തിരുവനന്തപുരം: വിസി നിയമനത്തിൽ സമവായം വേണമെന്ന് ആവശ്യവുമായി മന്ത്രിമാരായ പി. രാജീവും ആർ. ബിന്ദുവും രാജ്ഭവനിലെത്തി. ഗവർണറും സർക്കാരും തമ്മിലുള്ള പോര് തുടരുന്നതിനിടെയാണ് മന്ത്രിമാർ ഗവർണറെ കണ്ടത്. വിസി നിയമനത്തിൽ സമവായം വേണമെന്ന് ആവശ്യപ്പട്ട മന്ത്രിമാർ, തീരുമാനങ്ങൾ ഏകപക്ഷീയമാകരുത് എന്നും അറിയിച്ചു. 

വിസി നിയമനവുമായി ബന്ധപ്പെട്ട് സർക്കാരും ഗവർണറും തമ്മിലുള്ള തർക്കം അനുനയത്തിലെത്തിക്കാനാണ് മന്ത്രിമാരായ പി. രാജീവും ആർ. ബിന്ദുവും ഇന്ന് രാവിലെ ഗവർണറുടെ വസതിയായ രാജ്ഭവനിലെത്തിയത്. താൽക്കാലിക വിസി നിയമനം സുപ്രിം കോടതി ഉത്തരവ് പ്രകാരമാണ് നടത്തിയതെന്ന് ഗവർണർ മറുപടി നൽകിയെന്നാണ് വിവരം. എന്നാൽ, തീരുമാനങ്ങൾ ഏകപക്ഷീയമാകരുതെന്നും സുപ്രിം കോടതിയും ഹൈക്കോടതിയും നിർദ്ദേശിച്ചത് യോജിച്ച് തീരുമാനം എടുക്കാനാണെന്നും മന്ത്രിമാർ അറിയിച്ചു. 

സംസ്ഥാനത്ത് ഏറ്റവും വലിയ തർക്കം നടക്കുന്ന കേരള യൂണിവേഴ്സിറ്റിയിലെ പ്രശ്നങ്ങൾക്കും മന്ത്രിമാർ പരിഹാരം ആവശ്യപ്പെട്ടു. സ്ഥിരം വിസിമാരെ നിയമിക്കുന്നത് ഉയർന്ന അക്കാദമിക യോഗ്യത കൂടി കണക്കിലെടുത്ത് സർക്കാർ ലിസ്റ്റിൽ നിന്ന് വേണമെന്നും മന്ത്രിമാർ ഗവർണറോട് ആവശ്യപ്പെട്ടു. നിലവിൽ ടെക്‌നിക്കൽ - ഡിജിറ്റൽ സർവകലാശാലകളിൽ സുപ്രിം കോടതി വിധിക്ക് ശേഷവും താത്കാലിക വിസിമാരാണുള്ളത്. ഈ കാര്യത്തിൽ സുപ്രിം കോടതി വിധി ലംഘിച്ചാണ് ഗവർണർ നിലപാടുണ്ടാതെന്നും മന്ത്രിമാർ ഗവർണറെ അറിയിച്ചു. 

മുഖ്യമന്ത്രി പിണറായി വിജയന്റെ നിർദേശപ്രകാരമാണ് മന്ത്രിമാർ ഗവർണറുമായി കൂടിക്കാഴ്‌ച നടത്തിയത്. തർക്കം സമവായത്തിലൂടെ പരിഹരിക്കാനാണ് സർക്കാർ ലക്ഷ്യമിടുന്നത്. എന്നാൽ, തർക്കങ്ങൾ കഴിഞ്ഞ തവണ മുഖ്യമന്ത്രി നേരിട്ട് എത്തി ചർച്ച നടത്തിയിട്ടും ഗവർണർ വഴങ്ങിയിരുന്നില്ല. അതിനാൽ മന്ത്രിമാരുടെ ഈ സന്ദർശനവും ഗുണത്തിലാകുമോ എന്ന് കണ്ടറിയണം.

അതേസമയം, തർക്കങ്ങൾക്കിടയിലും രാജ്ഭവനിലെ വിരുന്ന് സൽക്കാരത്തിന് സർക്കാർ 15 ലക്ഷം രൂപയുടെ അധിക ഫണ്ട് അനുവദിച്ചു. സ്വാതന്ത്ര്യ ദിനത്തോടനുബന്ധിച്ച് ഗവർണർ രാജ്ഭവനിൽ ഒരുക്കുന്ന ‘അറ്റ് ഹോം’ വിരുന്നിനായാണ് 15 ലക്ഷം രൂപ അനുവദിച്ചത്. ഓഗസ്റ്റ് 15 ന് പൗരപ്രമുഖർക്കും വിശിഷ്ടാതിഥികൾക്കുമായാണ് ഗവർണറുടെ വിരുന്ന് സൽക്കാരം.

Ministers P. Rajeev and R. Bindu visited the Raj Bhavan seeking a consensus on Vice Chancellor (VC) appointments, amid the ongoing tussle between the Kerala Government and the Governor. During the meeting, the ministers emphasized that decisions should not be unilateral and stressed the need for cooperation and mutual agreement in the appointment process. The visit comes at a time of heightened tensions between the two sides over university governance in the state.