ഗസ്സ: ഗസ്സയിൽ ഇസ്‌റാഈല്‍ ഭീകരത തുടരുക ആണ്. ജനങ്ങള്‍ പട്ടിണി കിടന്ന് മരിക്കുമ്പോഴാണ് ഇസ്‌റാഈല്‍ ആക്രമണം ശക്തിപ്പെടുത്തിയത്. കഴിഞ്ഞ 24 മണിക്കൂറില്‍ പട്ടിണി മൂലം 11 പേര്‍ കൊല്ലപ്പെട്ടതായി ഗസ്സ ആരോഗ്യ മന്ത്രാലയം അറിയിച്ചു. ഗസ്സ സിറ്റിയിലെ അല്‍ അഹ്്‌ലി ആശുപത്രിയില്‍ ഇസ്‌റാഈല്‍ സൈന്യം ബോംബ് വര്‍ഷിക്കുകയും ചെയ്തു. ഇതുവരെ പട്ടിണി മൂലം മരിച്ചവരുടെ എണ്ണം 251 ആയി. ഇതില്‍ 108 പേര്‍ കുട്ടികളാണ്. ഇന്നലെ ഗസ്സയില്‍ ആക്രമണത്തിലൂടെ ഇസ്‌റാഈല്‍ കൊലപ്പെടുത്തിയത് 42 പേരെയാണ്. ഇതില്‍ 22 പേരെ സഹായ കേന്ദ്രത്തില്‍ വെടിവച്ചു കൊല്ലുകയായിരുന്നു. ഭക്ഷണം കാത്തു നിൽക്കുന്നതിനിടെ പ്രകോപനം ഇല്ലാതെ ഇവരെ വെടിവച്ചു കൊല്ലുക ആയിരുന്നുവെന്നു ആരോഗ്യമന്ത്രാലയം അറിയിച്ചു.

 ഗസ്സയില്‍ പട്ടിണി മരണം തുടരുന്നതിനിടെ 160 ടണ്‍ ഭക്ഷ്യവസ്തുക്കള്‍ എയര്‍ ഡ്രോപ് ചെയ്തു. ജോര്‍ദാന്‍, യു.എ.ഇ, ജര്‍മനി, ബെല്‍ജിയം, ഫ്രാന്‍സ്, ഇറ്റലി, നെതര്‍ലാന്റ്‌സ്, ഡെന്‍മാര്‍ക്, ഇന്തോനോഷ്യ രാജ്യങ്ങളിലെ വ്യോമസേനകളുടെ സഹായത്തോടെയാണ് ഭക്ഷണ വിതരണം നടന്നത്. ഇസ്‌റാഈല്‍ സൈന്യമാണ് ഇക്കാര്യം പ്രസ്താവനയില്‍ അറിയിച്ചത്. ഇതാദ്യമായാണ് ഗസ്സയില്‍ ഡെന്‍മാര്‍ക്കും ഇന്തോനേഷ്യയും ഭക്ഷ്യവസ്തുക്കള്‍ വിതരണം ചെയ്യുന്നത്.

ALSO READ: ഖാലിദ് ജമീലിന്റെ പ്രഥമ പരീക്ഷ കാഫ നാഷന്‍സ് കപ്പ്; ഞെട്ടിച്ച് ആദ്യ ടീം സെലക്ഷന്‍

Israel intensifies Gaza City attacks, forcing starving Palestinians to flee