തൃശൂർ: വിവാഹം കഴിക്കാമെന്ന വാഗ്ദാനത്തിൽ പ്രലോഭിപ്പിച്ച് യുവതിയെ ലോഡ്ജിലേക്ക് വിളിച്ചുവരുത്തി ലൈംഗികമായി പീഡിപ്പിച്ച കേസിൽ ബസ് ഡ്രൈവർ അറസ്റ്റിൽ. ചിയ്യാരം സൗത്ത് മുനയം സ്വദേശി മേനോത്ത് പറമ്പിൽ വീട്ടിൽ അക്ഷയ് (25) ആണ് കൊടുങ്ങല്ലൂർ പൊലിസിന്റെ പിടിയിലായത്. പരാതിക്കാരിയായ യുവതി ജോലിക്ക് സ്ഥിരമായി യാത്ര ചെയ്യുന്ന ബസിൽ ഡ്രൈവറായി ജോലി ചെയ്യുന്നയാളാണ് അക്ഷയ്. ബസ് യാത്രയ്ക്കിടെ ഉടലെടുത്ത പരിചയം പിന്നീട് പ്രണയത്തിലേക്ക് വഴിമാറി. തുടർന്ന്, വിവാഹ വാഗ്ദാനം നൽകി യുവതിയെ തൃശൂർ നഗരത്തിലെ ഒരു ലോഡ്ജിലേക്ക് കൊണ്ടുപോയ പ്രതി, പീഡനത്തിന് ഇരയാക്കുകയായിരുന്നു. ഈ മാസം 17-നാണ് സംഭവം നടന്നത്. ലോഡ്ജിൽ മുറിയെടുത്ത ശേഷം, യുവതിക്ക് മയങ്ങുന്ന പാനീയം നൽകിയ ശേഷമാണ് പ്രതി പീഡനം നടത്തിയത്. വിവാഹ വാഗ്ദാനത്തിൽ വിശ്വസിച്ച യുവതി അന്ന് പരാതി നൽകിയിരുന്നില്ല.

എന്നാൽ, 27-07-2025-ന് രാവിലെ 11:30-ന് കൊടുങ്ങല്ലൂർ ബസ് സ്റ്റാൻഡിൽ പ്രതി ഡ്രൈവറായി ജോലി ചെയ്യുന്ന ബസ് പാർക്ക് ചെയ്തിരുന്നപ്പോൾ, മറ്റ് സ്ത്രീകളുമായുള്ള അക്ഷയുടെ അടുപ്പം ചോദ്യം ചെയ്തതിനെ തുടർന്ന് പ്രതി യുവതിയെ അസഭ്യം പറയുകയും ആക്രമിക്കുകയും മാനഹാനി വരുത്തുകയും ചെയ്തു. ഇതോടെ, യുവതി പൊലിസിൽ പരാതി നൽകുകയായിരുന്നു.

ALSO READ: യുവതിക്ക് പാസ് അനുവദിച്ചില്ല; സ്വകാര്യ ബസ് കണ്ടക്ടർക്ക് നേരെ ക്രൂരമർദ്ദനം

പരാതിയെ തുടർന്ന് കൊടുങ്ങല്ലൂർ പൊലിസ് പ്രതിക്കെതിരെ രണ്ട് കേസുകൾ രജിസ്റ്റർ ചെയ്തു. അക്ഷയ്‌ക്കെതിരെ നേരത്തെ പ്രായപൂർത്തിയാകാത്ത കുട്ടിയെ തട്ടിക്കൊണ്ടുപോയി പീഡിപ്പിച്ച കേസ്, വിവാഹ വാഗ്ദാനം നൽകി യുവതിയെ പീഡിപ്പിച്ച കേസ്, സ്ത്രീയെ ആക്രമിച്ച് മാനഹാനി വരുത്തിയ കേസ്, ഗുരുതരമായി പരുക്കേൽക്കാൻ ഇടയാക്കുന്ന വിധം വാഹനം ഓടിച്ച കേസ് എന്നിവ ഉൾപ്പെടെ അഞ്ച് ക്രിമിനൽ കേസുകളുണ്ട്. കൊടുങ്ങല്ലൂർ, ചേർപ്പ്, നെടുപുഴ, ഫറോക്ക് എന്നീ പൊലിസ് സ്റ്റേഷനുകളിലാണ് ഈ കേസുകൾ രജിസ്റ്റർ ചെയ്തിട്ടുള്ളത്.

ALSO READ: ഷാർജയിൽ മലയാളി വിപഞ്ചികയുടെയും മകളുടെയും മരണം: അന്വേഷണം ക്രൈംബ്രാഞ്ചിന്

കൊടുങ്ങല്ലൂർ പൊലിസ് സ്റ്റേഷൻ ഇൻസ്പെക്ടർ അരുൺ ബി.കെ, സബ് ഇൻസ്പെക്ടർ സാലിം കെ, ജി.എസ്.സി.പി.ഒ മാരായ ധനേഷ്, ഷിജിൻനാഥ് എന്നിവർ ചേർന്നാണ് പ്രതിയെ അറസ്റ്റ് ചെയ്തത്.