2026 ഐപിഎൽ ലേലത്തിൽ ഏറ്റവും വിലപ്പിടിപ്പുള്ള രണ്ട് താരങ്ങൾ ആരായിരിക്കുമെന്ന് തുറന്നു പറഞ്ഞിരിക്കുകയാണ് ഇന്ത്യൻ സ്പിൻ ഇതിഹാസം ആർ അശ്വിൻ. ഓസ്‌ട്രേലിയൻ താരങ്ങളായ മൈക്കൽ ഓവൻ, കാമറൂൺ ഗ്രീൻ എന്നീ താരങ്ങൾക്ക് ഉയർന്ന തുക ലേലത്തിൽ ലഭിക്കുമെന്നാണ് അശ്വിൻ പറഞ്ഞത്. ഇന്ത്യൻ താരങ്ങളെ മിനി ലേലത്തിൽ ടീമുകൾ സ്വന്തമാക്കുന്നത് ബുദ്ധിമുട്ട് നിറഞ്ഞ കാര്യമായിരിക്കുമെന്നും അശ്വിൻ പറഞ്ഞു. തന്റെ യുട്യൂബ് ചാനലിലൂടെ സംസാരിക്കുകയായിരുന്നു അശ്വിൻ. 

''ഇതൊരു മിനി ലേലം ആയിരിക്കും. ലേലത്തിൽ ഇന്ത്യൻ താരങ്ങളെ കിട്ടാൻ ബുദ്ധിമുട്ടായിരിക്കും. ചിലപ്പോൾ പുതിയ താരങ്ങൾ മാത്രമേ വരൂ. വിദേശ താരങ്ങൾക്കായിരിക്കും കൂടുതൽ വില ലഭിക്കുക. ടീമുകൾ ഇന്ത്യൻ താരങ്ങളെ പുറത്തിറക്കുന്നത് വളരെ അപകടകരമായ ഒരു ഫോർമുലയാണ്. ലേലത്തിൽ ഒരുപാട് ഓസ്‌ട്രേലിയൻ താരങ്ങൾ ഉണ്ടാവും. പഞ്ചാബ് കിങ്സിനായി പകരക്കാരനായി വന്ന് മൂന്ന് മത്സരങ്ങളിൽ കളിച്ച മൈക്കൽ ഓവൻ, കാമറൂൺ ഗ്രീനിനെപ്പോലുള്ള താരങ്ങൾ ലേലത്തിൽ വരും. വിദേശ ഓൾ റൗണ്ടർമാരായതിനാൽ ഇവർക്ക് വലിയ തുക നൽകേണ്ടി വരും'' അശ്വിൻ പറഞ്ഞു.

അതേസമയം ഈ സീസണിൽ അശ്വിൻ ചെന്നൈ സൂപ്പർ കിങ്‌സ് വിടാൻ ഒരുങ്ങുന്നതായും റിപ്പോർട്ടുകളുണ്ട്. അടുത്ത സീസണിന് മുന്നോടിയായി തന്നെ ടീമിൽ നിന്ന് റിലീസ് ചെയ്യണമെന്ന് അശ്വിൻ ആവശ്യപ്പെട്ടതായി ദേശീയ മാധ്യമങ്ങൾ റിപ്പോർട്ട് ചെയ്തു. ക്ലബ് വിടാൻ തയ്യാറെടുക്കുന്ന അശ്വിൻ ചെന്നൈ സൂപ്പർ കിങ്‌സിന്റെ അക്കാദമി ഡയറക്ടർ സ്ഥാനവും ഒഴിഞ്ഞിട്ടുണ്ടെന്നാണ് വിവരം.

രാജസ്ഥാൻ റോയൽസ് (ആർആർ) നിലനിർത്താതിരുന്ന രവിചന്ദ്രൻ അശ്വിനെ കഴിഞ്ഞ ഐ.പി.എൽ ലേലത്തിൽ ചെന്നൈ സൂപ്പർ കിങ്‌സ് സ്വന്തമാക്കുകയായിരുന്നു. 9.75 കോടി മുടക്കിയാണ് സ്പിൻ ബൗളിങ് ഓൾറൗണ്ടറെ ചെന്നൈ തട്ടകത്തിലെത്തിച്ചത്.10 വർഷത്തിന് ശേഷമാണ് അശ്വിൻ ചെന്നൈ സൂപ്പർ കിങ്‌സിലേക്ക് തിരിച്ചെത്തിയത്. 2009ൽ സൂപ്പർ കിങ്സിനൊപ്പം തന്റെ ഐ.പി.എൽ കരിയർ ആരംഭിച്ച അശ്വിൻ 2015 വരെ ഫ്രാഞ്ചൈസിക്ക് വേണ്ടി കളിച്ചു.

Former India opener R Ashwin believes Michael Owen and Cameron Green will be the two most valuable players in the 2026 IPL auction