മുംബൈ: കുപ്രസിദ്ധ അധോലോക നേതാവും മുൻ എംഎൽഎയുമായ അരുൺ ഗാവ്‌ലി (76) 17 വർഷത്തെ ജയിൽവാസത്തിന് ശേഷം മോചിതനായി. 2007-ലെ ഒരു കൊലപാതക കേസിൽ ജീവപര്യന്തം തടവിന് ശിക്ഷിക്കപ്പെട്ട ഗാവ്‌ലി, സുപ്രീം കോടതി ജാമ്യം അനുവദിച്ചതിനെ തുടർന്നാണ് ബുധനാഴ്ച നാഗ്‌പൂർ സെൻട്രൽ ജയിലിൽ നിന്ന് പുറത്തിറങ്ങിയത്. അദ്ദേഹത്തെ സ്വീകരിക്കാൻ കുടുംബാംഗങ്ങളും അനുയായികളും ജയിൽ പരിസരത്ത് എത്തിയിരുന്നു.

മുംബൈയിലെ ശിവസേന നേതാവ് കാംലാക്കർ ജാംസന്ദേകറിനെ കൊലപ്പെടുത്തിയ കേസിലാണ് അരുൺ ഗാവ്‌ലിയെ വിചാരണ കോടതി ജീവപര്യന്തം തടവിന് ശിക്ഷിച്ചത്. ഈ വിധിക്കെതിരെ ബോംബെ ഹൈക്കോടതിയെ സമീപിച്ചെങ്കിലും 2019-ൽ വിചാരണ കോടതിയുടെ വിധി ഹൈക്കോടതി ശരിവെച്ചു. തുടർന്ന് സുപ്രീം കോടതിയിൽ അപ്പീൽ നൽകിയാണ് ഗാവ്‌ലിക്ക് ജാമ്യം കിട്ടിയത്.

മുംബൈ അധോലോകത്ത് നിന്ന് രാഷ്ട്രീയത്തിലേക്ക് കടന്നുവന്ന് കുപ്രസിദ്ധി നേടിയ വ്യക്തിയാണ് അരുൺ ഗാവ്‌ലി. 1970-കളിൽ സഹോദരൻ കിഷോറിനൊപ്പം മുംബൈയിലെ അധോലോകത്ത് ചുവടുറപ്പിച്ച ഗാവ്‌ലി, രാമ നായിക്കിന്റെയും ബാബു റെഷീമിന്റെയും നേതൃത്വത്തിലുള്ള 'ബൈക്കുള കമ്പനി' എന്ന ഗുണ്ടാസംഘത്തിൽ പ്രവർത്തനം ആരംഭിച്ചു. മുംബൈയിലെ ബൈക്കുള, പരേൽ മേഖലകളിൽ ഭീതി വിതച്ചിരുന്ന ഈ സംഘം, 1988-ൽ രാമ നായ്ക്ക് പൊലിസ് ഏറ്റുമുട്ടലിൽ കൊല്ലപ്പെട്ടതോടെ ഗാവ്‌ലിയുടെ നേതൃത്വത്തിലായി.

'ബൈക്കുള കമ്പനി' പിന്നീട് മുംബൈയിലെ നിരവധി ക്രിമിനൽ പ്രവർത്തനങ്ങളിൽ സജീവമായി. 1980-കളിലും 90-കളിലും ദാവൂദ് ഇബ്രാഹിമിന്റെ ഡി-കമ്പനിയുമായി ബൈക്കുള കമ്പനി നിരവധി ഏറ്റുമുട്ടലുകൾ നടത്തിയിരുന്നു. ആദ്യകാലങ്ങളിൽ ശിവസേനയുമായി അടുപ്പം പുലർത്തിയിരുന്ന ഗാവ്‌ലി, 1990-കളുടെ മധ്യത്തിൽ ശിവസേനയുമായുള്ള ബന്ധം ഉപേക്ഷിച്ച് 'അഖില ഭാരതീയ സേന' എന്ന പേരിൽ സ്വന്തം രാഷ്ട്രീയ പാർട്ടി രൂപീകരിച്ചു. 2004-ലെ തിരഞ്ഞെടുപ്പിൽ മുംബൈയിലെ ചിഞ്ച്പൊക്ലി മണ്ഡലത്തിൽ നിന്ന് എംഎൽഎയായി തിരഞ്ഞെടുക്കപ്പെടുകയും ചെയ്തു.