ന്യൂഡൽഹി: സ്വാതന്ത്ര്യ ദിനത്തിൽ ഗസ്സയിൽ ദുരിതമനുഭവിക്കുന്ന ജനങ്ങൾക്ക് വേണ്ടി ഉപവാസ സമരം നടത്തിയ 77 കാരനായ മുൻ ഐ.ഐ.ടി ഡൽഹി പ്രൊഫസർ വി.കെ ത്രിപാഠിയെ അപമാനിച്ച് ഡൽഹി പൊലിസ്. രാജ്ഘട്ടിൽ ഒരു ദിവസം നീണ്ടുനിന്ന ഉപവാസ സമരം നടത്തുന്നതിന് ഇടയിൽ എത്തിയ പൊലിസാണ് സമരം തടയുകയും അദ്ദേഹത്തെ അപമാനിക്കുകയും ചെയ്‌തത്‌. വി.കെ ത്രിപാഠിയുടെ മകൾ രാഖി ത്രിപാഠി സോഷ്യൽ മീഡിയയിൽ ദൃശ്യങ്ങൾ പങ്കുവെച്ചതോടെയാണ് സംഭവം പുറത്തറിഞ്ഞത്. 

ഐ.ഐ.ടി ഡൽഹിയിലെ ഭൗതികശാസ്ത്ര മുൻ പ്രൊഫസറായ വി.കെ ത്രിപാഠി, കൈകളിൽ ലഘുലേഖകളുമായാണ് ഉപവാസം ആരംഭിച്ചത്. രാജ്ഘട്ട് പരിസരത്ത് വഴിയാത്രക്കാരുടെ അടുത്തേക്ക് എത്തി അദ്ദേഹം ലഘുലേഖ വിതരണം ചെയ്യുകയും ഗസ്സയിലെ ജനങ്ങൾ അനുഭവിക്കുന്ന ദുരിതം പങ്കുവെക്കുകയുമായിരുന്നു ചെയ്തിരുന്നത്. എന്നാൽ ഇതിനിടയിലേക്ക് പൊലിസ് എത്തുകയും അദ്ദേഹത്തെ കുറ്റവാളി എന്നരീതിയിൽ പിടികൂടുകയുമായിരുന്നു. 

ആഗസ്റ്റ് 15 ന് പ്രൊഫ. ത്രിപാഠിയും മകൾ രാഖിയും മറ്റ് ചിലരും രാജ്ഘട്ടിലേക്ക് പോയത് പ്രതിഷേധിക്കാനല്ല, മറിച്ച് ഗാസയോടുള്ള ഐക്യദാർഢ്യത്തിന്റെ ഭാഗമായി ലഘുലേഖകൾ വിതരണം ചെയ്യാനും ഒപ്പുശേഖരണ കാമ്പയിൻ നടത്താനും വേണ്ടിയായിരുന്നു. ഗസ്സയെ കുറിച്ച് ഏറെ വാർത്തകളും ചർച്ചകളും നടക്കുന്നുണ്ടെങ്കിലും ഇതൊന്നുമറിയാതെ വളരെ സാധാരണക്കാരായ മനുഷ്യരുണ്ട്. ഗസ്സ എന്താണെന്ന് പോലും അറിയാത്ത അത്തരം ജനങ്ങൾക്ക് ലഘുലേഖകൾ എഴുതി വിതരണം ചെയ്യുകയാണ് അച്ഛൻ ചെയ്യാറുള്ളതെന്ന് മകൾ പറയുന്നു. പ്രൊഫ. ത്രിപാഠി ലഘുലേഖകൾ വിതരണം ചെയ്തപ്പോൾ, ഗസ്സയോടുള്ള ഐക്യദാർഢ്യം പ്രകടിപ്പിച്ചുകൊണ്ട് രാഖി ആളുകളുടെ ഒപ്പ് ശേഖരണം നടത്തി കാമ്പയിൻ നടത്തുകയായിരുന്നു. ഇതിനിടയിലേക്കാണ് പൊലിസ് എത്തിയത്.

