ന്യൂഡല്‍ഹി: ഉപരാഷ്ട്രപതി തിരഞ്ഞെടുപ്പിന് മുന്‍ സുപ്രീം കോടതി ജഡ്ജിയെ ഇറക്കി ഇന്‍ഡ്യ സഖ്യം. അടുത്ത മാസം നടക്കുന്ന തെരഞ്ഞടുപ്പില്‍ ആന്ധ്രപ്രദേശില്‍ നിന്നുള്ള ബി സുദര്‍ശന്‍ റെഡ്ഡി ഇന്‍ഡ്യ മുന്നണിക്കായി മത്സരിക്കും. ഗുവാഹത്തി ഹൈക്കോടതി മുന്‍ ചീഫ് ജസ്റ്റിസായും സുദര്‍ശന്‍ റെഡ്ഡി സേവനമനുഷ്ഠിച്ചിട്ടുണ്ട്. ഗോവയിലെ ആദ്യ ലോകായുക്തയായിരുന്നു. 

1971ല്‍ ആന്ധ്രാപ്രദേശ് ബാര്‍ കൗണ്‍സിലിന് കീഴില്‍ അഭിഭാഷകനായാണ് ഇദ്ദേഹം ഔദ്യോഗിക ജീവിതം ആരംഭിച്ചത്. 1988 മുതല്‍ 90 വരെ ഹൈക്കോടതയില്‍ സര്‍ക്കാര്‍ പ്ലീഡറായി സേവനമനുഷ്ഠിച്ചു. 1995ല്‍ ആന്ധ്രാപ്രദേശ് ഹൈക്കോടതിയില്‍ സ്ഥിരം ജഡ്ജിയായി നിയമിക്കപ്പെട്ട ഇദ്ദേഹം 2005ല്‍ ഗുവാഹത്തി ഹൈക്കോടതി ചീഫ് ജസ്റ്റിസായി ചുമതലയേറ്റു. 2007ലാണ് സുപ്രീം കോടതിയിലേക്കുള്ള പ്രവേശനം. 2011ല്‍ വിരമിച്ചതിന് ശേഷം ഗോവയുടെ ലോകായുക്തയായി. 

ALSO READ: മാധ്യമപ്രവർത്തകരായ സിദ്ധാർത്ഥ് വരദരാജനും, കരൺ ഥാപ്പറിനും എതിരെ രാജ്യദ്രോഹത്തിന് കേസെടുത്ത് അസം പൊലിസ്; ഓഗസ്റ്റ് 22-ന് ഗുവാഹത്തി ക്രൈം ബ്രാഞ്ചിന് മുന്നിൽ ഹാജരാകാൻ നിർദേശം

അതേസമയം സെപ്റ്റംബർ 9നാണ് ഉപരാഷ്ട്രപതി തിരഞ്ഞെടുത്ത് നിശ്ചയിച്ചിട്ടുള്ളത്. മഹാരാഷ്ട്ര ഗവര്‍ണര്‍ സിപി രാധാകൃഷ്ണനാണ് എന്‍ഡിഎയുടെ ഉപരാഷ്ട്രപതി സ്ഥാനാര്‍ഥി. തമിഴ്‌നാട് ബിജെപി മുന്‍ അധ്യക്ഷനായിരുന്ന രാ​ധാകൃഷ്ണൻ ആര്‍എസ്എസിലൂടെയാണ് സംഘടനാ പ്രവര്‍ത്തനം ആരംഭിച്ചത്. ജനസംഘത്തിന്റെ നേതാവായിരുന്നു. കോയമ്പത്തൂരില്‍ നിന്ന് ലോക്‌സഭയിലേക്ക് തിരഞ്ഞെടുക്കപ്പെട്ടു. മുന്‍പ് ജാര്‍ഖണ്ഡിന്റെ ഗവര്‍ണറായും സേവനമനുഷ്ഠിച്ചിട്ട വ്യക്തിയാണ് സിപി രാധാകൃഷ്ണൻ. 

മുൻ ഉപരാഷ്ട്രപതി ആയിരുന്ന ജഗ്ദീപ് ധൻകറിന്റെ അപ്രതീക്ഷിത രാജിക്ക് പിന്നാലെയാണ് പുതിയ തെരഞ്ഞെടുപ്പിന് കളമൊരുങ്ങുന്നത്. കഴിഞ്ഞ ജൂലൈ 21നാണ് ആരോഗ്യ പ്രശ്‌നങ്ങൾ ചൂണ്ടിക്കാട്ടി ഉപരാഷ്ട്രപതി ആയിരുന്ന ജഗ്ദീപ് ധൻകർ സ്ഥാനം ഒഴിഞ്ഞത്. പെട്ടെന്നുണ്ടായ രാജി വലിയ വിവാദങ്ങൾക്ക് വഴി വെക്കുകയും, എൻഡിഎ സർക്കാരിനെ പ്രതിസന്ധിയിലാക്കുകയും ചെയ്തിരുന്നു. ആരോഗ്യ സംക്ഷണത്തിന് മുൻഗണന നൽകാൻ വേണ്ടിയാണ് രാജിയെന്നും, തനിക്ക് ലഭിച്ച പിന്തുണയ്ക്ക് നന്ദിയുണ്ടെന്നും രാഷ്ട്രപതിക്ക് അയച്ച കത്തിൽ ധൻകർ പറഞ്ഞിരുന്നു.

എന്നാൽ രാജിക്ക് പിന്നിൽ രാഷ്ട്രീയ കാര്യങ്ങളാണെന്നും, ബിജെപി മറുപടി പറയണമെന്നും ആവശ്യപ്പെട്ട് കോൺഗ്രസ് അടക്കമുള്ള പ്രതിപക്ഷ കക്ഷികൾ രംഗത്തെത്തിയിരുന്നു. ജസ്റ്റിസ് യശ്വന്ത് ശർമയെ പദവിയിൽ നിന്ന് നീക്കാനുള്ള രാജ്യസഭാ നോട്ടീസ് സ്വീകരിച്ചതിന് പിന്നാലെയാണ് ധൻകർ രാജിവെച്ചത്. 

B Sudarshan Reddy india alliance vice president candidate