ഡെറാഡൂൺ: ഉത്തരാഖണ്ഡിന്റെ തലസ്ഥാനമായ ഡെറാഡൂണിലെ പാൽത്താൻ ബസാറിൽ ഒരു ജ്വല്ലറിയിൽ സ്വർണമോതിരങ്ങൾ മോഷ്ടിക്കാൻ ശ്രമിച്ച യുവതിയെ കടയുടമ പിടികൂടി. എന്നാൽ, പൊലിസ് സ്ഥലത്തെത്തിയപ്പോൾ മോഷ്ടിച്ച മോതിരങ്ങൾ ഒളിപ്പിച്ച യുവതി പൊലിസിനെ ആക്രമിക്കുകയും അസഭ്യം പറയുകയും ചെയ്തു. വ്യാഴാഴ്ച നടന്ന ഈ സംഭവം സോഷ്യൽ മീഡിയയിൽ വൈറലായതോടെ വലിയ ശ്രദ്ധ നേടി.

ജ്വല്ലറിയിൽ കയറിയ യുവതി സ്വർണമോതിരങ്ങൾ മോഷ്ടിക്കുന്നതിനിടെ കടയുടമയുടെ ശ്രദ്ധയിൽപ്പെട്ടു. ഉടൻ പൊലിസിനെ വിവരമറിയിച്ചതിനെ തുടർന്ന് കോട്‌വാലി പൊലിസ് സ്റ്റേഷനിലെ ഉദ്യോഗസ്ഥർ മിനിറ്റുകൾക്കുള്ളിൽ സ്ഥലത്തെത്തി. എന്നാൽ, പൊലിസ് എത്തും മുമ്പ് മോതിരങ്ങൾ എവിടെയോ ഒളിപ്പിച്ച യുവതി, വനിതാ പൊലിസുകാർക്ക് നേരെ അക്രമാസക്തയായി. മുടി പിടിച്ചു വലിക്കുകയും തള്ളുകയും ചെയ്ത യുവതി, പൊലിസിനെതിരെ അസഭ്യവർഷം നടത്തി.

സംഭവത്തിന്റെ വീഡിയോ ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിച്ചു. വനിതാ പൊലിസ് ഉദ്യോഗസ്ഥർ നടത്തിയ പരിശോധനയിൽ ഒളിപ്പിച്ചിരുന്ന രണ്ട് സ്വർണമോതിരങ്ങൾ കണ്ടെടുത്തു. എന്നിട്ടും മോഷണം നിഷേധിച്ച യുവതി, പൊലിസിനെതിരെ അക്രമം തുടർന്നു. ഏറെ നേരത്തെ പരിശ്രമത്തിനൊടുവിൽ പൊലിസ് യുവതിയെ കീഴ്പ്പെടുത്തി.

പൊലിസ് കസ്റ്റഡിയിലായതിന് ശേഷം, യുവതി മദ്യലഹരിയിലായിരുന്നുവെന്നും മകന്റെ ചികിത്സയ്ക്കായാണ് മോഷണം നടത്തിയതെന്നും വാദിച്ചു. എന്നാൽ, പൊലിസ് ഇതിനെ ഗൗരവമായി എടുത്തിട്ടില്ല. സംഭവത്തിന് പിന്നിൽ മോഷണസംഘത്തിന്റെ പങ്കുണ്ടോ, അതോ യുവതി ഒറ്റയ്ക്കാണ് മോഷണം നടത്തിയതോ എന്ന് കണ്ടെത്താൻ പൊലിസ് അന്വേഷണം ആരംഭിച്ചു. യുവതിക്കെതിരെ മോഷണത്തിനും പൊലിസിനെ ആക്രമിച്ചതിനും കേസ് രജിസ്റ്റർ ചെയ്തിട്ടുണ്ട്.

In Dehradun’s Paltan Bazaar, a woman caught stealing gold rings from a jewellery shop attacked police upon their arrival. She hid the rings, abused officers, and physically assaulted female constables. The shop owner nabbed her during the theft, and police later recovered the rings. The woman claimed she stole for her son’s treatment and was intoxicated. Police have detained her and are investigating possible accomplices.