“എന്റെ ഹൃദയം തകർന്നു. ഗസ്സയ്ക്കു വേണ്ടി രാജ്ഘട്ടിൽ എന്റെ അച്ഛൻ പ്രൊഫ. വി.കെ. ത്രിപാഠി ദിവസം മുഴുവൻ ഉപവസിച്ചു. ലഘുലേഖകൾ വിതരണം ചെയ്തു. വൈകുന്നേരം 6 മണിയോടെ നിരവധി പൊലിസുകാർ വന്നു. ഞങ്ങൾ കുഴപ്പമുണ്ടാക്കാൻ വന്നവരാണെന്ന മട്ടിൽ വെറുപ്പോടെ സംസാരിച്ചു. ഇത് നമ്മുടെ പൊലിസാണെന്ന് എനിക്ക് വിശ്വസിക്കാൻ കഴിയുന്നില്ല. അത്രയധികം വെറുപ്പും മുൻവിധിയുമായാണ് അവർ സംസാരിച്ചത് ” രാഖി ത്രിപാഠി പറഞ്ഞു.

നിങ്ങൾ എന്തുകൊണ്ടാണ് ഗസ്സയിലേക്ക് പോകാത്തത്? നിങ്ങൾ എന്തുകൊണ്ട് അത് ചെയ്യുന്നില്ല? നമ്മുടെ രാജ്യത്ത് എന്തെങ്കിലും പോരായ്മകളുണ്ടോ? മോദി വളരെ നല്ല ജോലിയാണ് ചെയ്യുന്നത്. എന്നിങ്ങനെയാണ് പൊലിസുകാർ സംസാരിച്ചതെന്നും അവർ വ്യക്തമാക്കി. എന്നാൽ 'സ്വേച്ഛാധിപത്യ ഭരണകൂടങ്ങളുടെ ആയുധമാണ് അക്രമം, ജനങ്ങളുടെ ആയുധം അഹിംസയാണ്' എന്നായിരുന്നു പൊലിസുകാരോട് പ്രൊഫസർ വി.കെ ത്രിപാഠി പ്രതികരിച്ചത്.

അതേസമയം, ഒറ്റപ്പെട്ട പ്രകടനങ്ങൾ ത്രിപാഠിക്ക് പുതുമയുള്ള കാര്യമല്ല. 1992-ൽ ബാബറി മസ്ജിദ് പൊളിച്ച സമയത്തും പൊതുജന മനസ്സാക്ഷിയെ ഉണർത്തുന്നതിനായി ലഘുലേഖകൾ വിതരണം ചെയ്തുകൊണ്ട് അദ്ദേഹം തെരുവുകളിൽ ഉണ്ടായിരുന്നു. ഗാന്ധിയൻ പാതയായ അഹിംസയെയും കാരുണ്യത്തെയും കുറിച്ച് ആളുകളെ ഓർമ്മിപ്പിക്കുക എന്നതാണ് അദ്ദേഹത്തിന്റെ ലക്ഷ്യമെന്ന് അദ്ദേഹം പലപ്പോഴും പറയാറുണ്ട്. ഗസ്സയിലെ ജനങ്ങളെ സ്വന്തം ജനതയായി കണക്കാക്കാൻ ഇസ്‌റാഈൽ നേതൃത്വത്തെ പ്രേരിപ്പിക്കണമെന്ന് അഭ്യർത്ഥിച്ചുകൊണ്ട് ത്രിപാഠി 2023-ൽ പ്രധാനമന്ത്രി നരേന്ദ്ര മോദിക്ക് കത്തെഴുതിയിരുന്നു.

Former IIT Delhi professor VK Tripathi, 77, was allegedly insulted by Delhi Police while holding a one-day fast at Rajghat in solidarity with the suffering people of Gaza on Independence Day. His daughter, Rakhi Tripathi, shared videos of the incident on social media, bringing the matter to light.