സുൽത്താൻ ബത്തേരി: കാറിൽ രഹസ്യമായി മയക്കുമരുന്ന് കടത്തിയ യുവാവിനെ വയനാട്ടിൽ പൊലിസ് അറസ്റ്റ് ചെയ്തു. കോഴിക്കോട് തിരുവമ്പാടി എലഞ്ഞിക്കൽ സ്വദേശി കെ.എ. നവാസ് (32) ആണ് 28.95 ഗ്രാം എംഡിഎംഎയുമായി പിടിയിലായത്. ചൊവ്വാഴ്ച ഉച്ചയ്ക്ക് മുത്തങ്ങ തകരപ്പാടി ചെക്പോസ്റ്റിന് സമീപം നടന്ന വാഹന പരിശോധനയിലാണ് പ്രതി കുടുങ്ങിയത്.

കർണാടകയിൽ നിന്ന് സുൽത്താൻ ബത്തേരിയിലേക്ക് വരികയായിരുന്ന കെ.എൽ 64 ഇ 3401 നമ്പർ ഇന്നോവ കാറാണ് പൊലിസ് പരിശോധനയിൽ പിടിച്ചെടുത്തത്. വാഹനത്തിന്റെ സ്റ്റിയറിങ് വീലിന് താഴെ ഒളിപ്പിച്ച നിലയിൽ എംഡിഎംഎ കണ്ടെടുത്തതിനെ തുടർന്ന് കാർ കസ്റ്റഡിയിലെടുത്തു. ജില്ലാ ലഹരിവിരുദ്ധ സ്ക്വാഡും ബത്തേരി പൊലിസും ചേർന്നാണ് പരിശോധന നടത്തിയത്.

ബത്തേരി സ്റ്റേഷൻ സബ് ഇൻസ്പെക്ടർ കെ.കെ. സോബിന്റെ നേതൃത്വത്തിൽ എ.എസ്.ഐ.മാരായ സനൽ, ബിപിൻ, സീനിയർ സിവിൽ പൊലിസ് ഓഫീസർമാരായ വി.കെ. ഹംസ, ലെബനാസ്, സിവിൽ പൊലിസ് ഓഫീസർ അനിൽ എന്നിവർ അടങ്ങിയ സംഘമാണ് പ്രതിയെ പിടികൂടിയത്.

A Kozhikode native, K.A. Nawas (32), was arrested in Wayanad with 28.95 grams of MDMA during a vehicle check near Muthanga checkpost. The drugs were hidden under the steering wheel of an Innova car coming from Karnataka. The operation was led by Sultan Bathery police and the district anti-narcotics squad