തിരുവനന്തപുരം: തെരുവുനായ ശല്യം രൂക്ഷമായ സാഹചര്യത്തിൽ പരാതികൾ പരിഹരിക്കുന്നതിനായി സംസ്ഥാന കൺട്രോൾ റൂം പ്രവർത്തനം ആരംഭിച്ചതായി തദ്ദേശസ്വയംഭരണ വകുപ്പ് പ്രിൻസിപ്പൽ ഡയറക്ടർ ജെറോമിക് ജോർജ്ജ് അറിയിച്ചു. 0471 2773100 എന്ന ടോൾ ഫ്രീ നമ്പറിൽ പൊതുജനങ്ങൾക്ക് പരാതികൾ അറിയിക്കാവുന്നതാണ്. കൺട്രോൾ റൂം എല്ലാ ദിവസവും രാവിലെ 10 മണി മുതൽ വൈകുന്നേരം 5 മണി വരെ പ്രവർത്തിക്കും.

വർക്കല ബീച്ചിൽ വിദേശ വനിതയ്ക്ക് കടിയേറ്റു

സംസ്ഥാനത്ത് തെരുവുനായ ശല്യം വർധിക്കുന്നതിനിടെ, ഇന്ന് വർക്കല ബീച്ചിൽ ഇറ്റാലിയൻ സ്വദേശിനിയായ ഫ്ലാബിയക്ക് തെരുവുനായയുടെ കടിയേറ്റു. ഇന്ന് രാവിലെ പാപനാശം തീരത്ത് വിശ്രമിക്കുന്നതിനിടെയാണ് രണ്ട് തെരുവുനായ്ക്കൾ ആക്രമിച്ചത്. ഇവരുടെ ഇടതുകാൽ മുട്ടിന് മുകളിലാണ് കടിയേറ്റത്. ഉടൻ തന്നെ നാട്ടുകാർ ചേർന്ന് ഇവരെ വർക്കല താലൂക്ക് ആശുപത്രിയിൽ പ്രവേശിപ്പിച്ചു.

ബീച്ചിലും പരിസരത്തും തെരുവുനായ ശല്യം രൂക്ഷമായിട്ടും നഗരസഭ വേണ്ട നടപടികൾ സ്വീകരിക്കുന്നില്ലെന്ന ആരോപണങ്ങൾ നിലനിൽക്കേയാണ് വിദേശ വനിതയ്ക്ക് കടിയേറ്റ സംഭവം. ആഴ്ചകൾക്ക് മുമ്പ് കോവളം ബീച്ചിലെത്തിയ റഷ്യൻ സ്വദേശിനി പൗളിനയെയും തെരുവുനായ കടിച്ചിരുന്നു. വിദേശ സഞ്ചാരികൾക്ക് നേരെയുണ്ടാകുന്ന ആക്രമണങ്ങൾ സംസ്ഥാനത്തിന്റെ ടൂറിസം മേഖലയ്ക്ക് നാണക്കേടുണ്ടാക്കുന്നുവെന്നാണ് നാട്ടുകാരുടെ പരാതി.

പരാതികൾ അറിയിക്കാൻ

തെരുവുനായ ശല്യവുമായി ബന്ധപ്പെട്ട പരാതികൾ അറിയിക്കേണ്ട ടോൾ ഫ്രീ നമ്പർ: 0471 2773100

പ്രവർത്തന സമയം: എല്ലാ ദിവസവും രാവിലെ 10 മണി മുതൽ വൈകുന്നേരം 5 മണി വരെ.

The state government has opened a control room to address the growing menace of stray dogs. Complaints related to stray dog issues can be reported to the control room, which operates daily from 10 AM to 5 PM. This action comes after recent incidents, including a foreign tourist being bitten by a stray dog in Varkala. The contact number for complaints is 0471 2773100.