കൊച്ചി: കേരളത്തില്‍ സ്വര്‍ണവില ഈ മാസത്തെ ഏറ്റവും ഉയര്‍ന്ന നിലയില്‍ എത്തിയിരിക്കുകയാണ്. അമേരിക്കന്‍ പ്രസിഡന്റ് ഡൊണാള്‍ഡ് ട്രംപിന്റെ തീരുവ ഭീഷണിയും ഇന്ത്യയുടെ തിരസ്‌ക്കാരവുമെല്ലാം കേരളത്തിലെ സ്വര്‍ണ വിലയെ ബാധിച്ചിട്ടുണ്ടെന്ന് നിരീക്ഷകര്‍ ചൂണ്ടിക്കാട്ടുന്നു. അമേരിക്കയുടെ അടിക്കടി മാറുന്ന വ്യാപാര നയങ്ങള്‍ ലോക വിപണിയില്‍ സൃഷ്ടിച്ച ആശയക്കുഴപ്പം സ്വര്‍ണ വിപണിയിലും കയറിയിട്ടുണ്ട്. പിഴ ചുമത്തുമെന്ന ഭീഷണി ഇന്ത്യ തള്ളിയപ്പോള്‍ പുതിയ തീരുവയുമായി വരുമെന്നായി ട്രംപിന്റെ ഭീഷണി. ഇതോടെ വിപണി ആശങ്കയിലായെന്നും നിരീക്ഷകര്‍ ചൂണ്ടിക്കാട്ടുന്നു. 

അതേ സമയം, ഉടന്‍ തീരുവ ചുമത്തില്ല എന്നാണ് ട്രംപ് അവസാനം വ്യക്തമാക്കിയിരിക്കുന്നത്. ഇന്ന് ഇതുസംബന്ധിച്ച പ്രഖ്യാപനമുണ്ടാകുമെന്നാണ് സൂചന. അങ്ങിനെയെങ്കില്‍ അതിന് അനുസരിച്ചാകും സ്വര്‍ണത്തിന്റെ ഭാവി വില മാറ്റമെന്നും വ്യാപാരികള്‍ വ്യക്തമാക്കുന്നു. ക്രൂഡ് ഓയില്‍ വിലയിലും ഡോളര്‍ നിരക്കിലും കാര്യമായ ചലനമില്ല. ഇന്ത്യന്‍ രൂപ നേരിയ തോതില്‍ കയറിയിട്ടുമുണ്ട്. അതേസമയം, വലിയ മുന്നേറ്റമാണെന്ന് പറയാനും സാധിക്കില്ല. ഈ ഘടകങ്ങളെല്ലാം സ്വര്‍ണ വിലയേയും ബാധിക്കുമെന്ന് വ്യാപാരികള്‍ ചൂണ്ടിക്കാട്ടുന്നു. 

ALSO READ: ഗസ്സ പൂര്‍ണമായും പിടിച്ചെടുക്കാനുള്ള ഇസ്‌റാഈലിന്റെ നീക്കം തടയില്ല, വിഷയത്തില്‍ തീരുമാനമെടുക്കേണ്ടത് അവര്‍ തന്നെയെന്നും ട്രംപ് 

അതേസമയം, രാജ്യാന്തര വിപണിയിലെ സ്വര്‍ണവിലയില്‍ ഇന്ന് കാര്യമായ മാറ്റമില്ല. എന്നാല്‍ ചാഞ്ചാട്ടം തുടരുകയാണ്. 

കേരളത്തില്‍ ഇന്നത്തെ വില നോക്കാം
75040 രൂപയാണ് 22 കാരറ്റില്‍ പവന്‍ സ്വര്‍ണത്തിന്റെ ഇന്നത്തെ വില. പവന് 80 രൂപ മാത്രമാണ് ഇന്ന് ഉയര്‍ന്നത്. ഗ്രാമിന് 10 രൂപ വര്‍ധിച്ച് 9380 രൂപയാണ് ഇന്ന്.  രാജ്യാന്തര വിപണിയില്‍ ഔണ്‍സ് സ്വര്‍ണത്തിന് 3374 ഡോളറാണ് ഇന്നത്തെ നിരക്ക്. ഇതിനേക്കാള്‍ ഉയര്‍ന്നിരുന്നവെങ്കിലും അപ്പോള്‍ തന്നെ  അല്‍പം താഴുകയായിരുന്നു. 

വ്യത്യസ്ത കാരറ്റുകള്‍ക്ക് ഇന്നത്തെ വില ഇങ്ങനെ

24 കാരറ്റ്
ഗ്രാമിന് 11 രൂപ കൂടി 10,233 
പവന് 88 രൂപ കൂടി 81,864

22 കാരറ്റ്
ഗ്രാമിന് 10 രൂപ കൂടി 9,380
പവന് 80 രൂപ കൂടി 75,040

18 കാരറ്റ്
ഗ്രാമിന് 8 രൂപ കൂടി 7,675
പവന് 64 രൂപ കൂടി 61,400

കുറഞ്ഞ വിലയിലും കിട്ടും സ്വര്‍ണാഭരണം 

ഗ്രാമിന് 10 രൂപയാണ് 18 കാരറ്റ് സ്വര്‍ണത്തിന് ഇന്ന് വര്‍ധിച്ചിരിക്കുന്നത്. 18 കാരറ്റില്‍ പവന്‍ സ്വര്‍ണം വാങ്ങാന്‍ 61,400 രൂപയാണ് വരിക. ആഭരണമാവുമ്പോള്‍ പണിക്കൂലിയും ജി.എസ്.ടിയുമൊക്കെ ഇതിന്റെ പുറമേ വരും. 75 ശതമാനം സ്വര്‍ണവും ബാക്കി ചെമ്പുമാണ് 18 കാരറ്റിലുള്ള ആഭരണത്തിലുണ്ടാകുക. 58 ശതമാനം സ്വര്‍ണവും ബാക്കി ചെമ്പും വരുന്ന 14 കാരറ്റ് സ്വര്‍ണം ഗ്രാമിന് 5995 രൂപയാണ് ഇന്ന് നല്‍കേണ്ടത്. ഏറ്റവും കുറഞ്ഞ പരിശുദ്ധിയിലുള്ള 9 കാരറ്റ് സ്വര്‍ണം ഗ്രാമിന് 3865 രൂപയാണ് ഇന്നത്തെ വില. ആഭരണ പ്രേമികള്‍ക്ക് ഈ കാരറ്റിലെല്ലാം വാങ്ങാവുന്നതാണ്. വില്‍ക്കുമ്പോള്‍ ഇതില്‍ ഉള്‍ക്കൊള്ളുന്ന സ്വര്‍ണത്തിന്റെ വില ലഭിക്കുകയും ചെയ്യും. ഈ മൂന്ന് കാരറ്റിലും ആഭരണം മാത്രമാണ് ലഭിക്കുക. കോയിന്‍, ബാര്‍ എന്നിവ ഈ കാരറ്റുകളില്‍ കിട്ടില്ല. 

Gold prices in Kerala surge to a monthly high as Trump's tariff threats and India's stance impact global markets and investor sentiment.