ന്യൂഡൽഹി: ഡൽഹിയിലെ നജഫ്ഗഢ് മേഖലയിൽ ഭാര്യയുടെ സോഷ്യൽ മീഡിയ ഉപയോ​ഗത്തെക്കുറിച്ചുള്ള തർക്കത്തെ തുടർന്ന് ഭർത്താവ് ഭാര്യയെ കൊലപ്പെടുത്തിയ ശേഷം ആത്മഹത്യ ചെയ്യാൻ ശ്രമിച്ചതായി പൊലിസ് റിപ്പോർട്ട്.

പൊലിസ് റിപ്പോർട്ടുകൾ അനുസരിച്ച്, കൊല്ലപ്പെട്ട സ്ത്രീയും ഇ-റിക്ഷാ ഡ്രൈവറായ ഭർത്താവായ അമൻ (35) ഉം 9, 5 വയസ്സുള്ള രണ്ട് ആൺകുട്ടികൾക്കൊപ്പം ഓൾഡ് റോഷൻപുരയിൽ വാടക വീട്ടിൽ താമസിച്ചു വരികയായിരുന്നു. ഉത്തർപ്രദേശിലെ പിലിഭിത്തിൽ നിന്നുള്ളവരാണ് ഈ കുടുംബം.ചൊവ്വാഴ്ച പുലർച്ചെ 4.23-ന് നജഫ്ഗഢ് പൊലിസ് സ്റ്റേഷനിൽ ഒരു കൊലപാതക റിപ്പോർട്ട് ലഭിച്ചതിനെ തുടർന്ന് പൊലിസ് സംഘം സംഭവസ്ഥലത്തെത്തി. അവിടെ സ്ത്രീയെ മരിച്ച നിലയിൽ കണ്ടെത്തി.

"പ്രാഥമിക അന്വേഷണത്തിൽ, ഭാര്യ സോഷ്യൽ മീഡിയയിൽ റീലുകൾ നിർമ്മിക്കുന്നതിനെ ഭർത്താവ് എതിർത്തിരുന്നതായി കണ്ടെത്തി. ഏകദേശം 6,000 ഫോളോവേഴ്‌സുള്ള ഒരു സോഷ്യൽ മീഡിയ ആർട്ടിസ്റ്റായാണ് അവർ സ്വയം വിശേഷിപ്പിച്ചിരുന്നതെന്ന്," ഒരു പൊലിസ് ഉദ്യോഗസ്ഥൻ പറഞ്ഞു. ഈ വിഷയത്തിൽ ദമ്പതികൾക്കിടയിൽ പതിവായി വഴക്കുകൾ ഉണ്ടായിരുന്നതായും ഉദ്യോഗസ്ഥൻ വെളിപ്പെടുത്തി.

ചൊവ്വാഴ്ച രാത്രി ഇവർ തമ്മിലുണ്ടായ തർക്കം അതിരുകടന്നതിനെ തുടർന്ന് അമൻ ഭാര്യയെ ശ്വാസം മുട്ടിച്ച് കൊലപ്പെടുത്തുകയായിരുന്നുവെന്നാണ് പ്രാഥമിക നി​ഗമനം. തുടർന്ന് ഭർത്താവ് തൂങ്ങിമരിക്കാനും വിഷം കഴിക്കാനും ശ്രമിച്ചു. എന്നാൽ, ആ സമയത്ത് എത്തിയ പൊലിസ് അമനെ രക്ഷപ്പെടുത്തി ആർ‌ടി‌ആർ‌എം ആശുപത്രിയിൽ പ്രവേശിപ്പിക്കുകയായിരുന്നു.

അയൽവാസികളുടെയും ബന്ധുക്കളുടെയും മൊഴികൾ എടുത്തു വരുകയാണെന്നും, മൃതദേഹം പോസ്റ്റ്‌മോർട്ടത്തിനായി സൂക്ഷിച്ചിരിക്കുകയാണെന്നും, കൊലപാതകം ഉൾപ്പെടെയുള്ള  വകുപ്പുകൾ പ്രകാരം കേസ് രജിസ്റ്റർ ചെയ്തിട്ടുണ്ടെന്നും പൊലിസ് അറിയിച്ചു.