കോഴിക്കോട്: ഇന്റർനെറ്റ് സേവനത്തിൽ തടസവും വേഗക്കുറവുമുണ്ടെന്ന വിവാദം  കത്തിനിൽക്കെ കെ ഫോൺ കണക്ഷൻ മാത്രം ഉപയോഗിക്കണമെന്ന നിർദേശവുമായി ആഭ്യന്തരവകുപ്പ്. കെമിക്കൽ എക്‌സാമിനേഷൻ ലാബോറട്ടറികളിലാണ് കെ ഫോൺ പ്രൈമറി കണക്ഷനായി തന്നെ ഉപയോഗിക്കാനും സെക്കൻഡറിയായി മറ്റു കണക്ഷനുകൾ പാടില്ലെന്നും നിർദേശം നൽകിയത്. നിബന്ധനകൾക്ക് വിധേയമായി കെമിക്കൽ എക്‌സാമിനേഷൻ ലബോറട്ടറിയിൽ പുതിയ കെ ഫോൺ കണക്ഷൻ എടുക്കുന്നതിനായി 6.95 ലക്ഷം രൂപയുടെ ഭരണാനുമതി നൽകി ആഭ്യന്തരവകുപ്പ് അണ്ടർ സെക്രട്ടറി ഉത്തരവിട്ടു.  

തടസമോ വേഗതകുറവോ നേരിടാത്ത പക്ഷം സർക്കാർ ഓഫിസുകളിൽ അടിയന്തരമായി കെ ഫോൺ പ്രാഥമിക ഇന്റർനെറ്റ് കണക്ഷനായി ഉപയോഗിക്കേണ്ടതാണെന്നും ഇതര കണക്ഷനുകൾ വിച്ഛേദിക്കണമെന്നും സർക്കാർ കഴിഞ്ഞ വർഷം ഏപ്രിലിൽ ഉത്തരവിട്ടിരുന്നു. 

എന്നാൽ കെമിക്കൽ എക്‌സാമിനേഷൻ വകുപ്പിന് കീഴിലുള്ള മൂന്ന് ലാബുകളിലും സാംപിളുകൾ സ്വീകരിക്കുന്നത് മുതൽ കെമിക്കൽ അനാലിസിസ് സർട്ടിഫിക്കറ്റുകൾ ജനറേറ്റ് ചെയ്യുന്നത് വരെയുള്ള കാര്യങ്ങൾ ചെയ്യുന്ന ലബോറട്ടറി മാനേജ്‌മെന്റ് സിസ്റ്റം സോഫ്റ്റ്‌വെയർ, അഡ്മിനിസ്‌ട്രേറ്റീവ് ഡിവിഷനുകളിലെ ഇ ഓഫിസ് ജോലികൾ എന്നിവ ചെയ്യുന്നത് ബി.എസ്.എൻ.എല്ലിന്റെ ലീസ് ലൈൻ മുഖേനയാണ്. തിരുവനന്തപുരം, എറണാകുളം, കോഴിക്കോട് ലാബുകളിൽ കണക്ട് ചെയ്തിരുന്ന ലീസ് ലൈനിന്റെ ബി.എസ്.എൻ.എൽ മുഖേനയുള്ള ഇന്റർനെറ്റ് കണക്ഷന് വാർഷികാടിസ്ഥാനത്തിൽ രണ്ട് ലക്ഷത്തോളമാണ് ചെലവ് വരുന്നത്. 

അതേസമയം കെ ഫോണിന്റെ  ഇന്റർനെറ്റ് സേവനം ഉപേക്ഷിക്കാനും മറ്റു സേവനദാതാക്കളിലേക്കു മാറാനും അനുവാദം തേടി വിവിധ സർക്കാർ വകുപ്പുകൾ ഇതിനകം  രംഗത്തെത്തിയിട്ടുണ്ട്.  തടസമില്ലാത്ത ഇന്റർനെറ്റ് സേവനം അനിവാര്യമായ വിഭാഗങ്ങൾക്ക് കെ ഫോണിനു പുറമേ മറ്റൊരു കമ്പനിയുടെ കൂടി ഇന്റർനെറ്റ് സേവനം ലഭ്യമാക്കുന്ന കാര്യം പരിഗണിക്കാമെന്ന് ചീഫ് സെക്രട്ടറി  വ്യക്തമാക്കിയതിന് പിന്നാലെയാണ് കെമിക്കൽ ലബോറട്ടറിയിൽ കെ ഫോൺ മാത്രം ഉപയോഗിച്ചാൽ മതിയെന്ന നിർദേശം നൽകിയത്.