽസ് താരം നടത്തിയത്. ടെസ്റ്റിൽ പകരക്കാരനായി ഇറങ്ങി ഒരു ഇന്നിംഗ്സിൽ രണ്ട് ബാറ്റർമാരെ സ്റ്റമ്പ് ചെയ്ത് പുറത്താക്കുന്ന ആദ്യ താരമായാണ് ജുറൽ മാറിയത്. പകരക്കാരനായി ഇറങ്ങിയ വിക്കറ്റ് കീപ്പർമാർ ഒരു ഇന്നിംഗ്സിൽ ഒരു ബാറ്ററെ സ്റ്റമ്പ് ചെയ്തിട്ടുണ്ടെങ്കിലും, ടെസ്റ്റ് ക്രിക്കറ്റ് ചരിത്രത്തിൽ ആദ്യമായാണ് ഒരു വിക്കറ്റ് കീപ്പർ രണ്ട് ബാറ്റർമാരെ സ്റ്റമ്പ് ചെയ്ത് മടക്കി അയക്കുന്നത്. 

മാഞ്ചസ്റ്ററിൽ നടക്കുന്ന മത്സരത്തിന്റെ ആദ്യ ദിവസമാണ് പന്തിന് പരുക്ക് പറ്റിയത്.  48 പന്തിൽ 37 റൺസ് എടുത്തു നിൽക്കുമ്പോൾ ഇംഗ്ലീഷ് പേസർ ക്രിസ് വോക്സിൻ്റേ ഓവറിൽ റിവേഴ്സ് സ്വീപ്പിന് ശ്രമിച്ച ബോൾ കോണ്ട് പന്തിൻ്റേ വലതു കാൽ വിരലിന് പരുക്ക് പറ്റിയാണ് പന്ത് റിട്ടേർട്ട് ഹർട്ടായത്. എന്നാൽ പരുക്ക് പോലും വകവെക്കാതെ പന്ത് രണ്ടാം ദിവസവും ഇന്ത്യക്കായി കളത്തിൽ ഇറങ്ങിയിരുന്നു. 74 പന്തിൽ 54 റൺസ് നേടിയാണ് പന്ത് മടങ്ങിയത്. മൂന്ന് ഫോറുകളും രണ്ട് സിക്സുകളും അടങ്ങുന്നതാണ് താരത്തിന്റെ ഇന്നിംഗ്സ്. 

ALSO READ: വിൻഡീസിനെ നിലംതൊടാതെ പറത്തി; ഓസ്‌ട്രേലിയൻ കൊടുങ്കാറ്റിൽ പിറന്നത് ചരിത്രം

നിലവിൽ മത്സരം നാലാം ദിവസം നിർത്തുമ്പോൾ ഇംഗ്ലണ്ട് ഏഴ് വിക്കറ്റ് നഷ്ടത്തിൽ 544 റൺസ് എന്ന നിലയിലാണ്. ഇംഗ്ലണ്ടിനായി ജോ റൂട്ട് സെഞ്ച്വറി നേടി തിളങ്ങി.  248 പന്തിൽ 150 റൺസാണ് റൂട്ട് അടിച്ചെടുത്തത്. 14 ഫോറുകൾ അടങ്ങുന്നതാണ് താരത്തിന്റെ ഇന്നിങ്‌സ്. ബെൻ ഡക്കറ്റ് 94 റൺസും സാക്ക് ക്രാളി 84 റൺസും ഒല്ലി പോപ്പ് 71 റൺസും നേടി. ക്യാപ്റ്റൻ ബെൻ സ്റ്റോക്സ് 77 റൺസും നേടി ക്രീസിൽ തുടരുകയാണ്. 

ഇന്ത്യക്കായി രവീന്ദ്ര ജഡേജ, വാഷിംഗ്ടൺ സുന്ദർ എന്നിവർ രണ്ട് വീതം വിക്കറ്റുകളും ആകാശ് ദീപ്, ജസ്പ്രീത് ബുംറ, അൻഷുൽ കാംബോജ് എന്നിവർ ഓരോ വിക്കറ്റും നേടി.

ഒന്നാം ഇന്നിങ്സിൽ ഇന്ത്യ 358 റൺസാണ് നേടിയത്. ഇന്ത്യക്കായി യശ്വസി ജെയ്‌സ്വാൾ, സായ് സുദർശൻ, റിഷബ് പന്ത് എന്നിവർ അർദ്ധ സെഞ്ച്വറി നേടി മികച്ച പ്രകടനമാണ്‌ നടത്തിയത്. 151 പന്തിൽ ഏഴ് ഫോറുകൾ ഉൾപ്പെടെ 61 റൺസ് ആണ് സുദർശൻ നേടിയത്. ജെയ്‌സ്വാൾ 107 പന്തിൽ 58 റൺസും നേടി. 10 ഫോറുകളും ഒരു സിക്സും അടങ്ങുന്നതായിരുന്നു താരത്തിന്റെ ഇന്നിങ്സ്. പന്ത് 75 പന്തിൽ മൂന്ന് ഫോറുകളും രണ്ട് സിക്സുകളും ഉൾപ്പെടെ 54 റൺസും നേടി. കെഎൽ രാഹുൽ 46 റൺസും ഷാർദുൽ താക്കൂർ 41 റൺസും സ്വന്തമാക്കി. 

ഇംഗ്ലണ്ട് ബൗളിങ്ങിൽ ക്യാപ്റ്റൻ ബെൻ സ്റ്റോക്സ് അഞ്ച് വിക്കറ്റുകൾ വീഴ്ത്തി മികച്ച പ്രകടനമാണ്‌ നടത്തിയത്. ജോഫ്ര ആർച്ചർ മൂന്ന് വിക്കറ്റുകളും ക്രിസ് വോക്‌സ്, ലിയാം ഡാവ്സൻ ഓരോ വിക്കറ്റും സ്വന്തമാക്കി.

Indian wicketkeeper Dhruv Jural achieved a rare feat in the fourth Test against England