കൊച്ചി: എഡിജിപി എംആർ അജിത് കുമാറിന്റെ ശബരിമല ട്രാക്ടർ യാത്രയിൽ തുടർനടപടികൾ അവസാനിപ്പിച്ച് ഹൈക്കോടതി. ആരോഗ്യപ്രശ്നം മൂലമാണ് ട്രാക്ടർ ഉപയോഗിച്ചതെന്നാണ് അജിത് കുമാർ വിശദീകരണം നൽകിയത്. നടപടി ഇനി ആവർത്തിക്കരുത് എന്ന് ഹൈക്കോടതി നിർദ്ദേശിച്ചു. ശബരിമല സ്പെഷ്യൽ കമ്മീഷണറുടെ റിപ്പോർട്ടിന്റെ അടിസ്ഥാനത്തിലാണ് ഹൈക്കോടതി അജിത് കുമാറിനെതിരെ സ്വമേധയാ കേസെടുത്തത്.

ഈ വിഷയത്തിൽ സംസ്ഥാന സർക്കാരും തിരുവിതാംകൂർ ദേവസ്വം ബോർഡും കോടതിയിൽ വിശദീകരണം നൽകുകയും ചെയ്തു. സ്വാമി അയ്യപ്പൻ റോഡ് വഴി മറ്റാരെങ്കിലും അനധികൃതമായി യാത്ര ചെയ്തുവെന്നതും പത്തനംതിട്ട ജില്ല പോലീസ് മേധാവിയും ദേവസ്വം ബോർഡും കോടതിയിൽ നിർദേശം നൽകിയിട്ടുണ്ട്

ഹൈക്കോടതി നേരത്തെ തന്നെ ഈ റോഡിലൂടെയുള്ള ട്രാക്ടർ യാത്ര നിരോധിച്ചിരുന്നു. എന്നാൽ പമ്പ ഗണപതി ക്ഷേത്രത്തിൽ ദർശനം നടത്തിയ ശേഷം എംആർ അജിത്കുമാർ സ്വാമി അയ്യപ്പൻ റോഡിൽ പൊലിസിന്റെ ഉടമസ്ഥതയിലുള്ള ട്രാക്ടറിൽ യാത്ര ചെയ്യുകയായിരുന്നു. സിസിടിവി ക്യാമറകൾ പ്രവർത്തിക്കാത്ത സ്ഥലത്തായിരുന്നു ഈ നിയമവിരുദ്ധ യാത്ര നടന്നത്. മനുഷ്യ ജീവന് അപകടകരമാകും വിധം വാഹനമോടിച്ചതിനും രാത്രി ഒമ്പത് മണിക്ക് ശേഷം നിയമവിരുദ്ധമായി മൂന്നു പേരെ ട്രാക്ടറിൽ കയറ്റി എന്നുമാണ് അജിത് കുമാറിനെതിരെയുണ്ടായിരുന്ന കേസ്.